އެމްޑީޕީގެ ޗެއާޕާސަން ހޮވުމަށް ބާއްވާ އިންތިހާބު ފަސްކޮށް، އިންތިގާލީ މަރުހަލާއެއްގައި ޕާޓީ ހިންގުމަށް ހުށަހެޅިފައިވާ ދަނޑިވަޅެއްގައި، އެ މަގާމާ ވަގުތީގޮތުން ހަވާލުވެވަޑައިގަންނަވަން ތައްޔާރަށް ހުންނެވިކަން ކުރީގެ ރައީސް މުހައްމަދު ނަޝީދު ހާމަކުރައްވައިފިއެވެ.
މިކަމާ ގުޅޭ މަޝްވަރާތައް ފެށުނީ އެމްޑީޕީގެ މިހާރުގެ ވަގުތީ ޗެއާޕާސަން އަބްދުލްޣަފޫރު މޫސާ، ޕާޓީގެ އެތެރޭގެ މަސްލަހަތު ހިފެހެއްޓުމަށާއި މާލީ ދަތިތަކުގެ ސަބަބުން އިންތިހާބު ފަސްކުރުމަށް ގައުމީ މަޖިލީހަށް ހުށަހެޅުއްވުމާ ގުޅިގެންނެވެ. ޣަފޫރު ލަފާދެއްވީ އިންތިހާބު ފަސްކުރުމަށްފަހު، "އިންޓެރިމް އެރޭންޖްމަންޓެއް" ނުވަތަ ވަގުތީ އިންތިޒާމެއްގެ ދަށުން ޕާޓީ ކުރިއަށް ގެންދިއުމަށެވެ.
ޣަފޫރުގެ މި ހުށަހެޅުއްވުމާ ގުޅިގެން، ރައްޔިތުންގެ މަޖިލީހުގެ މަކުނުދޫ ދާއިރާގެ ކުރީގެ މެންބަރު މުހައްމަދު ރާއީ ވަނީ، ޕާޓީގެ އިސް ލީޑަރުންނާއި ގައުމީ މަޖިލީހުން އެދޭ ނަމަ، ކުރިއަށް އޮތް ރިޔާސީ ޕްރައިމަރީއާ ހަމައަށް ވަގުތީ ޗެއާޕާސަންކަމާ ރައީސް ނަޝީދު ހަވާލުވެވަޑައިގަތުމަށް ހުށަހަޅުއްވާފައެވެ. މި ހުށަހެޅުމަށް ޖަވާބު ދެއްވަމުން ރައީސް ނަޝީދު ވިދާޅުވީ، ގައުމީ މަޖިލީހުން އެދޭ ނަމަ އެ މަގާމާ ހަވާލުވެވަޑައިގަތުމަށް އެމަނިކުފާނުގެ އެއްވެސް އިއުތިރާޒެއް ނެތް ކަމަށެވެ.
ޗެއާޕާސަންގެ މަގާމަށް މިހާރު ކުރިމަތިލައްވާފައިވަނީ ރައީސް ނަޝީދުގެ އިތުރުން ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމެވެ. ކުރިން ވާދަކުރައްވާނެ ކަމަށް އިއުލާންކުރެއްވި އަލްހާން ފަހުމީ ވަނީ ނަން އަނބުރާ ގެންދަވާފައެވެ. އިންތިހާބު ފަސްކުރުމުގެ ވާހަކައަށް މީކާއީލް ވަނީ ވަރަށް ބޮޑަށް ދެކޮޅު ހައްދަވާފައެވެ.
މީގެ އިތުރުން، އެމްޑީޕީގެ އިސްތިއުނާފު ފަނޑިޔާރުންގެ މަޖިލީހުގެ ރައީސް އަހުމަދު އަބްދުﷲ އަފީފު ވަނީ، އޭނާއަށް އެންގުމެއް ނެތި އިންތިހާބުގެ ކަންކަން ނިންމުމަކީ އަސާސީ ގަވާއިދާ ހިލާފު ކަމެއް ކަމަށް ވިދާޅުވެ، މިހާރު އިއުލާންކޮށްފައިވާ ޓައިމްލައިން ބާތިލުކުރަން އަންގަވާފައެވެ.
އެމްޑީޕީގެ ޗެއާޕާސަންގެ އިންތިހާބު ފަސްކުރަން ހުށަހެޅި މިއީ ދެވަނަ ފަހަރެވެ. މީގެ ކުރިން މިދިޔަ ޑިސެމްބަރު މަހުވެސް ވަނީ ލޯކަލް ކައުންސިލް އިންތިހާބަށް ފަހު އިންތިހާބު ބާއްވާ ގޮތަށް ފަސްކޮށްފައެވެ.
