އިދިކޮޅު މައި ސިޔާސީ ޕާޓީ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ އެތެރޭގެ ހިންގުން ހަރުދަނާކޮށް، މެންބަރުންގެ އިތުބާރު އަލުން ހޯދުމުގެ އަމާޒާއެކު ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމްގެ "އިތުބާރު" ކެމްޕޭން މިއަދު ފަށައިފިއެވެ
.ނޫސްވެރިންގެ ބައްދަލުވުމެއްގައި ކެމްޕޭން ލޯންޗުކޮށްދެއްވަމުން މީކާއިލް ވިދާޅުވީ، ޕާޓީގެ ލީޑާޝިޕާއި އާންމު މެންބަރުންނާ ދެމެދު އޮތް ގުޅުން ކުޑަވުމަކީ ކުރިމަތިވެފައިވާ ބޮޑު ގޮންޖެހުމެއް ކަމަށެވެ. އެހެންކަމުން، އޭނާގެ ޗެއާޕާސަން ކަމެއްގައި އެންމެ އިސްކަމެއް ދެއްވާނީ ޕާޓީގެ ގްރާސްރޫޓް މެންބަރުންގެ އަޑު އަހައި، އެ މެންބަރުން ބޭނުންވާ ގޮތަށް ޕާޓީގެ މިސްރާބު ބަދަލުކުރުމަށް ކަމަށް ވިދާޅުވިއެވެ.
މީކާއިލްގެ ވާހަކައިގައި، 2028 ވަނަ އަހަރުގެ ރިޔާސީ އިންތިހާބު ކާމިޔާބު ކުރުމުގެ މުހިންމުކަން ފާހަގަކުރެއްވިއެވެ.
"އަޅުގަނޑުގެ ހިތުގައި އެއްވެސް ޝައްކެތް ނެތް މި އިންތިހާބު ކާމިޔާބު ކުރާނީ 'އިތުބާރު' ކެމްޕޭން ކަމާމެދު. އަދި އަޅުގަނޑުގެ ޗެއާޕާސަން ކަމުގައި 2028 ގެ ރިޔާސީ އިންތިހާބު އަޅުގަނޑުމެން ކާމިޔާބު ކުރާނަން،" އޭނާ ވިދާޅުވިއެވެ.
މި އިންތިހާބުގައި މީކާއިލް ވާދަކުރައްވަނީ ޕާޓީގެ ވަރުގަދަ "ބެކިން" އަކާއެކުގައެވެ. އޭނާ ހާމަކުރެއްވި ގޮތުގައި ކުރީގެ ރައީސް އިބްރާހިމް މުހައްމަދު ސޯލިހާއި، ޕާޓީގެ ރައީސް އަބްދުالله ޝާހިދުގެ އިތުރުން ކުރީގެ ނައިބު ރައީސް ފައިސަލް ނަސީމާއި ޕާލިމެންޓްރީ ގްރޫޕްގެ ގިނަ މެންބަރުންގެ ތާއިދު އޭނާއަށް އެބައޮތެވެ.
މި މަގާމަށް މީކާއިލްގެ އިތުރުން ދެން ވާދަކުރައްވަނީ ކުރީގެ ރައީސް މުހައްމަދު ނަޝީދު އާއި އަލްހާން ފަހުމީއެވެ.
މީކާއިލްއަކީ 2012 ވަނަ އަހަރުން ފެށިގެން އެމްޑީޕީގެ ސިޔާސީ ހަރަކާތްތަކުގައި އިސްކޮށް އުޅުއްވާ ބޭފުޅެކެވެ. ޒުވާނުންގެ ހިތްވަރުގެ ރައީސްކަން ކުރެއްވުމުގެ އިތުރުން، އޭނާއަކީ 2024 ވަނަ އަހަރުގެ މަޖިލިސް އިންތިހާބުގައި އެމްޑީޕީގެ ފަރާތުން ގޮނޑި ކާމިޔާބުކުރެއްވި ހަތަރު މެންބަރުންގެ ތެރެއިން އެކަކެވެ.
އެމްޑީޕީގެ އަސާސީ ގަވާއިދު ބުނާގޮތުން ޗެއާޕާސަންއަކީ ފަސް އަހަރުގެ ދައުރަކަށް އިންތިހާބުކުރާ، ޕާޓީގެ އިދާރީ އަދި ސިޔާސީ ހުރިހާ ހިންގުމެއްގެ އެންމެ އިސް މަސްއޫލިއްޔަތު އުފުލަންޖެހޭ ފަރާތެވެ. މީގެ ތެރޭގައި ގައުމީ މަޖިލީހުގެ ރިޔާސަތު ބެލެހެއްޓުމާއި، އެހެން ސިޔާސީ ޕާޓީތަކާ މުއާމަލާތް ކުރުން ހިމެނެއެވެ.
