އިމާރާތެއްގެ ތިންވަނަ ބުރީގެ ބެލްކަންޏަކުން ބޭރަށް ދުފާލައިގެން ކުޅުޖަހަން އުޅުމުގެ ތެރޭގައި 11،000 ވޯލްޓް (11kV) ރޭޓުގެ ހައި-ޓެންޝަން ކަރަންޓު ލައިނެއްގައި ޖެހި 65 އަހަރުގެ ފިރިހެނަކު މަރުވެއްޖެއެވެ.

މި ހާދިސާ ހިނގާފައިވަނީ މެދިޔާ ޕްރަދޭޝްގެ ވިދިޝާ ޑިސްޓްރިކްޓްގެ ގަންޖްބާސޯޑާ ސަރަހައްދުގައެވެ.

ޚަބަރުތައް ބުނާގޮތުން މަރުވެފައިވަނީ އެ ސަރަހައްދުގެ އިމާރާތެއްގައި ކުއްޔަށް ދިރިއުޅެމުން ދިޔަ މެކޭނިކެއްގެ މަސައްކަތްކުރާ "ޕްރަބޫލާލް ގުޕްތާ" ނަމަކަށް ކިޔާ މީހެކެވެ. އޭނާ ބެލްކަންޏަށް ނުކުމެ ތިރިއަށް ކުޅުޖަހަން ގުދުވި ވަގުތު، އިމާރާތާ ކައިރިން އަޅާފައިވާ ހައި-ޓެންޝަން ކަރަންޓު ވައިރުތަކުގައި ޖެހުނީއެވެ.

ކަރަންޓުގައި ޖެހުމާއެކު އޭނާގެ ހަށިގަނޑު ވަނީ ވަގުތުން އަނދައި، ސީންގައި މަރުވެފައެވެ. ކަރަންޓު އެކްސްޕާޓުން ފާހަގަކުރާ ގޮތުގައި، ކުޅުގައި އެކުލެވޭ ތެތްކަމާއި ލޮނުގެ މާއްދާތަކުގެ ސަބަބުން، ހައި-ޓެންޝަން ކަރަންޓު ލައިނެއްގެ ކައިރިއަށް ކުޅު ޖެހުމުން ކަރަންޓު ދަމައިގަތުމުގެ ފުރުސަތު އޮވެއެވެ.

މި ހާދިސާއާ ގުޅިގެން އެ ސަރަހައްދުގެ އާންމުން ވަނީ ކަރަންޓު ކުންފުންޏާ މެދު ވަރަށް ބޮޑަށް ނުރުހުން ފާޅުކޮށްފައެވެ. ސަބަބަކީ ގޭގޭގެ ބެލްކަންޏާއި ނުރައްކާތެރި މިންވަރަށް ކައިރިން ހައި-ޓެންޝަން ލައިންތައް އަޅާފައިވާތީ، އެކަން ރަނގަޅު ކޮށްދިނުމަށް އެދި މީގެ ކުރިން އެތައް ފަހަރަކު ޝަކުވާ ހުށަހަޅާފައިވީ ނަމަވެސް އެކަމަށް އެއްވެސް ފިޔަވަޅެއް އަޅާފައި ނުވާތީއެވެ.

ފުލުހުންނާއި 'ޑަޔަލް 112′ ގެ އިމަރޖެންސީ ޓީމުތަކުން މިހާރު ދަނީ މި މައްސަލަ އިތުރަށް ތަހުގީގު ކުރަމުންނެވެ.