ޑިއުޓީ ނިންމާލުމަށް ފަހު ގެއަށް އައިސް، ލައިގެން ހުރި ސިފައިންގެ ޔުނީފޯމު ބަދަލުކޮށްލަން ވެސް ހަނދާން ނެތޭހާ އެ ބައްޕަ ކެތްމަދުވެ އެވެ. ދުވެފައި ގޮސް އިށީންނަނީ ލޯބިވާ ދަރިފުޅުގެ ކައިރީގަ އެވެ. ކޮންމެ ދުވަހަކު ވެސް އާ ހުނަރެއް، އާ ފިލާވަޅެއް އުނގަންނައިދިނުމަކީ ހުސައިން ސިނާންގެ ދިރިއުޅުމުގެ އެންމެ ފޮނި އުފަލެވެ. އެ ދެބަފައިން ބަދަލުކޮށްލާ ކޮންމެ ޖުމުލައަކީ ވެސް ލޯތްބާއި އުނގެނުމުގެ ރަންގަނޑެކެވެ. ފިލާވަޅެއް އުނދަގޫވެއްޖެ ނަމަ، އެކަން ސަމާސާ ކުޅިވަރަކަށް ބަދަލުކޮށްލަ އެވެ. ގުރުއާނުގެ މާތް އާޔަތްތައް ހިތުދަސްކުރުމުގައި 'ޕޮމޮޑޯރޯ ޓެކްނީކް' ބޭނުންކުރަމުން ދިޔަ އެ ދެބަފައިންގެ ދުނިޔެއަކީ، ލޯތްބާއިކުލުނުން ފުރިބަންޑުންވަމުން ދިޔަ ހިތްގައިމު ބަގީޗާއެކެވެ.

ނަމަވެސް، ތަގުދީރުގެ ނިޔާ ވަރަށް އަވަހަށް ކުރިމަތިލީ ހިތް ކުދިކުދިކޮށްލާފަ އެވެ. އެ އުފާވެރި ހިނިތުންވުންތަކުގެ މައްޗަށް ކަޅު ވިލާގަނޑެއް ވެރިވީ މީގެ މަދު ދުވަސްކޮޅެއް ކުރިންނެވެ. މިދިޔަ ހޮނިހިރު ދުވަހުގެ ރޭ ހުޅުމާލޭގައި ހިނގި ހިތްދަތި، ނުރައްކާތެރި އެކްސިޑެންޓެއްގައި ސިނާންގެ ފުރާނަ ފަދަ 9 އަހަރުގެ ދަރިފުޅު، ޒީވާ ސިނާން އަހުމަދު މި ދުނިޔެއަށް އަލްވަދާއު ކިޔެވެ. އެ ލޯބިވާ ދަރިފުޅު ވަކިވެގެން ދިޔައީ ބައްޕަގެ ދިރިއުޅުމުގެ ހުރިހާ އުފާތަކާއި، ދިރުމެއްފަދަ ހިތްހަމަޖެހުން ވެސް ފުން އަނދަވަޅަކަށް ވައްޓާލުމަށް ފަހުގަ އެވެ.

އެހެން ނަމަވެސް، ލޯބިވާ ދަރިފުޅުގެ ފުރާނަ ނެތް މަސްގަނޑު ހުދު ކަފުނުގައި އޮޅާލައި، ފަސްއަޅައި ވަޅުލުމަށް ފަހު، މި ދިގު، އަނދިރި ރެއާ ސިނާން ކުރިމަތިލީ ކެތްތެރިކަމާ އެކުގަ އެވެ. ހިތުގައި އެއްވެސް ޝަކުވާއެއް ނެތެވެ. އެ ހިތް ފުރިފައިވަނީ ދަރިފުޅު ދީފައި ދިޔަ ލޯތްބާއި، އަގުނުކުރެވޭ ހަނދާންތަކުންނެވެ. ދަރިފުޅާއެކު ނަގާފައިވާ ހަނދާނީ ފޮޓޯތައް މީސްމީޑިއާގައި ހިއްސާކުރަމުން، ފަހުރުވެރިކަމާއި ކަރުނައިގެ ތެރެއިން އެ ބައްޕަ ކިޔައިދިނީ ޒީވާގެ ރީތި ސިފަތަކެވެ.

"ހިތްވަރުގަދަ ކުއްޖެއްގެ އިތުރުން، ޒީޒީއަށް ދެއްވާފައިވަނީ ބޮޑު ހިތެކެވެ. އޭނާގެ ކޮއްކޮމެންނާ މެދު އިންތިހާއަށް ފަހުރުވެރިވެ އެވެ. އޭނާ ރާޒުވާ ކުޅޭ ހިތްވެ އެވެ. ދޫފުރޮޅިތަކުން ބައްޕަ ބަލިކޮށްލަން އުޅެ އެވެ. އޭނާގެ ތޮބީއަތުގައިވި އޯގާތެރިކަމާ އެއްގޮތަށް، މެޑިސިން ކިޔަވަން އުއްމީދު ކުރި އެވެ،" ފުން އަސަރާއެކު ސިނާން ލިޔެފައިވެ އެވެ.

އެ ދެބަފައިން ހޭދަކުރި ކޮންމެ ވަގުތަކީ މިއަދު އެ ބައްޕަގެ ހިތުގައި ބިންވަޅު ނެގިފައިވާ ރިހުމެކެވެ. ބައްޕަ ކައިރިއަށް އަންނަ ކޮންމެ ފަހަރަކު ލޯބިން ކައްކައިދޭ ކުކުޅު ރިހަ އެވެ. ދަރިފުޅަށް ތައްޔާރުކޮށްދޭ “ސަނީސައިޑް އަޕް” ބިސްގަނޑެވެ. ގަޔާވާ ރެސްޓޯރަންޓަކަށް ގޮސް، ޒީވާ އޭނާ އެންމެ ކާހިތްވާ ކުކުޅާއި ބަތް އަދި ބައްޕަ ބާގާއެއް ކައިލި މަޖާ ވަގުތުތަކެވެ. ސިނާން ބުނިގޮތުގައި، ކާއެއްޗެއް ކާލަން މަޑުކޮށްލާ ވަރަށް ވުރެ ވެސް ދަރިފުޅުގެ ހިތުގައި ދިރިއުޅުމަށް އޮތް ޝައުގުވެރިކަން މާ ބޮޑެވެ. ޒީވާ ކުއްލިއަކަށް ވަކިވެގެން އެ ދިޔައީ، ދެބަފައިން އެކުގައި ލާމު އަތޮޅަށް އުނގެނުމުގެ ރީތި ދަތުރެއް ދާން ރާވާފައި އޮއްވަ އެވެ.

ދިރިއުޅުމުގެ ހާލަތު ބަދަލުވެ، ހުޅުމާލެއަށް ބަދަލުވާން ޖެހުމުން އެކަމާ ޒީވާ ކުރިން ޝަކުވާކޮށް، ބައްޕަ ދެކެ ރުޅިއައިސްފައި ހުރި ދުވަސްތައް ވެސް ސިނާން ހަނދާންކުރީ ލޯތްބާއެކުގަ އެވެ. އެ ދަރިފުޅާ ވަކިން ނޫޅެވިގެން، ހުޅުމާލެއިން ވަކި ގެއެއް ހޯދައި، ބައްޕަގެ އޯގާތެރިކަން އަބަދުވެސް ލިބޭނެ މަގު ތަނަވަސްކޮށްދިނެވެ. ފަހުން ވިސްނުން ފުރިހަމަވެގެން ދިޔަ ދަރިފުޅު ބުނި ޖުމުލަތައް ސިނާންގެ ކަންފަތުގައި އަދިވެސް ގުގުމަ އެވެ: "ބައްޕާ، ކުރިން އަހަރެން ހީކުރީ ފިރިހެންކުދިންނަކީ ގޯސް ބައެއް ކަމަށް، ހާއްސަކޮށް ބައްޕަ. މައާފްކުރޭ ބައްޕާ. ބޮޑުވާ ވަރަކަށް މިހާރު އެހެންނެއް ނުދެކެން. ބައްޕައަކީ ރަނގަޅު މީހެއް."

މިއަދު އެ އަޑެއް ނެތެވެ. އެ ހިނިތުންވުމެއް ނެތެވެ. އެކަމަކު އެ ބައްޕަގެ ހިތް ވަނީ ދަރިފުޅު ދިން ލޯބިން ފުރިފަ އެވެ. އެއީ އޭނާގެ ހަޔާތުގައި އައި އެންމެ އުފާވެރި އަހަރުތަކެވެ. ސިނާން އޭނާގެ ޒީވާ ސިފަކުރީ، ކޮންމެ ބައްޕައަކު ވެސް ދުނިޔެއިން އެންމެ އެދޭނެ ފަދަ، މަޑުމައިތިރި، އޯގާތެރި، އަދި ހުވަފެންތަކުން ފުރިގެންވި ފުރިހަމަ ދަރިއެއްގެ ގޮތުގަ އެވެ.
ހޮސްޕިޓަލުގެ ފަހު ވަގުތުކޮޅުގެ އަސަރުގަދަ މަންޒަރު ސިފަކުރަމުން ސިނާން ލިޔެފައިވެ އެވެ:

"މޮނީޓަރުން އަރަމުން ދިޔަ ރޮނގުތައް ސީދާވެ، މިއަށް ވުރެ ރަނގަޅު މަންޒިލަކަށް ދަތުރު ފެށުމާއެކު މި ބައްޕަ ފަހުރުވެރިކަމާއެކު ދަރިފުޅު ގާތުގައި ހުރީމެވެ. ދަރިފުޅު ދުނިޔޭގައި ހުރި އިރު ވެސް ބައްޕަ ހުރި ގޮތަށެވެ. އެ ވަގުތު އެންމެންނަށް ހިނިތުންވެލީމެވެ. ބައްޕަގެ މޫނު ހެކިދޭނެ އެވެ: ތިއީ ބައްޕަގެ ދަރިފުޅު، ޒީވާ ސިނާން އަހުމަދެވެ. ދަރިފުޅު ބައްޕައަށް ހާދަ ކަންތައްތަކެއް ދަސްކޮށްދީފި އެވެ. އަދި ދަރިފުޅާ އެކު ހޭދަކުރި ކޮންމެ ވަގުތަކާ މެދު ބައްޕަ މިހުރީ ފުދިގެންނެވެ."