މިސްރުން އިންސާނީ ހައްގުތަކަށް އިހުތިރާމް ނުކުރާތީ، އެމެރިކާއިން މިސްރަށް ފޯރުކޮށް ދިނުމަށް ހަމަޖެހިފައިވާ 130 މިލިއަން ޑޮލަރުގެ އަސްކަރީ އެހީތެރިކަން ބައިޑްންގެ ސަރުކާރުން މަޑު ޖައްސާލުމަށް ހަމަޖެހިފައިވާ ކަމުގައި، އެމެރިކާ ސަރުކާރުގެ އިސް ތިން އޮފިޝަލަކާއި ހަވާލާދީ ރޮއިޓާސްއިން ރިޕޯޓު ކޮށްފިއެވެ.
އެމެރިކާގެ ސެކެޓްރީ އޮފް ސްޓޭޓް އެންތަނީ ބަލިންކަން ފާއިތުވެދިޔަ އަހަރުގެ ސެޕްޓެމްބަރުމަހު ވިދާޅުވެފައިވަނީ، އިންސާނީ ހައްގުތަކާއި ގުޅުންހުރި ބައެއް ކަންކަން މިސްރުން އިއްލާހު ނުކުރާނަމަ މި އަސްކަރީ އެހީ މިސްރަށް ފޯރުކޮށް ދިނުން މަޑު ޖައްސާލެވޭނެ ކަމުގައެވެ.
އިންސާނީ ހައްގުތަކަަށް މަސައްކަތް ކުރާ ޖަމިއްޔާތަކުންވަނީ، އަބުދުލް ފައްތާހު އައްސީސީގެ ސަރުކާރަށް އެމެރިކާއިން ފޯރުކޮށް ދިނުމަށް ހަމަޖެހިފައިވާ 300 މިލިއަން އެމެރިކާ ޑޮލަރުގެ އަސްކަރީ އެހީ އެގައުމަށް ނުދިނުމަށް ބައިޑްންގެ ސަރުކާރަށް ގޮވާލާފައެވެ. 2013ވަނަ އަހަރު މިސްރުގައި އޮތް މުސްލިމް ބްރަދަރހޫޑްގެ ސަރުކާރު ވައްޓާލުމަށްފަހު އެގައުމުގެ ވެރިކަމަށް ވަޑައިގެންނެވި ސީސީ ވަނީ އޭނާއާއި ޚިޔާލުތަފާތު މީހުން މައިތިރި ކުރުމަށް ހަރުކަށި ފިޔަވަޅު އަޅުއްވާ އަދި ފާއިތުވެދިޔަ އަހަރު ތަކުގައި މި ފިޔަވަޅުތައް ވަރުގަދަ ކުރައްވާފައެވެ.
އެމެރިކާ ސަރުކާރުގެ އިސް އޮފިޝަލުން ވިދާޅުވާ ގޮތުގައި ބައިޑްންގެ ސަރުކާރުން މި އަސްކަރީ އެހީ ހިފެހެއްޓުމަށް ނިންމާފައި ވާކަމުގެ މައުލޫމާތު މިހާރުވަނީ އެމެރިކާގެ ކޮންގްރެސްގެ މެމްބަރުންނަށް އަރުވާފައެވެ. މި އެހީއަކީ މިއަހަރު އެމެރިކާއިން މިސްރަށް ދިނުމަށް ހަމަޖެހިފައިވާ 1.3 ބިލިއަން އެމެރިކާ ޑޮލަރުގެ އަސްކަރީ އެހީތެރިކަމުގެ %10 އެވެ. އެހެންނަމަވެސް ދޭން ހަމަޖެހިފައިވާ ހުރިހާ އެހީއެއް ހިފެހެއްޓުމަށް ނިންމާފައި ނުވާކަމަށްވެސް އޮފިޝަލުން މައުލޫމާތު ދީފައި ނުވެއެވެ.
އެހެންނަމަވެސް، އެމެރިކާއިން މިސްރަށް ދީފައިވާ އެހީ ހެފެހެއްޓުމަށް ނިންމާފައިވާ ނިންމުމާއި ގުޅޭގޮތުން އެމެރިކާގެ ސްޓޭޓް ޑިޕާޓްމަންޓުން އެއްވެސް ކޮމެންޓެއް ކޮށްފައެއް ނުވެއެވެ.
