ޕީއެންއެފްގެ ރައީސް، ރައީސް އަބްދުﷲ ޔާމިން، މިއަދު އައްޑޫ ސިޓީއަށް ވަޑައިގަތުމަށް ހަމަޖެހިއްޖެއެވެ.

އެމަނިކުފާނުގެ މިފަހަރުގެ ދަތުރުފުޅަކީ، ޕާޓީގެ މަސައްކަތް އަތޮޅުތެރެއަށް ފުޅާކޮށް ޕާޓީގެ މެމްބަރޝިޕު އިތުރު ކުރުމަށް ކުރަމުންދާ މަސައްކަތުގެ ތެރެއިން ކުރައްވާ ދަތުރުފުޅެކެވެ. ސިޔާސީ ގޮތުން އެމަނިކުފާނު ކުރައްވާ މި ދަތުރުފުޅުގައި، ޕީއެންއެފްގެ ޖަލްސާތަކެއްވެސް އައްޑޫގައި ބޭއްވުމަށް ހަމަޖެހިފައިވެއެވެ.

އޮކްޓޯބަރު 2 އިން 9 އަށް ކުރައްވާ މި ދަތުރުފުޅުގައި، އައްޑޫގެ ހުރިހާ ރަށަކަށްވެސް ރައީސް ޔާމީން ވަޑައިގަންނަވާނެއެވެ. ރައީސް ޔާމީން ވަޑައިގަންނަވާތީ ޕީއެންއެފްގެ އައްޑޫގެ މެމްބަރުން ގެންދަނީ ވަރަށް ފުރިހަމައަށް ތައްޔާރުވަމުންނެވެ.

ޕީއެންއެފުން ސިލްސިލާކޮށް ބާއްވަމުންދާ "ފްރޮންޓު އޮފީސް" ޖަލްސާ ފުރަތަމަ ފަހަރަށް މާލޭ ސަރަހައްދުން ބޭރުގައި ތިނަދޫ ސިޓީގައި ވަނީ ބާއްވާފައެވެ. އެއަށްފަހު ފުވަމުލަކު ސިޓީއަށް ވަޑައިގެން އެސީޓީގައިވެސް ވަނީ ޖަލްސާއެއް ބާއްވާފައެވެ.

ޔާމީނާ އެމްނިކުފާނުގެ އަރިސް ބޭފުޅުން އަދި އެ ޕާޓީގެ އެކްޓިވިސްޓުން އަންނަނީ ރައީސް މުޢިއްޒު އަށާއި އެމަނިކުފާނުގެ ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ. ޕީއެންއެފްގެ ޖަލްސާތަކުގައި ކެނޑިނޭޅި ޕީއެންސީއަށް ވަރަށް ބޮޑަށް ފާޑުކިޔުންތައް އަމާޒުކުރެއެވެ.