ވެރިކަމަށް އައުމަށް ރައްޔިތުންނަށް ވީވައުދުތައް ނުފުއްދައި، ޤާނޫނާ ޚިލާފު އަނިޔާވެރިކަން އިސްކުރާނަމަ، ރައްޔިތުން މަގުތަކަށް ނިކުމެ އިހްތިޖާޖު ކުރާނެ ކަމަށް އިދިކޮޅު އެމްޑީޕީގެ ރައީސް އަދި ކުރީގެ ފޮރިން މިނިސްޓަރު ޢަބްދުﷲ ޝާހިދު ވިދާޅުވެއްޖެއެވެ.
ޝާހިދު މިހެން ވިދާޅުވީ، ރޭ މާލޭގައި އެމްޑީޕީން ކުރިއަށްގެންދިޔަ އިހްތިޖާޖުގެ ތެރެއިން އެ ޕާޓީގެ ބައެއް މީހުން ހައްޔަރުކުރުމާ ގުޅިގެން ސަރުކާރަށް ފާޑުވިދާޅުވަމުންނެވެ.
އޭނާ ވިދާޅުވީ، އިހްތިޖާޖަށް ނިކުންނަ ރައްޔިތުންގެ އަޑު ކަނޑުވާލުމަށްޓަކައި ސަރުކާރުން ކިތަންމެ ވަރުގަދަ ފިޔަވަޅުތަކެއް އެޅި ނަމަވެސް، ރައްޔިތުންގެ ޝުޢޫރުތަކާއި އަޑުތައް ހުއްޓުވައި ނުލެވޭނެ ކަމަށެވެ. އަދި ސަރުކާރަށް ތާއީދުނުކުރާ ކޮންމެ މީހަކު ހިފާ ހައްޔަރުކޮށްގެން ވެރިކަން ދެމެހެއްޓޭނެ ކަމަށް ގަބޫލުކުރުމަކީ ބޮޑު ކުށްހީއެއް ކަމަށްވެސް ޝާހިދު ސިފަކުރެއްވިއެވެ.
ރޭގެ އިހްތިޖާޖުގެ ތެރެއިން ފުލުހުންގެ ބެލުމުގެ ދަށަށް ގެންގޮސްފައިވާ އެމްޑީޕީގެ ޤައުމީ މަޖިލީހުގެ މެންބަރު މާނިއު ޙުސައިންނާއި، ޙުސައިން ޙަސަންގެ އިތުރުން ޙަލީމަތު ޒުހައިރާ ވަގުތުން ދޫކޮށްލުމަށް ޝާހިދު ވަނީ ގޮވާލައްވާފައެވެ.
މީގެ އިތުރުން، ސުލްހަވެރިކަމާއެކު ހިންގާ ސިޔާސީ ހަރަކާތްތަކަށް ހުރަސްނޭޅުމަށާއި، ޑިމޮކްރެޓިކް ހަމަތަކުގެ މަތިން ރައްޔިތުންނަށް ޚިޔާލު ފާޅުކުރުމުގެ ފުރުޞަތު ދިނުމަށް ވެސް އޭނާ ސަރުކާރަށް އިލްތިމާސް ކުރެއްވިއެވެ.
މި ފަހަކަށް އައިސް މާލޭގެ މަގުތަކުގައި ސަރުކާރާ ދެކޮޅަށް ކުރާ އިހްތިޖާޖުތައް އިތުރުވެފައިވާއިރު، އިދިކޮޅު ފަރާތްތަކުން ތުހުމަތުކުރާ ގޮތުގައި މިހާރުގެ ސަރުކާރުން ދަނީ ސިޔާސީ ހަރަކާތްތަކަށް ހުރަސްއަޅައި، ޚިޔާލުފާޅުކުރުމުގެ މިނިވަންކަން ހަނިކުރަމުންނެވެ.
