ކޯވިޑްގެ ހާލަތު އިނގިރޭސިވިލާތުގައި އެންމެ ގޯސްވެގެން ދިޔައިރު، ލޮކްޑައުންގައި ހުންނަވާފަ، 2020 ވަނަ އަހަރުގެ މޭމަހުގެ 20 ވަނަ ދުވަހު، 10 ޑައުނިންގ ސްޓްރީޓުގެ ބަގީޗާއެއްގައި އޮތް ޕާޓީއަކަށް ވަޑައިގެންފައިވާ ކަމަށް ވިދާޅުވެ، އިނގިރޭސި ބޮޑުވަޒީރު މާފަށް އެދިވަޑައިގެންފިއެވެ.
މި ދުވަސްވަރަކީ، އިނގިރޭސިވިލާތުގައި ކޯވިޑްގެ ހާލަތު ގޯސްވެ، ކޯވިޑާ ދެކޮޅަށް އަޅާފައިވާ ފިޔަވަޅުތައް ހަރުކަށިކޮށް، މީހުން އެއްތަނަކަށް އެއްވުން މަނާ ކޮށްފައި އޮތް ދުވަސްވަރެކެވެ.
އިނގިރޭސި ގާނޫނުހަދާ މަޖިލިހުގައި، ބޮޑުވަޒީރާ ސުވާލުކުރުމަށް ބާއްވާ ހަފްތާގެ ބައްދަލުވުމުގައި މެމްބަރުންގެ ސުވާލުތަކަށް ޖަވާބު ދެއްވަމުން ޖޯންސަން ވިދާޅުވެފައިވަނީ، އޭނާ މަސައްކަތައް ވަޑައިގެންނެވުމުގެ ކުުރިން އެދުވަހު، 25 މިނިޓަށް ޕާޓީއެއްގައި ބައިވެރިވެ ވަޑައިގެންނެވި ކަމުގައެވެ. ޖޯންސަން ވިދާޅުވި ގޮތުގައި އޭނާ އެންމެ ފުރަތަމަ މި ޕާޓީއަށް ވަޑައިގެންނެވީ، މިއީ މަސައްކަތާއި ގުޅުންހުރި އިވެންޓެއް ކަމުގައި ހީ ކުރެވިގެން ކަމަށާއި، އެހެންނަމަވެސް، މިއީ ޕާޓީއެއްކަން އެގިވަޑައިގަތުމާއެކު މި ޕާޓީގެ ބައިވެރިން އެތެރެއަށް ވަނުމަށް އަންގާފައި ވާނެކަމަށެވެ.
އިނގިރޭސި ގާނޫނުހަދާ މަޖިލިހުގެ އިދިކޮޅު ޕާޓީގެ ލީޑަރު ކަޔަރ ސްޓާމަރ ވިދާޅުވި ގޮތުގައި، ބޮޑުވަޒީރު ޖޯންސަން އޭނާއަށް ހުންނެވުނީ ޕާޓީއެއްގައިކަން އެގިވަޑައި ނުގަންނަވާކަމަށް ވިދާޅުވެ ދައްކަވަނީ ތާކުންތަކު ނުޖެހޭ، ދެކޮޅު ނުޖެހޭ ވާހަކައެއް ކަމުގައެވެ. "މިއޮތީ ހަގީހަތް ފަޅާ އަރާފަ. އެތައް ދުވަހެއް ވަންދެން އޮޅުވާލުމާއި ދޮގު ހެދުމަށްފަހު އެންމެ ފަހުން މިވަނީ ގޮތް ހުސްވެފަ،" ސްޓާރމާ ވިދާޅުވެފައި ވެއެވެ.
މި މޭރުމުން ވާހަކަ ދައްކަވަމުން، އިދިކޮޅު ލޭބަރ ޕާޓީގެ ލީޑަރުވަނީ، ބޮޑުވަޒީރު ޖޯންސަންއަށް އިސްތިއުފާ ދެއްވަން ކެރިވަޑައިގަންނަވާނޭތޯ ސުވާލު ކުރައްވާފައެވެ.
ލޮކްޑައިންގެ ދުވަސްވަރު ޕާޓީއަކަށް ވަޑައިގެންނެވިކަމަށް އިނގިރޭސި ބޮޑުވަޒީރު އެއްބަސްވެ ވަޑައިގެންފައި މިވަނީ، އެގައުމުގައި ކޯވިޑްގެ ހާލަތު އެންމެ ގޯސްވެގެން ދިޔަ ދުވަސްވަރު، ބޮޑުވަޒީރުގެ ރަސްމީ ގެކޮޅު 10 ޑައުނިންގ ސްޓްރީޓުގައި ބާއްވާފައިވާ މި ޕާޓީއާއި ގުޅޭގޮތުން އެތައް ދުވަހެއް ވަންދެން އާންމުން އެތައް ބައެއްގެ ފާޑުކިއުން އަމާޒުވެގެން ގޮސްފައި ވަނިކޮށެވެ.
ފާއިތުވެދިޔަ ހަފްތާގައި އާންމު ވެގެންގޮސްފައިވާ މައުލުމާތުތަކުން އެގިގެން ގޮސްފައިވާ ގޮތުގައި، ބޮރިސް ޖޯންސަންގެ ޕްރަައިވެޓް ސެކެޓްރީ މާރޓިން ރޭނީލްޑްސް ވަނީ، 2020 އަހަރުގެ މޭމަހުގެ 20ވަނަ ޑައުނިން ސްޓްރީޓްގެ ބަގީޗާއެއްގައި، "ގައި ދުރުކޮށް" ބޭއްވޭ ޕާޓީއަކަށް ޑައުނިންގ ސްޓްރީޓުގައި މަސައްކަތް ކުރާ 100 ވަރަކަށް މުވަޒިފުންނަށް އީމެއިލް މެދުވެރިކޮށް ދައުވަތު ފޮނުވާފައެވެ.
ބޮޑުވަޒީރުގެ ގެކޮޅުގައި މި ޕާޓީ ބާއްވާފައިވަނީ މުޅި ދުނިޔޭގައިވެސް ކޯވިޑްގެ ހާލަތު ގޯސްވެ، އިނގިރޭސިވިލާތްވެސް ވަރަށް ވަރުގަދަޔަށް ލޮކްޑައުން ކޮށްފައި އޮއްވައެވެ. އަދި މި ދުވަސްވަރަކީ އިނގިރޭސިވިލާތުގައި ގެއިން ބޭރުގައި އެކަކަށްވުރެ ގިނައިން އެއްތަނަކަށް ޖަމާނުވުމަށް އަންގާ، މިއެންގުމާ ޚިލާފަށް އަމަލްކުރާ ފަރާތްތަކާ ދެކޮޅަށް ގާނޫނީ ފިޔަވަޅު އަޅާނެކަންވެސް އާންމުކޮށް އިއުލާން ކޮށްފައިވާ ދުވަސްވަރެކެވެ.
މީގެކުރިން ޖޯންސަންވަނީ އޭނާއާއި އަދި އޭނާގެ އަނބިކަބަލުން ކެރީ ޖޯންސަން މި ޕާޓީއަށް ހާޒިރުވިކަން ދޮގު ކުރައްވަން އިންކާރު ކުރައްވާފައެވެ. އަދި އޭނާވަނީ، ޑައުނިންގ ސްޓީޓްގައި ބޭއްވުނު ޕާޓީތަކާބެހޭ ތަހުގީގެއް ކުރިޔަށް ދަތީ، މި މައްސަލައާއި ގުޅޭގޮތުން އިތުރަށް ކޮމެންޓް ކުރައްވަންވެސް ދެކޮޅު ހައްދަވާފައެވެ.
އިގިރޭސި ސަރުކާރުގެ ވަޒީރަކު، މިނިސްޓީރިއަލް ކޯޑާއި ޚިލާފް ވެއްޖެނަމަ މަގާމުން އިސްތިއުފާ ދެއްވަން ޖެހިވަޑައި ގަންނަވައެވެ. ޖޯންސަންގެ އަމިއްލަފުޅު ޕާޓީގެ ބައެއް މެމްބަރުންވެސް ވަނީ، ބޮޑުވަޒީރު ޖޯންސަން މި ޕާޓީއަށް ވަޑައިގެންނެވިކަން ސާބިތުވެއްޖެނަމަ އިސްތިއުފާ ދެއްވަން ޖެހިވަަޑައިގަންނަވާނޭކަަމަށް ވިދާޅުވެފައެވެ.
