އެތެރޭގެ ހިޔާލުތަފާތުވުންތައް އެއްކިބާކޮށް، ރައްޔިތުންނާ ގުޅިގެން މި ސަރުކާރު ބަދަލުކުރުމުގެ މަސައްކަތް ކުރަންޖެހޭ ކަމަށް އެމްޑީޕީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު ވިދާޅުވެއްޖެއެވެ.

ލޯކަލް ކައުންސިލް އިންތިހާބާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބު، އަދި ފެންނަ ނުފެންނަ ވޯޓުގައި އެމްޑީޕީއަށް ލިބުނު ކާމިޔާބީ ފާހަގަކުރުމަށް އާޓިފިޝަލް ބީޗުގައި ރޭ ބޭއްވި "ހޭވައްލާ ތައްޔާރު" ޖަލްސާގައި ވާހަކަދައްކަވަމުން ޝާހިދު ވިދާޅުވީ، މި ކާމިޔާބީއަކީ އެމްޑީޕީގެ ހިތްވަރުގަދަ މެންބަރުން ކުރި ބުރަ މަސައްކަތުގެ ނަތީޖާ ކަމަށެވެ. އަދި މިރޭ ފާހަގަކުރަމުންދަނީ އެ މެންބަރުންގެ ކާމިޔާބީކަން އޭނާ ފާހަގަކުރެއްވިއެވެ.

ޝާހިދު ވިދާޅުވި ގޮތުގައި، އެކަތިގަނޑެއްގެ ގޮތުގައި ތިބެ ފެށި މި މަސައްކަތް ނިންމާލުމަށްޓަކައި އެންމެން އެކުގައި މަސައްކަތް ކުރުން މުހިންމެވެ.

"އަޅުގަނޑުމެންގެ ތެރޭގައި ހިޔާލުތަފާތުވުންތައް އެއްކިބާކޮށް، އަޅުގަނޑުމެން މަސައްކަތް ކުރަންޖެހޭނީ މި ސަރުކާރު ބަދަލުކޮށްލާ ރާއްޖެއަށް ހެޔޮގޮތް ހޯދުމަށް. އެހެންވީމާ ގުޅިވަޑައިގަންނަވާ. އެކަމަށް އެކުވެރިވެވަޑައިގަންނަވާ،" ޝާހިދު ވިދާޅުވިއެވެ.

މީގެއިތުރުން، ޝާހިދު ފާހަގަކުރެއްވި ގޮތުގައި މި އިންތިހާބުތަކުގެ ނަތީޖާއިން ފެނިގެންދަނީ ރައްޔިތުން މި ސަރުކާރަށް ވަރަށް ސާފުކޮށް "ނޫނެކޭ" ބުނެފައިވާ ކަމެވެ.

ރައްޔިތުންގެ 70 އިންސައްތަ ވޯޓުން ސަރުކާރަށް ނޫނެކޭ ބުނެފައިވާކަން ފާހަގަކުރައްވަމުން، ޝާހިދު ވަނީ ސަރުކާރު ބަދަލުކުރުމުގެ ރޫހުގައި ހުރިހާ މެންބަރުން ސާބިތުވެ ތިއްބެވުމަށް ގޮވާލައްވާފައެވެ.