އެމްޑީޕީގެ އެތެރޭގެ އިންތިހާބުގެ ތާވަލު ބަދަލުކުރުމަށްޓަކައި ވާދަވެރި ކެންޑިޑޭޓް، ކުރީގެ ރައީސް މުހައްމަދު ނަޝީދުގެ ޓީމުން ސިވިލް ކޯޓަށް މައްސަލަ ހުށަހެޅުމަކީ އެ ޕާޓީގެ އަސާސީ ސިފަތަކާ ހިލާފު، ބީރައްޓެހި އަމަލެއް ކަމަށް އެމްޑީޕީގެ ޗެއާޕާސަން ކަމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމް މިއަދު ސިފަކުރައްވައިފިއެވެ.

މިއަދު އެމްޑީޕީގެ މައި ހަރުގޭގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މީކާއީލް ވިދާޅުވީ، އެމްޑީޕީއަކީ އަބަދުވެސް ވޯޓުން އިންސާފުވެރިކަމާއެކު ކަންކަން ނިންމާ ޕާޓީއެއް ކަމަށެވެ. ނަމަވެސް ޕާޓީގެ އެތެރޭގެ ކަންކަން ނިންމުމަށް ކޯޓުތަކަށް ދިއުމަކީ ޕާޓީގެ މަސްލަހަތު ނަގާލުން ކަމަށް އޭނާ ވިދާޅުވިއެވެ.

"އަޅުގަނޑު ވާދަވެރި ޓީމަށް ގޮވާލަން ކޯޓް މެދުވެރިކޮށް ޕާޓީގެ އަގު ވައްޓާނުލައި ވޯޓުން މިކަން ނިންމުމަށް،" މީކާއީލް ވިދާޅުވިއެވެ.

އިންތިހާބުގެ ވޯޓާސް ލިސްޓު އާންމުކޮށްފައި ވަނިކޮށް ކޯޓަށް ދިއުމާމެދު ކަންބޮޑުވުން ފާޅުކުރައްވަމުން މީކާއީލް ވިދާޅުވީ، އިންތިހާބު ކުރިއަށްދާންވާނީ ކުރިން ކަނޑައަޅާފައިވާ ސުންގަނޑިތަކާ އެއްގޮތަށް ޖޫން 12 ގައި ކަމަށެވެ. އޭނާ ވިދާޅުވީ މެޗު ކުޅެން ފަށާފައި ގޯލް ޕޯސްޓް ބަދަލުކުރުމަކީ ގަބޫލުކުރެވޭނެ އުސޫލެއް ނޫން ކަމަށާއި، 2013 ވަނަ އަހަރު އިންތިހާބުގެ ގޯލް ޕޯސްޓާ ކުޅުނު ކުޅުމާ ދެކޮޅަށް އެމްޑީޕީން މަގުމައްޗަށް ނިކުތީ މި ސިފަތައް ނެގެހެއްޓުމަށް ކަމަށެވެ.

މީކާއީލް އިތުރަށް ތުހުމަތުކުރެއްވި ގޮތުގައި، އިންތިހާބު ފަސްކުރަން އުޅޭ މައިގަނޑު ސަބަބަކީ ވަކި ބަޔަކަށް ޖާގަ ހުޅުވައިދިނުމެވެ. އެގޮތުން އިދިކޮޅު ޓީމުން ވެރިކަން ކުރާ ޕީއެންސީއާ ގުޅިގެން އެމްޑީޕީގެ މެންބަޝިޕް ދަފްތަރު ގަޑުބަޑުކުރަން މަސައްކަތް ކުރާ ކަމަށް އޭނާ ތުހުމަތުކުރެއްވިއެވެ. އަދި ޕާޓީގެ މާލީ ހާލަތު ދަށްވި ނަމަވެސް، އަސާސީ އިންތިހާބުތައް ފަސްނުކުރެވޭނެ ކަމަށް މީކާއީލް ވިދާޅުވިއެވެ.

އއ. އަތޮޅަށް ކުރެއްވި ކެމްޕެއިން ދަތުރާ ގުޅޭގޮތުން މީކާއީލް ވިދާޅުވީ، 2023 ވަނަ އަހަރު ޕާޓީގެ ވެރިކަން ގެއްލުވާލި ގޮތާމެދު އާންމު މެންބަރުން ތިބީ ވަރަށް ބޮޑަށް ހިތުގައި ޖެހިފައި ކަމަށެވެ. ނަމަވެސް 2028 ވަނަ އަހަރުގެ އިންތިހާބު ކާމިޔާބު ކުރެވޭނީ ޕާޓީ އެކަތިގަނޑެއްގެ ގޮތުގައި އޮވެގެންކަން މެންބަރުން ގަބޫލުކުރާ ކަމަށް އޭނާ ވިދާޅުވިއެވެ.
މީކާއީލް ފާހަގަކުރެއްވި ގޮތުގައި އާންމު މެންބަރުން މިހާރު ބޭނުންވަނީ ހުރިހާ ބޭފުޅުންނަށް ހަމަހަމަ ފުރުސަތު އޮންނާނެ ފަދަ "ނިއުޓްރަލް" ޗެއާޕާސަނެކެވެ. "އިތުބާރު" ކެމްޕެއިންގެ ފަރާތުން ކުރިއަށް އޮތް ހަފްތާގައި ރ. އަތޮޅާއި ޅ. އަތޮޅަށް ދަތުރުކޮށް، ކެމްޕެއިންގެ މެނިފެސްޓޯ ލޯންޗުކުރުމަށް ވަނީ ނިންމާފައެވެ.