ރަސްމާލެއިން ބޭރުގެ ކުންފުންޏަކަށް ބިން ދޫކުރުމަށް ސަރުކާރުން ނިންމި ނިންމުމާ ގުޅިގެން ކަންބޮޑުވުންތަކެއް ހުރިތޯ ބެލުމަށް މައުލޫމާތު ސާފުކޮށް، ދިރާސާކުރަމުންދާ ކަމަށް ޢަދާލަތު ޕާޓީ އަދި ޖަމިއްޔަތުއްސަލަފުން ބުނެފިއެވެ.
ރަސްމާލެއިން ހިއްކާ 1010 ހެކްޓަރުގެ ބިމުގެ ތެރެއިން 500 ހެކްޓަރު 99 އަހަރުގެ މުއްދަތަށް އީގަލް ހިލްސް ކުންފުންޏަށް ދިނުމަށް ސަރުކާރުން ވަނީ ނިންމާފައެވެ. ބިދޭސީ މަހުޖަނުންނަށް އަމާޒުކޮށްގެން ހިންގާ އެ މަޝްރޫޢުގެ ދަށުން އެޕާޓްމަންޓްތައް ވިއްކުމުގެ މަސައްކަތް މިހާރު ވަނީ ފަށާފައެވެ.
މި މަޝްރޫއާ ގުޅިގެން ސަލަފް ޖަމިއްޔާގެ ތަރުޖަމާނު ހަސަން ފިކުރީ އެކްސްގައި ވިދާޅުވީ، ރަސްމާލޭގައި ސަރުކާރުން ހިންގަން އިއުލާނުކޮށްފައިވާ މޯލްޑިވްސް ވޯޓާ ފްރަންޓު އެންޑް މެރީނާ މަޝްރޫއުއާމެދު ކަންބޮޑުވުންތަކެއް ހުރިކަމަށް ފެންނާތީ، ސަރުކާރުގެ ކަމާބެހޭ ފަރާތްތަކާ ބައްދަލުކޮށްގެންނާއި އެހެނިހެން ގޮތްގޮތުން މައުލޫމާތު ސާފުކޮށް މަޝްރޫއު ދިރާސާ ކުރަމުންދާ ކަމަށެވެ.
ޢަދާލަތު ޕާޓީގެ ތަރުޖަމާނު ހުސައިން އަންސާރު ވެސް ވިދާޅުވީ، ރަސްމާލެ މަޝްރޫއު އާއި ރެޒިޑެންސީ ވިސާ އަދި ޓައުންޝިޕް ޕްރޮގްރާމާ ގުޅޭގޮތުން ސާފުކުރަންޖެހޭ މައުލޫމާތުތައް ސަރުކާރުގެ ފަރާތުން ހޯދަމުންދާ ކަމަށެވެ. އަދި މި މައުލޫމާތުތަކަށް ބަލައި ކަންބޮޑުވުންތަކެއް ހުރިނަމަ، އެކަމަށް އެކަށީގެންވާ ހައްލު ހޯދުމަށް ކަމާގުޅުންހުރި މުއައްސަސާތަކަށް ހުށަހަޅާނެ ކަމަށް ވިދާޅުވިއެވެ.
މި އެއްބަސްވުމުގެ ދަށުން ލީސް އެކުއިޒިޝަން ކޮސްޓެއް އަދި ކުއްޔެއް ނުނަގާ ގޮތަށް ބިން ދޫކޮށްފައިވާތީ ބައެއް ފަރާތްތަކުން ފާޑުކިޔުންތައް އަމާޒުކުރަމުންދާއިރު، ސަރުކާރުން ހާމަކުރަނީ މިއީ އާންމު އުސޫލުން ރިސޯޓުތައް ދޫކުރާ ގޮތަށް ހަމަޖެހިފައިވާ މުއާމަލާތެއް ކަމަށާއި މި އިންވެސްޓުމަންޓުގެ ސަބަބުން ރާއްޖެއަށް ބޮޑު އާމްދަނީއެއް ލިބިގެންދާނެ ކަމަށެވެ.
