އައްޑޫސިޓީއަށް ނިސްބަތްވާ އިދިކޮޅުއެމްޑީޕީގެ އިސް މަޤާމުތަކެއް ފުރުއްވާފައިވާ ބޭފުޅުންތަކެއް ސަރުކާރު ހިންގާ ކޮންގްރެސް ޕާޓީއާ މިރޭ ގުޅިއްޖެ އެވެ.
އެ ބޭފުޅުން ކޮންގްރެސް ޕާޓީއާ ގުޅިފައިވަނީ މިރޭ އާޓިފިޝަލް ބީޗުގައި އޮތް ދަ ގްރޭޓަރ އައްޑޫ ވިޝަންގެ ތަފްސީލު ލޯންޗުކުރުމަށް މިރޭ ބޭއްވި ޚާއްސަ ހަފްލާގަ އެވެ.
މި ހަފްލާގައި ކޮންގްރެސް ޕާޓީއާ ގުޅުނު ބޭފުޅުންގެ ތެރޭގައި އައްޑޫ ސިޓީގެ އެމްޑީޕީގެ ކުރީގެ ރައީސް އަޙްމަދު އަދްޙަމް އާއި އެމްޑީޕީގެ ފޭދޫ ދާއިރާގެ ކުރީގެ ރައީސް އަބްދުالله ސަޢީދު އާއި އެމްޑީޕީގެ ފޭދޫ ދާއިރާގެ ކުރީގެ ނާއިބު ރައީސް މުހައްމަދު ސައީދު (ދަގޭ) އާއި ފޭދޫ ދާއިރާގެ އެމްޑީޕީގެ ކުރީގެ ކައުންސިލަރު އަދި އެލްޖީއޭގެ ކުރީގެ މެންބަރު އަހްމަދު މިރުޒާލް އާއި ލަންކާގައި އެމްޑީޕީ ހަރަކާތްތަކުގައި ވަރަށް އިސް ދައުރެއް އަދާކޮށްފައިވާ ފާތިމަތު ޝިޔާމާ އާއި އައްޑޫ ސިޓީގެ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގައި ތިންވަނަ ދައުރެއް ފުރިހަމަ ކުރަމުންދާ ޙައްވާ ޒާހިރާ ހިމެނެ އެވެ.
މި ބޭފުޅުން ކޮންގްރެސް ޕާޓީއާ ގުޅުމާއި ގުޅިގެން އެ ޕާޓީން ވަނީ ވަރަށް ހޫނު މަރުޙަބާ އެެއް ކިޔާފަ އެވެ. އެ މެންބަރުން ވަނީ ޕާޓީއާ ގުޅޭ އިޤްރާރާއި މެންބަރޝިޕް ފޯމް ރައީސުލްޖުމްހޫރިއްޔާ އަދި ކޮންގްރެސް ޕާޓީގެ ރައީސް ޑރ. މުޙައްމަދު މުޢިއްޒުއާ ހަވާލު ކުރައްވާފަ އެވެ.
މިރޭގެ ހަލްފާގައި ކުރިއަށް އޮތް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ އިންތިޚާބުގައި އައްޑޫސިޓީއަށް ކޮންގްރެސްގެ ފަރާތުން ވާދަކުރާ ކެންޑިޑޭޓުން ވަނީ ތަޢާރަފުކޮށްފަ އެވެ.
