ސަރުކާރުގެ ސޯޝަލް ހައުސިން ފްލެޓްތައް، އޭގެ ބޭނުން ފިޔަވައި އެހެން ކަންކަމަށް ބޭނުންކުރުމާއި ކުއްޔަށް ދިނުން ހުއްޓުވުމަށްޓަކައި ގާނޫނަށް ބަދަލުތަކެއް ގެނައުމުގެ މަސައްކަތް ކުރަމުންދާކަމަށް މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. އަބްދުﷲ މުއްތަލިބު ވިދާޅުވެއްޖެއެވެ.

ގާނޫނަށް ގެންނަން ޖެހޭ ބަދަލުތައް ގެނެސްގެން ނަމަވެސް، ސޯޝަލް ހައުސިންއަށް ދޫކޮށްފައި ހުންނަ ފްލެޓުތައް ކުއްޔަށް ދިނުން ހުއްޓުވާނެކަމަށް ސަރުކާރުން އެންމެ ފުރަތަމަ ހާމަކުރީ 4000 ފްލެޓުތައް ބޮޑު އަގުގައި ކުއްޔަށް ދޭ މައްސަލަ ފެންމަތިވުމުންނެވެ. އޭރު މިނިސްޓަރ މުއްތަލިބު ވިދާޅުވެފައި ވަނީ އެގޮތަށް ކުއްޔަށް ދީފައި ހުންނަ ފްލެޓުތައް ދެނެގަތުމަށްޓަކައި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި، ފަހި ދިރިއުޅުން ކޯޕަރޭޝަން (އެފްޑީސީ) މެދުވެރިކޮށް މަސައްކަތް ކުރަމުންދާކަމަށެވެ.

އޭގެ ފަހުން މިހާތަނަށް ފަސް މަސް ވެގެން ދިޔައިރު، ކުއްޔަށް ދިނުން އަދިވެސް ނުހުއްޓެ އެވެ. އެކަމާއި ގުޅޭގޮތުން ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި މުއްތަލިބު ވިދާޅުވީ 4000 ފްލެޓް ހިމެނޭހެން ސޯޝަލް ހައުސިންގެ ގިނަ ތަންތަން މިހާރު ދޫކޮށްފައިވަނީ ”ރެންޓް-ޓު-އޯން“ މޮޑެލްގެ ދަށުން ކަމަށްވާތީ، އެފަދަ ތަންތަނާ މެދު ފިޔަވަޅު އެޅުމަށް ފަސޭހަވާނެ ކަމެކެވެ. ސޯޝަލް ހައުސިންގެ ތަންތަން ކުއްޔަށް ދިނުމަކީ މަނާކަމެއްކަމަށާއި، އެކަން ކުރާ ފަރާތްތަކާ މެދު ސަރުކާރުން ހަރުކަށި ފިޔަވަޅު އަޅާނެކަމަށް ދައްކަވާ ވާހަކަ މުއްތަލިބު މިއަދުވެސް ތަކުރާރު ކުރެއްވި އެވެ.

މިނިސްޓަރު ވިދާޅުވި ގޮތުގައި، އެޗްޑީސީއަށް އެފަދަ މައްސަލައެއް ރިޕޯޓް ކުރެވިއްޖެ ނަމަ ނުވަތަ އެ ކޯޕަރޭޝަނަށް އެފަދަ މައްސަލައެއް ފާހަގަކުރެވިއްޖެ ނަމަ، އެކަމާ މެދު ފިޔަވަޅު އަޅަން ޖެހޭނެއެވެ. އެގޮތުން ފިޔަވަޅު އެޅުމުގައި ފުރަތަމަ މަރުހަލާގައި ޖޫރިމަނާ ކުރުމާއެކު އިސްލާހުވުމަށް ފުރުސަތު ދެވޭނެކަމަށް ވިދާޅުވި އެވެ.

މުއްތަލިބު ވިދާޅުވި ގޮތުގައި ހިޔާ ފްލެޓް ފަދަ ތަންތަނަކީ ސޭލް-ޕާޗޭސް އެގްރީމެންޓެއްގެ ދަށުން ދީފައިވާ ތަންތަން ކަމަށްވާތީ، އެތަންތަނާ މެދު ފިޔަވަޅު އެޅުމުގައި ގާނޫނީ ގޮތުން ހުރި ހުރަސްތައް ނައްތާލުމަށް ގާނޫނަށް ބަދަލު ގެނައުމުގެ މަސައްކަތް މިހާރު ދަނީ ކުރަމުންނެވެ. އެގްރީމެންޓްތަކުގައި މިހާރު ވެސް ކުއްޔަށް ނުދެވޭނެކަމަށް ބަޔާންކޮށްފައި އޮތް ނަމަވެސް، ސޯޝަލް ހައުސިންގެ އަސްލު މަގްސަދު ހާސިލުކުރުމަށްޓަކައި ގާނޫނީ ގޮތުން އެކަން އިތުރަށް ސާފުކޮށް ކަނޑައަޅަން ޖެހޭކަމަށް މިނިސްޓަރު ވިދާޅުވިއެވެ.

"ހަތަރުހާސް ފްލެޓަށް ވުރެ ބޮޑަށް ސޯޝަލް ހައުސިން ކުއްޔަށް ދިނުމުގެ މައްސަލަ. އޭގެ ތެރޭގައި އަޅުގަނޑުމެން ކުރިންވެސް ފާހަގަކުރިން ހަތަރުހާސް ފްލެޓް ކުއްޔަށް ދީފަ ހުރީ ރެންޓު އޯން މޮޑެލްގަ ވީމަ އޭގަ ފިޔަވަޅު އަޅަން ފަސޭހަވާނެ. ކުއްޔަށް ދިނުމަކީ މަނާ ކަމެއް، އެކަންތައް ކުރާނެ… ދެން އެކަން ފާހަގަކުރާނީ ކިހިނެއްތޯ.. އެޗްޑީސީއަށް އަޅުގަނޑުމެންނަށް އަންގާފަ އިންނާނެ ފާހަގަ ކުރެވޭ ހިސާބުން ކުއްޔަށް ދީފައި އޮތް ކަމުގެ ރިޕޯޓެއް ލިބިގެން ނޫނީ އެ ބޭފުޅުންނަށް ފާހަގަކުރެވިގެން އެކަން ހިނގާކަމަށް ވަންޏާ އެ ފިޔަވަޅު އަޅަންޖެހޭނޭ. މިއިންނަނީ މި ފުރަތަމަ ފާހަގަކުރާނީ ޖޫރިމަނާ ކުރުމާއެކު ދެން ފުރުސަތު ދީފަ، އެހެންނަމަވެސް މި ދަންނަވާ ގޮތަށް އެ ބޭފުޅުންނަށް ރިޕޯޓް… އެއްކަމަކީ ރިޕޯޓް ކޮންމެވެސް ބަޔަކު ރިޕޯޓް ކުރަންޖެހޭނެ ނޫނީ ކޮންމެވެސް ގޮތަކުން ފާހަގަވާން ޖެހޭނެ، ދެން އެގޮތަށޭ ފިޔަވަޅު އެޅޭނީ. ހިޔާ ފްލެޓާއި ދެން ހުރި ފްލެޓްތަކުގަ އުނދަގޫތަކެއް އެބަހުރި، ގާނޫނަށް ބަދަލުތަކެއް ގެނައުމުގެ މަސައްކަތް ކުރަމުން މި ގެންދަން. އެއީ އެ ތަންތަނަކީ ސޭލް ޕާޗޭސް އެއްގެ ތެރެއިން ދީފައި ހުރި ތަންތަން" މުއްތަލިބު ވިދާޅުވި އެވެ.

މީގެ އިތުރުން، ހިޔާ ފްލެޓްތައް ލޭބަރ ކުއާޓަރުގެ ގޮތުގައި ބޭނުންކުރާ ތަންތަނާއި، ކެފޭ ރެސްޓޯރެންޓްތަކަށް ބޭނުންވާ ކެއްކުމުގެ މަސައްކަތް ކުރާ ތަންތަން ހުސްކުރުމުގެ މަސައްކަތް އެޗްޑީސީން ކުރަމުންދާނެކަމަށް ވެސް މުއްތަލިބު ވިދާޅުވި އެވެ.

މުއްތަލިބު ވިދާޅުވީ ބޮޑު އާއިލާއަކަށް ކުޑަ ފްލެޓެއްގައި ނޫޅެވޭ ފަދަ ހާއްސަ ހާލަތްތަކުގައި، އެކަށީގެންވާ ހުއްދައެއް ނަގައިގެން ކުއްޔަށް ދިނުމުގެ ފުރުސަތު ދެވިދާނެ ކަމަށެވެ. އެހެންނަމަވެސް، މިވަގުތު ސަރުކާރުގެ މައިގަނޑު އަމާޒަކީ ރައްޔިތުންނަށް އުނދަގޫވާ ކަންކަން ހުއްޓުވުމާއި، ގާނޫނަށް ބަދަލު ގެނެސްގެން ކުއްޔަށް ދިނުން މަނާކުރުންކަމަށް ވިދާޅުވި އެވެ.

ސޯޝަލް ހައުސިން ކުއްޔަށްދޭ ކަމުގެ އެއްވެސް ރިޕޯޓެއް ލިބިއްޖެ ނަމަ، މިހާރުވެސް ފިޔަވަޅު އަޅާނެކަމަށް މުއްތަލިބު ވިދާޅުވިއެވެ.