ރަސްމާލެ މަޝްރޫއުގެ ދަށުން 500 ހެކްޓަރުގެ ބިން އީގަލް ހިލްސް ކުންފުންޏަށް ދިނުމަށް ވެފައިވާ އެއްބަސްވެފައިވާއިރު، ރަސްމާލެ މަޝްރޫއަކީ ފެށުނީއްސުރެ އޮޅުވާލުންތަކެއް އެކުލެވިގެންވާ ކަމެއް ކަމަށް އެމްޑީޕީގެ ކުރީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު ދެއްވައިފިއެވެ.

އިދިކޮޅު މައި ޕާޓީ، އެމްޑީޕީގެ ފަސް ވަނަ ކޮންގްރެސް ނިންމުމަށް ރޭ ބޭއްވި ޖަލްސާގައި ވާހަކަ ދައްކަވަމުން، އެ ޕާޓީގެ ރައީސްކަންވެސް ކުރިން ކުރެއްވި ޝާހިދު ވިދާޅުވީ ފުށިދިއްގަރުފަޅު ނުވަތަ ރަސްމާލެ އެއްބަސްވުމަކީ "ޑިސެޕްޓަސް އަބް އިނީޝިއޯ" ނުވަތަ އުފެދުމުގައި ވެސް ބޮޑެތި އޮޅުވާލުންތަކެއް އެކުލެވިގެންވާ މުއާމަލާތެއް ކަމަށެވެ. އަދި މިއީ ކުރީގެ ސަރުކާރެއްގައި މަޝްހޫރުވި "ވޮއިޑް އަބް އިނީޝިއޯ" އާ އެއްފަދަ އެއްމާބަނޑު ދެބެއިން ފަދަ ނުރައްކާތެރި ކަމެއްގެ ގޮތުގައި ސިފަކުރެއްވިއެވެ.

ރައީސް ޑރ. މުހައްމަދު މުއިއްޒުގެ ސަރުކާރުން ބޭރުގެ ފަރާތްތަކާއެކު ހަދާ އެއްބަސްވުންތަކުގައި ހާމަކަން ބޮޑު ސިޔާސަތެއް ނެތްކަން ފާހަގަކުރައްވައި ޝާހިދު ވިދާޅުވީ، ރަސްމާލެ މަޝްރޫއުގެ އަސްލު އެއްބަސްވުން ރައްޔިތުންނަށް ވަންހަނާ ކޮށްފައިވާ ކަމަށެވެ. އަދި އެ ފަޅު ހިއްކުމުގެ މަސައްކަތް ކުރިއަށް ގެންދިޔަ ގޮތާއި، އެކަމަށް ފައިސާ ހަރަދުކުރި ގޮތުގެ އިތުރުން ބިން ދޫކުރުމުގެ މުޅި މުއާމަލާތުގައިވެސް އޮތީ ބޮޑު އޮޅުވާލުމެއް ކަމަށް އޭނާ ތުހުމަތު ކުރެއްވިއެވެ.

"އެފަޅު ހިއްކުމުގައިވެސް، ފައިސާ ހަރަދުކުރި ގޮތުގައިވެސް އޮޅުވާލުން. ވެލި އެޅުމުގައިވެސް ހުރިހާ ކަމެއްގައިވެސް ބޮޑުތަނުން އޮޅުވާލުން. ދިން ގޮތްވެސް އެގްރީމެންޓްވެސް އޮޅުވާލީ،" ޝާހިދު ވިދާޅުވިއެވެ.

ޝާހިދު އިތުރަށް ފާހަގަކުރެއްވި ގޮތުގައި މިފަދަ ދޯހަޅި އަދި ދެފުށް ނުފެންނަ މުއާމަލާތްތަކުގެ ސަބަބުން، ރާއްޖެއަށް ދިގު މުއްދަތަކަށް އެހީތެރިވަމުން އަންނަ ގާތް އެކުވެރި ގައުމުތަކާ އޮންނަ ހާރިޖީ ގުޅުމަށާއި ބައިނަލްއަގުވާމީ އިތުބާރަށް ބޮޑެތި ލޮޅުންތަކެއް އަރައި، ގުޅުން ކެނޑިގެން ދިއުމުގެ ބިރު އެބައޮތެވެ.