މާލޭގެ ބޮޑުތަކުރުފާނު މަގުގެ އުތުރު ސަރަޙައްދު ތަރައްޤީކުރުމުގެ ޢަމަލީ މަސައްކަތް މާދަމާ ފެށުމަށް ހަމަޖެހިފައިވާތީ، އެ ސަރަޙައްދުގައި ބަހައްޓާފައިވާ އެންމެހާ ތަކެތި ނެގުމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން އަންގައިފިއެވެ.

މިކަމާ ގުޅިގެން އެ ވުޒާރާއިން މިއަދު ކުރި އިޢުލާނެއްގައި ވިދާޅުވީ، ހެންވޭރު ފެރީ ޓަރމިނަލުން ފެށިގެން ރަސްމީ ފާލަމާ ހިސާބަށް މަގު ހެދުމުގެ މަސައްކަތް މާދަމާ ފެށުމަށް ނިންމާފައިވާ ކަމަށެވެ. އެހެންކަމުން، އެ ސަރަޙައްދުގައި ބަހައްޓާފައިވާ އެންމެހާ ތަކެތި މާދަމާ ހެނދުނު 6:00 ގެ ކުރިން ނެގުމަށް ވަނީ އަންގާފައެވެ. އަދި ކަނޑައެޅިފައިވާ ވަގުތަށްފަހު މަގުމަތީގައި ހުންނަ ތަކެތި އެ ވުޒާރާގެ ފަރާތުން ނަގާނެ ކަމަށްވެސް ވިދާޅުވެފައިވެއެވެ.

މި މަޝްރޫޢުގެ ދަށުން ޖުމްލަ 700 މީޓަރުގެ ސަރަޙައްދެއް ތަރައްޤީކުރުމަށް ވަނީ ހަމަޖެހިފައެވެ. މަސައްކަތް އަވަސްކުރުމަށްޓަކައި 4 ސެގްމަންޓެއްގެ މަސައްކަތް އެއްފަހަރާ ކުރިއަށްގެންދިއުމަށް ވަނީ ނިންމާފައެވެ. މިކަމުގެ ސަބަބުން މާލޭގެ އުތުރު ފަރާތުން ބޮޑު ސަރަޙައްދެއް ބަންދުކުރެވޭނެއެވެ.

މި ސަރަޙައްދަކީ އަތޮޅުތެރޭގެ ފެރީތަކާއި އެހެނިހެން ދަތުރުފަތުރުތަކަށް ބޭނުންކުރާ މައި މަރުކަޒަކަށް ވުމާއެކު، ގިނަ އަދަދަކަށް ސައިކަލު ޕާކުކޮށްފައި އޮންނަ ސަރަޙައްދެކެވެ. މީގެ އިތުރުން ފެރީތަކުން ގެންނަ މުދާ ބާލާ ބަހައްޓާ ސަރަޙައްދެއް ކަމުން، މަސައްކަތް ފެށުމުގެ ކުރިން އެ

ސަރަޙައްދުގައި ހުރި މުދަލާއި އުޅަނދުތައް ނެގުމަކީ މަސައްކަތް ތަރުތީބުން ކުރިއަށް ގެންދިއުމަށް ކޮންމެހެން މުހިންމު ކަމެއް ކަމަށް އެ ވުޒާރާއިން ފާހަގަކުރެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މާލޭގެ މަގުތަކުގެ ފެންވަރު ރަނގަޅުކުރުމަށް ފައްޓަވާފައިވާ މަސައްކަތްތަކުގެ ދަށުން ކުރިއަށްދާ މި މަޝްރޫޢަކީ މާލޭގެ އުތުރު ފަރާތުގެ ތޮއްޖެހުން ކުޑަކޮށް، ދަތުރުފަތުރަށް ލުއިފަސޭހަ ކޮށްދިނުމަށް ހިންގޭ މުހިންމު މަޝްރޫޢެކެވެ.