ރާއްޖޭގެ ތާރީޚުގައި ވެސް މިހާތަނަށް ގެންނަ އެންމެ ބިޔަ އިންވެސްޓްމަންޓް ހިންގާ ފަރާތުގެ ހައިސިއްޔަތުން، ދިވެހި ރައްޔިތުން އެ ކުންފުންޏަށް ފުރިހަމަ އިތުބާރެއް އެބައޮތް ކަމަށް ޔޫއޭއީގެ މަޝްހޫރު އީގަލް ހިލްސް ކުންފުނީގެ ޗެއާމަން މުހައްމަދު އަލައްބާރު ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރަސްމާލެ ތަރައްޤީ ކުރުމަށް ކުރިއަށްގެންދާ "މޯލްޑިވްސް ވޯޓާފްރޮންޓް އެންޑް މެރީނާ" މަޝްރޫއުގެ ދަށުން، އީގަލް ހިލްސްއާ އެކު މިހާރު ވަނީ ވިޔަފާރީގެ މައިގަނޑު އުސޫލުތައް ބަޔާންކުރާ ކޮމާޝަލް ޓާމްސް އެއްބަސްވުމެއްގައި ސޮއިކޮށްފައެވެ. މި މަޝްރޫއު ތަންފީޒު ކުރުމަށްޓަކައި ރަސްމާލެއިން 500 ހެކްޓަރުގެ ބިން އެ ކުންފުންޏަށް ދިނުމަށް ނިންމާފައިވާއިރު، ރާއްޖޭގެ ސިޔާސީ ބައެއް އިސް ފަރާތްތަކުން އަންނަނީ މި އެއްބަސްވުމާ ގުޅޭގޮތުން ކަންބޮޑުވުން ފާޅުކުރަމުންނެވެ.

މި މަޝްރޫއު ފުރިހަމަވުމުން ރަސްމާލެ ފެނިގެންދާނެ ހިތްގައިމު ގޮތް ދައްކުވައިދޭ އޭއައި (އާޓިފިޝަލް އިންޓެލިޖެންސް) ވީޑިއޯއަކާ އެކު އިންސްޓަގްރާމްގައި ހިއްސާކުރެއްވި މެސެޖެއްގައި އަލައްބާރު ވިދާޅުވީ، ދިވެހިރާއްޖޭގައި މިފަދަ ބޮޑު މަސައްކަތެއް ކުރުމުގެ ފުރުސަތު ލިބުމަކީ އެ ކުންފުންޏަށް ލިބުނު ވަރަށް ބޮޑު ޝަރަފެއް ކަމަށެވެ. އަދި ދިވެހިން ކުރާ އުންމީދުތައް ހަގީގަތަކަށް ހަދައިދިނުމަށް އެންމެ ފުރިހަމައަށް މަސައްކަތް ކުރައްވާނެ ކަމުގެ ޔަގީންކަން ވެސް އޭނާ ދެއްވިއެވެ.

މާތް ﷲ ގެ ހެޔޮ ތައުފީގަށް އެދިވަޑައިގަންނަވަމުން އަލައްބާރު ފާހަގަކުރެއްވި ގޮތުގައި، ރާއްޖޭގެ ތާރީޚުގައި ވެސް ނުދެކޭ ފަދަ ބޮޑު އިންވެސްޓްމަންޓަކާ އެކު ދިވެހިން އެ ކުންފުންޏަށް ކުރާ އިތުބާރަކީ އަގުނުކުރެވޭ ފަދަ މަތިވެރި އިތުބާރެކެވެ.

މީގެއިތުރުން، މި މަޝްރޫއުގެ ތަސައްވުރު ހާމަކުރައްވަމުން އޭނާ ވިދާޅުވީ، ރަސްމާލޭގައި ތަރައްޤީ ކުރަނީ ހަމައެކަނި އިމާރާތްތަކެއް ނޫން ކަމަށާއި، އެއީ ޒަމާނީ އަދި ފުރިހަމަ ދިރިއުޅުމުގެ ވައްޓަފާޅިއެއް ކަމަށެވެ. އަދި އެ ސަރަހައްދުން ޕްރޮޕަޓީ ބައްލަވައިގަންނަ ފަރާތްތަކަށް މުޅި ދުނިޔޭގެ ނިސްބަތުން ވެސް ލިބޭނެ އެންމެ ރަނގަޅު މާލީ މަންފާއާއި ފައިދާ ކަށަވަރުވެގެންދާނެ ކަމަށް ވެސް އަލައްބާރު ވިދާޅުވިއެވެ.