ފީފާ ވޯލްޑް ކަޕްގެ ރައުންޑް އޮފް 16 ގައި އިތުރު ވަގުތުގައި ބަދަލު ކުޅުންތެރިޔާ މިކެލް މެރީނޯ ޖެހި ގޯލުން 1-0 އިން ޕޯޗުގަލް ބަލިކޮށް، އެންމެ ފަހުގެ ޔޫރޯ ޗެމްޕިއަނުން ކަމަށްވާ ސްޕެއިން ކުއާޓާ ފައިނަލަށް ދަތުރުކޮށްފިއެވެ. މި ނަތީޖާއާ އެކު އުމުރުން 41 އަހަރުގެ ކްރިސްޓިއާނޯ ރޮނާލްޑޯގެ ވޯލްޑް ކަޕް ކެރިއަރު ވަނީ ނިމުމަކަށް އައިސްފައެވެ.
ދާދި ހަމަހަމަކޮށް ފެށި މެޗުގެ ފުރަތަމަ ހާފުގައި ސްޕެއިންގެ ލަމީން ޔަމާލް އާއި އެލެކްސް ބައޭނާ ވަނީ ޕޯޗުގަލްގެ ގޯލާ އަމާޒުކޮށް ނުރައްކާތެރި ހަމަލާތަކެއް ފޮނުވާލައިފައެވެ. ނަމަވެސް ޕޯޗުގަލްގެ ގޯލްކީޕަރު ޑިއޯގޯ ކޮސްޓާ ވަނީ ހުށިޔާރުކަމާ އެކު އެ ހަމަލާތައް ދިފާއުކޮށްފައެވެ. ހައިޑްރޭޝަން ބްރޭކަށް ފަހު ޕޯޗުގަލް ކުޅުން ރަނގަޅުކުރި އިރު، ރޮނާލްޑޯ ފޮނުވާލި ބޯޅައެއް ސްޕެއިންގެ ކީޕަރު އުނައި ސިމޮން ދިފާއުކުރިއެވެ. އަދި ނޫނޯ މެންޑޭޒްގެ ހަމަލާއެއް ވަނީ ހުރަސް ދަނޑިއަށް އަމާޒުވެފައެވެ.
ދެވަނަ ހާފުގެ ކުރީކޮޅު ޕޯޗުގަލްގެ އެޓޭކްތައް ވަރުގަދަކޮށް ފެނުނު ނަމަވެސް، ފަހު 15 މިނިޓަށް ފެރާން ޓޮރޭޒް ކުޅެން ނުކުތުމާ އެކު ސްޕެއިނުން ޕްރެޝަރު ބޮޑުކުރިއެވެ. މެރީނޯ ގޯލު ޖެހީ ކުޅެން ނުކުތްތާ ހަ މިނިޓު ފަހުން، މެޗުގެ 90+1 ގައި ފެރާން ޓޮރޭޒް ދިން ތުރޫ ޕާސް ހޯދައި ގޯލަށް ފޮނުވާލައިގެންނެވެ. އެންމެ ފަހު ވަގުތު ޕޯޗުގަލް ނަތީޖާ ހަމަހަމަ ކުރަން ކުރި މަސައްކަތުން ބެނާޑޯ ސިލްވާ ބޮލުން ފޮނުވާލި ބޯޅަ ދިޔައީ ހުރަސް ދަނޑި ކައިރިން ބޭރަށެވެ.
ރޮނާލްޑޯ ވަނީ 2006 އިން ފެށިގެން ޖެހިޖެހިގެން ހަ ވޯލްޑް ކަޕްގައި ކުޅެ، ހަ ވޯލްޑް ކަޕްގައި ލަނޑު ޖެހި ހަމައެކަނި ކުޅުންތެރިޔާގެ ޝަރަފް ހޯދައިފައެވެ. އޭނާގެ ކެޕްޓަންކަމުގައި ޕޯޗުގަލް އަށް ޔޫރޯ އަކާއި ދެ ނޭޝަންސް ލީގު ކާމިޔާބުކޮށްދީފައިވެއެވެ. ވޯލްޑް ކަޕް ކެރިއަރު ނިމުނު ނަމަވެސް ގައުމީ ޓީމަށް ކުޅުން ކުރިއަށް ގެންދާނެ ކަމަށް ބެލެވެއެވެ.
ސްޕެއިން ވަނީ 2010 ގެ ވޯލްޑް ކަޕްގައި ވެސް ހަމަ މި ނަތީޖާއިން ޕޯޗުގަލް ބަލިކޮށްފައެވެ. ކުއާޓާ ފައިނަލްގައި ސްޕެއިން ނުކުންނާނީ ޔޫއެސްއޭ އާއި ބެލްޖިއަމް ބައްދަލުކޮށް މޮޅުވާ ޓީމަކާ ދެކޮޅަށެވެ.
