ވ. އާރަށް ޓޫރިޒަމަށް ދޫކުރުމުގެ ތެރެއިން ރިޝްވަތުގެ ގޮތުގައި އެއް މިލިއަން ޑޮލަރު ނަގައި އެ ފައިސާ ލޯންޑާ ކުރި ކަމުގެ ކުށުގައި ކުރީގެ ރައީސް އަބްދުﷲ ޔާމީން އަބްދުލް ގައްޔޫމަށް ދައުލަތުން ކުރާ ދައުވާގައި، ޔާމީންގެ ދިފާއީ ހެކިންގެ ގޮތުގައި މާލޭގެ ކުރީގެ ޑެޕިއުޓީ މޭޔަރު އަދި މިހާރު ޔޫތު މިނިސްޓަރުގެ އެޑްވައިޒަރު އަހުމަދު ނަރީޝް އާއި ވިލިމާލެ ދާއިރާގެ މަޖިލިސް މެންބަރު މުހައްމަދު އިސްމާއީލް އާއި ހުޅުދޫ ދާއިރާގެ މަޖިލިސް މެންބަރު މުހައްމަދު ޝާހިދުގެ އިތުރުން އަބްދުﷲ ރަޝީދު ކިޔާ މީހެއްގެ ނަން ކުރިމިނަލް ކޯޓަށް މިއަދު ހުށަހަޅައިފިއެވެ.

އަހަރަކަށްފަހު ކުރިމިނަލް ކޯޓުގައި މިއަދު ބޭއްވި އާ ރަށު މައްސަލައިގެ އަޑުއެހުމުގައި ދިފާއީ ހެކިންގެ ގޮތުގައި ރައީސް ޔާމީންގެ ފަރާތުން އެ މީހުން ހުށެހެޅުއްވީ، މި މައްސަލައިގައި ވ. އާރަށް ކުއްޔަށް ދޫކުރުމުގެ މުއާމަލާތުގެ ތެރެއިން ރައީސް ޔާމީންގެ އެކައުންޓަށް ރިޝްވަތުގެ ގޮތުގައި ޖަމާވި ކަމަށް ދައުލަތުން ތުހުމަތު ކުރާ އެއް މިލިއަން ޑޮލަރަކީ، ޑޮލަރު މާރުކުރުމުގެ ފައިސާކަން ސާބިތު ކުރުމަށެވެ.

އެމީހުންގެ އިތުރުން ޑޮލަރު މާރުކުރިކަން ބަޔާންކޮށްދޭ ލިއުމެއް ވެސް ޔާމީންގެ ދިފާއުގައި ހުށަހެޅިއެވެ.

ވ. އާރަށް ޓޫރިޒަމަށް ދޫކުރުމުގެ ތެރެއިން ރިޝްވަތުގެ ގޮތުގައި އެއް މިލިއަން ޑޮލަރު ނަގައި އެ ފައިސާ ލޯންޑާ ކުރި ކަމުގެ ކުށުގައި 11 އަހަރަށް ޖަލަށްލައި ފަސް މިލިއަން ޑޮލަރުން ޖޫރިމަނާ ކުރުމަށް ޔާމީންގެ މައްޗަށް މީގެ ކުރިން ކުރިމިންލް ކޯޓުން ހުކުމް ކުރިއެވެ. އެއީ މަނީ ލޯންޑަރިންގެ ކުށުގެ ދައުވާގައި ހަތް އަހަރާއި ރިޝްވަތު ގަބޫލުކުރުމުގެ ކުށުގެ ދައުވާ ސާބިތުވެފައިވާ ކަމަށް ކަނޑައަޅައި، އިއްވި ހަތަރު އަހަރުގެ ޖަލު ހުކުމެކެވެ.

ނަމަވެސް ސުޕްރީމް ކޯޓުން އެ ހުކުމްތައް ބާތިލުކޮށް، އެ މައްސަލަ އަލުން ބަލަން ކުރިމިނަލް ކޯޓަށް އެންގިއެވެ.

އާރަށުގެ މައްސަލައިގައި ކުރިމިނަލް ކޯޓުގައި އަލުން ފަށާފައި ވަނީ ސުޕްރީމް ކޯޓުގެ ނިންމުމާ ގުޅިގެންނެވެ.

މި މައްސަލައިގައި ރައީސް ޔާމީންގެ މައްޗަށް ދައުވާ ކުރަނީ އެމްއެމްޕީއާރުސީ މެދުވެރިކޮށް ވ. އާރަށް ކުއްޔަށް ދިނުމުގައި ރިޝްވަތު ނަންގަވައި، ލިބިވަޑައިގެންނެވި ފައިސާ ލޯންޑަކުރެއްވި ކަމަށް ތުހުމަތުގައެވެ.