ފިރިމީހާ ނުވަތަ އަނބިމީހާގެ ބޯހިޔާވަހިކަމެއް އޮތް މީހުންނަށް ގޯއްޗަށް ކުރިމަތިލުމުގެ އުސޫލު ހައުސިން މިނިސްޓްރީން މިއަދު ހުޅުވާލައިފިއެވެ.
އެ މިނިސްޓްރީން ބުނީ "ގޯތި-ގެދޮރު" ޕްރޮގްރާމްގެ މަގުސަދަކީ މާލޭގައި ދިރިއުޅޭ ރައްޔިތުންނަށް ދިރިއުޅުމަށް ބަންޑާރަ ގޯތި ލިބިދިނުމާއި، ރޭވިގެން ތަރައްގީކުރެވޭ ސަރަހައްދުތަކެއްގެ ތެރެއިން، މާލޭގައި ދިރިއުޅޭ ރައްޔިތުންގެ ގެދޮރުގެ ދަތިކަމަށް ހައްލު ހޯދުމާއި، ކަނޑައެޅިފައިވާ ތަރައްގީގެ ސަރަހައްދުތަކުގައި ބިމުގެ ވަސީލަތްތައް ހަމަހަމަކަމާއެކު ދޫކުރުން ކަމަށެވެ.
ދެ ކެޓަގަރީއަށް ކުރިމަތިލާން ހުޅުވާލި މި ސްކީމްގައި ހިމެނެނީ، މާލެ ރަށްވެހިންގެ ކެޓަގަރީ އާއި މާލޭގައި ދިރިުޅޭ އެހެން ރަށްރަށު ރަށްވެހިންގެ ކެޓަގަރީއެވެ. މީގެ އިތުރުން ހާއްސަ ކެޓަގަރީތައް ކަނޑައެޅޭނެ ކަމަށްވެސް ބުނެފައިވެއެވެ.
ކެޓަގަރީ 1 ގެ ޝަރުތުތައް:
ދިވެހި ރައްޔިތެއް ކަމުގައިވުން.
އުމުރުން 18 އަހަރު ފުރިފައިވުން.
މާލޭގެ ރަށްވެއްސަކަށް ވެފައިވާތާ މަދުވެގެން 1 )އެކެއް( އަހަރު ދުވަސް ވެފައިވުން. މި އަކުރުގެ ބޭނުމަށް މާލޭގެ ރަށްވެއްސަކަށް ވެފައިވާތާ 1 )އެކެއް( އަހަރު ދުވަސް ވެފައިވާކަމަށް ބަލާނީ، މި އުސޫލަށް ޢަމަލު ކުރަން ފަށާ ދުވަހުގެ ނިޔަލަށް އެޕްލިކޭޝަން ހުށަހަޅާ ފަރާތުން މާލޭގެ ރަށްވެއްސެއްގެ ގޮތުގައި ރަޖިސްޓަރީ ވެފައިވާތާ 1 )އެކެއް( އަހަރު ދުވަސް ވެފައިވާ ނަމައެވެ.
ކެޓަގަރީ 2 ގެ ޝަރުތުތައް:
ދިވެހި ރައްޔިތެއް ކަމުގައިވުން.
އުމުރުން 18 އަހަރު ފުރިފައިވުން.
މާލޭގައި ދިރިއުޅޭ އެހެން ރަށެއްގެ ރަށްވެއްސެއް ނަމަ، މެދުނުކެނޑި މާލޭގައި ދިރިއުޅޭތާ 15 އަހަރު ދުވަސް ވެފައިވުން. މި އަކުރުގެ ބޭނުމަށް 15 އަހަރު ދުވަސް ވެފައިވާ ކަމަށް ބަލާނީ، މި އުސޫލަށް ޢަމަލު ކުރަން ފަށާ ދުވަހުގެ ނިޔަލަށް، އެޕްލިކޭޝަން ހުށަހަޅާ ފަރާތުން މެދުނުކެނޑި މާލޭގައި ދިރިއުޅެފައިވާ ނަމައެވެ.
މި އުސޫލުގައި ޕޮއިންޓް ދެވޭނެ ބައިތަކާއި، ދެވޭ ޕޮއިންޓްގެ އަދަދާއި، ދެވޭ ގޯތީގެ ބޮޑު މިނުގެ އިތުރުން، އިތުރު ޝަތުރުތައް ވަނީ ބަޔާން ކޮށްފައެވެ.
