ކުއްޔަށް ދޭނަމަ ފްލެޓްތައް އަތުލައި ބައިލައްކަ ރުފިޔާއާ ހަމައަށް ފްލެޓުތަކުގެ ވެރިން ޖޫރިމަނާ ކުރާނެ ކަމަށް ފަހި ދިރިއުޅުން ކޯޕަރޭޝަން، (އެފްޑީސީ) އިން ބުނެފިއެވެ.
އިޖްތިމާއީ ބޯހިޔާވަހިކަމުގެ ދަށުން ސަރުކާރުން ހެޔޮ އަގުގައި އެފްޑީސީ މެދުވެރިކޮށް ދޫކޮށްފައިވާ 4000 ފްލެޓްތަކުގައި ހިމެނެނީ ތިން ކޮޓަރި އާއި ދެކޮޓަރީގެ ފްލެޓްތަކެވެ. އެ ފްލްޓްތައް ލިބުނު ފަރަތާތްތަކަށް ފްލެޓް ހަވާލު ކުރުމުގެ އެއްބަސްވުމުގައިވާގޮތުން އެތަންތަން އެހެން ފަރާތަކަށް ކުއްޔަށް ދިނުމަކީ މަނާ ކަމެކެވެ.
ނަމަވެސް ފްލެޓް ލިބުމާއެކު، ސަރުކާރުން ފްލެޓް ފީފައިވާ އަގަށްވުރެ އެތައް ގުނައެއް ބޮޑުކޮށް މަހު ކުއްޔަށް ފްލެޓް ދިނުމަށް ބައެއް ބައެއް ފަރާތްތަކުން އަންނަނީ ސޯޝަލް މީޑީއާގައި އިޝްތިހާރު ކުރަމުންނެވެ.
އެކަމާ ގުޅިގެން އެކްސްގައި ހިއްސާކުރެއްވި ޕޯސްޓެއްގައި ފަހިދިރިއުޅުން ކޯޕަރޭޝަންގެ މެނޭޖިންގ ޑިރެކްޓަރ ހަމްދާން ޝަކީލް ވިދާޅުވީ، އެގޮތަށް ފްލެޓްތައް ކުއްޔަށްދޭ މައްސަލަ ސަމާލުކަމަށް އައިސްފައިވާ ކަމަށެވެ.
އެފްޑީސީ ފްލެޓްތަކަކީ ތިން ވަނަ ފަރާތަކަށް ކުއްޔަން ދެވޭނެ ތަންތަން ނޫންކަން ތަކުރާރުކުރައްވައި އޭނާ ވިދާޅުވެފައިވަނީ މިފަދަ އަމަލުތައް ކުރާ ފަރާތްތައް 50،000 ރުފިޔާއާ ހަމައަށް ޖޫރިމަނާކޮށް ފްލެޓުގެ އެއްބަސްވުން އުވާލެވޭނެ ކަމަށެވެ. އަދި ސަރުކާރުން އިޖްތިމާއީ ބޯހިޔާވަހިކަމަށް ދޫކޮށްފައިވާ ފްލެޓްތައް ކުއްޔަށް ދިނުމަކީ އެ މަޝްރޫއުތަކުގެ މަގްސަދަށް ހުރަސް އެޅޭ ކަމެއް ކަމަށެވެ.
އަދި ފައިދާ ހޯދާ ވިޔަފާރިއަކަށް ފްކެޓްތައް ހެދުމަކީ ކޮންމެ ދިވެއްސެއްގެ ހައްގަށްވެސް އަރައިގަތުން ކަމަށް ވެސް ވިދާޅުވެފައިވެއެވެ.
