ގެނެވުނު އަސްކަރީ ބަޢާވާތެއްގައި މަގާމުން ދުރުކޮށް ހައްޔަރު ކޮށްފައިވާ މިޔަންމާގެ އިދިކޮޅު ލީޑަރު އަންގ ސަންގ ސޫކީ 4 އަހަރަށް ޖަލަށް ލާން، މިޔަންމާގެ ކޯޓަކުން ހުކުމް ކޮށްފިއެވެ.

ސޫކީގެ މައްޗަށް 4 އަހަރުގެ ޖަލު ހުކުމެއް އައިސްފައިވަނީ، ކޯވިޑް19 އާއި ދެކޮޅަށް އަޅާފައިވާ ފިޔަވަޅުތަކާ އޭނާ ޚިލާފް ވުމާއި ގުޅިގެން ކުރި ދައުވާތަކަށެވެ.

މި ހުކުމަކީ، މިއީ މިއަހަރުގެ ފެބްރުއަރީމަހު، މިޔަންމާރގެ އަސްކަރިއްޔާއިން ގެނައި ބަޢާވާތެއްގައި، އެގައުމުގައި އޮތް މަދަނީ ސަރުކާރު ވައްޓާލާ، އަންގ ސަންގ ސޫކީ ހައްޔަރުކޮށް، އެއަށްފަހު އޭނާގެ މައްޗަށް އުފުލާފައި ގިނަ ދައުވާތަކުގެ ތެރޭގައި ހިމެނޭ އެއް ދައުވާގެ ހުކުމެވެ.

މިޔަންމާގައި މިހާރު އޮތް އަސްކަރީ ސަރުކާރުން އޭނާގެ މައްޗަށް އުފުލާފައިވާ އިތުރު ދައުވާތަކުގެ ތެރޭގައި ކޮރަޕްޝަނާއި ފަސާދައާއި، ދައުލަތުގެ ސިއްރުތަކާ ބެހޭ ގާނޫނާ ޚިލާފުވުމާއި، އަދި ޓެލެކޮމް ގާނޫނާ ޚިލާފު ވުމުގެ ދައުވާވެސް ހިމެނެއެވެ.

މި ހުރިހާ ދައުވާތަކެއްގެ ހުކުމް އެއްކޮށްލުމުން، އަންގ ސަންގ ސޫލީ ގަރުނަކަށްވުރެ ދިގު މުއްދަތެއް ޖަލުގައި ހޭދަ ކުރަން ޖެހޭނެއެވެ. މި ހުރުހާ ދައުވާތަކަށްވެސް ސޫކީ އިންކާރު ކުރައްވައެވެ. ސޫކީއާއި ދެކޮޅަށް އުފުލާފައިވާ ދައުވާތަކުގެ ތެރޭގައި، ކޮރަޕްޝަނާއި ގުޅުންހުރި ދައުވާތައްވެސް ހިމެނޭ އިރު، އިތުރު ދެދައުވާއެއް، ސޫކީގެ ސަރުކާރުގައި ވަޒީރުކަން ކުރެއްވި މިން ތޫއާއި ދެކޮޅަށްވެސް އަސްކަރީ ސަރުކާރުން ވަނީ އުފުލާފައެވެ.

އުފުލާފައިވާ ދައުވާތަކުގެ ތެރޭގައި ކޮރަޕްޝަނާ ގުޅުންހުރި ދައުވާތައް ހިމެނޭ. އަހަރެމެންނަކަށް ނޭގޭ އެމީހުން ދައުވާތައް އުފުލި ސަބަބެއް. އަދި ކޮން ދައުވާތަކެއް ކަމެއްވެސް. އަހަރެމެން އޭގެ ތަފްސީލްތައް ހޯދާނަނަން،

– ސޫކީގެ ގާނޫނީ ވަކީލާ މިން މިން ސޮއި ރޮއިޓާސްއާއި ވާހަކަ ދައްކަމުން ވިދާޅުވެފައި ވެއެވެ.

އުމުރުން 76 އަހަރުގެ އަންސަންގ ސޫކީއާއި ދެކޮޅަށް އުފުލާފައިވާ ގިނަ ދައުވާތަކުގެ ސަބަބުން، މިޔަންމާގެ ތަފާތު 3 ސިޓީއެއްގައި މިހާރު އަންގްސަން ސޫކީގެ ޝަރީއަތްތަށް ކުރިޔަށް ދެއެވެ. ނޯބެލް ޕީސްގެ އިނާމު މީގެކުރިން ހާސިލް ކުރައްވާފައިވާ، މިޔަންމާގެ އިންތިޚާބީ ލީޑަރު، އެގައުމުގެ އަސްކަރިއްޔާއިން ގެނައި ބަޢާވާތެއްގައި ވެރިކަމުން ދުރުކޮށް، މި އަހަރުގެ ފެބްރުއަރީ މަހުގެ 1 ވަނަ ދުވަހުން ފެށިގެން ވަނީ ހައްޔަރު ކުރެވިފައެވެ.

އަދި އޭނާގެ މައްޗަށް ވަނީ، ވޯކީ ޓޯކީ ރޭޑިއޯ ގާނޫނާ ޚިލާފަށް މިޔަންމާއަށް އެތެރެކޮށް ގެންގުޅުމުގެ ދައުވާ އުފުލާފައިވާއިރު، ކޯވިޑާދެކޮޅަށް އަލާފައިވާ ފިޔަވަޅުތަކާއި ޚިލާފްވި ކަމުގައި ދައުވާ، ޑިސާސްޓަރ މެނޭޖްމަންޓް ގާނޫނުގެ ދަށުން ކޮށްފައެވެ. މި ދައުވާތައް ކޮށްފައިވަނީ، ވެރިރަށް ނައިޕިޓޯގައެވެ.

އަދި ހަމަ އެއާއެކު، ޔަންގޮން ކޯޓުގައި، އޭނާގެ މައްޗަށްވަނީ، މިޔަންމާގެ އޮފިޝަލް ސީކްރެޓް ގާނޫނާއި ޚިލާފުވުމުގެ ދައުވާވެސް ކޮށްފައެވެ. މި ދައުވާ ސާބިތު ވެއްޖެނަމަ އެނާގެ މައްޗަށް 14 އަހަރުދުވަހުގެ ޖަލު ހުކުމެއް އަންނާނެއެވެ. އަންސަންގ ސޫކީގެ ގާނޫނީ ވަކީލުންގެ ޓީމުންވަނީ މިހުރިހާ ދައުވާތަކަށްވެސް އިންކާރު ކޮށްފައެވެ.

ސޫކީގެ ދަރިންނާއި އަދި އަވަހާރަވެފައިވާ ފިރިކަލުންނަކީ، ގައުމުން ބޭރުގެ ރައްޔުތުކަން އޮންނަ ބަޔަކަށް ވާތީ އޭނާއަށް އެގައުމުގެ ރައީސްކަމަށް ވާދު ކުރުމުގެ ފުރުސަތުވަނީ ގެއްލިފައެވެ. ބަޢާވާތަކުން ވެރިކަން ބަދަލު ކޮށްލުމުގެ ކުރިން އޭނާވަނީ މިޔަންމާގެ ސްޓޭޓް ކައުންސިލަރުކަން އަދާ ކުރައްވާފައެވެ.