ފެނަކަކޯޕަރޭޝަންގެ ބޮޑު ހިޔާނާތާބެހޭ ގޮތުން އެންޓި ކޮރަޕްޝަން ކޮމިޝަން (އޭސީސީ) އެކު މަޝްވަރާކުރަން މިއަދު ބޭއްވި  މާލިއްޔަތު ކޮމިޓީގެ ސަބް ކޮމިޓީގެ ބައްދަލުވުން ސިއްރު ކޮށްފިއެވެ.

ފެނެކަ ކޯޕަރޭޝަންގެ އޮޑިޓް ރިޕޯޓުން ހާމަވެފައިވާ ކޮރަޕްޝަންގެ މައްސަލަތައް މާލިއްޔަތު ކޮމިޓީންވެސް ދަނީ ބަދަލަމުންނެވެ. އެ މައްސަލަ ތަކުގެ ތަހުގީގު ކުރިއަށް ގެންދިއުން ވަނީ ސަބް ކޮމިޓީއަކާ ހަވާލުކޮށްފައެވެ.

މިއަދު ބޭއްވި ސަބް ކޮމިޓީގެ ބައްދަލުވުމުގައި އެ ކޮމިޓީގެ މުގައްރިރު އަދި ރައްޔިތުންގެ މަޖިލީހުގެ ނާއިބު ރައީސް ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވީ، ކޮމިޓިގެ މިއަދުގެ ބައްދަލުވުމަކީ، ފެނަކައިގެ ހާއްސަ އޮޑިޓް ރިޕޯޓްތަކާބެހޭގޮތުން މާލިއްޔަތު ކޮމިޓީން ފޮނުވާފައިވާ ބައެއް ކަންތައްތަކާބެހޭ ގޮތުން އޭސީސީން މަޝްވަރާ ކުރުމަށް އެދިގެން ބާއްވާ ބައްދަލުވުމެއް ކަމަށެވެ.

އެކަމާ ގުޅިގެން އޭސީސީން ކޮމިޓީއަށް ފޮނުވި ސިޓިއަކީ ސިއްރު ސިޓީއެއް ކަމަށާއި، އެ ސިޓީގައިވާ ކަންތައްތަކާބެހޭގޮތުން ބާއްވާ ބައްދަލުވުން ސިއްރު ކުރަންޖެހޭ ކަމަށްވެސް ވިދާޅުވިއެވެ. އެހީސާބުން ކޮމިޓީ ބައްދަލުވުން ސިއްރު ކުރިއެވެ.

ފެނަކައިގައި ހިންގާފައިވާ އެކި އެކި ކޮރަޕްޝަން މައްސަލަތައް މާލިއްޔަތު ކޮމިޓީންނާއި، އޭސީސީން ތަހުގީގު ކުރަމުންދާއިރު، އެ އިން މައްސަލައެއްގައި އެތަނުގެ ކުރީގެ މެނޭޖިން ޑިރެކްޓަރު އަހުމަދު ސައީދަށް ވަނީ ހަތަރު އަހަރު ދުވަހުގެ ޖަލު ހުކުމެއް ކޮށްފައެވެ.

ފެނަކަ ކޯޕަރޭޝަންގެ ހާއްސަ އޮޑިޓް ރިޕޯޓުން ބޮޑެތި ކޮރަޕްޝަންތަކެއް ވަނީ ފާހަގަވެފައެވެ. އެގޮތުން އެ ކޯޕަރޭޝަނުން 2021 ވަނަ އަހަރާއި 2023 ވަނަ އަހަރާ ދެމެދު ހިދުމަތާއި ތަކެތި ހޯދަން އެކި ފަރާތްތަކާ ހަވާލުކުރި 2.2 ބިލިއަން ރުފިޔާގެ މަސައްކަތުގެ ތެރެއިން 1.3 ބިލިއަން ރުފިޔާގެ މަސައްކަތް ހަވާލުކޮށްފައިވަނީ ވާދަވެރި ބީލަމަށް ހުޅުވައި ނުލައި ކަމަށް އޮޑިޓް ރިޕޯޓުން ދައްކައެވެ.

އޮޑިޓް ރިޕޯޓުން ދައްކާ ގޮތުގައި، 2021 ވަނަ އަހަރުން ފެށިގެން 2023 ވަނަ އަހަރާ ދެމެދު އޭރު ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމުގައި ހުންނެވި އަހްމަދު ސައީދުގެ އާއިލީ ތިން ކުންފުންޏަށް ޖުމްލަ 49.7 މިިލިއަން ރުފިޔާގެ ކޮންޓްރެކްޓް މަސައްކަތް ދީފައިވެއެެވެ.

ފެނަކައިން މަޝްރޫއުތަކާ ގުޅުން ހުރި ހަރަދުތައް ކުރުމުގެ ނަމުގައި 26 މިލިއަން ރުފިޔާ އެކައުންޓްތަކަށް ޖަމާކޮށްފައިވާ އިރު، އެ ފައިސާގެ ތެރެއިން 21 މިލިއަން ޖަމާކޮށްފައިވަނީ މުވައްޒަފުންގެ އަމިއްލަ އެކައުންޓްތަކަށް ކަމަށާއި އަދި ނަގުދު ފައިސާގެ ގޮތުގައި 5.1 މިލިއަން ރުފިޔާ ނަގާފައިވާ ކަމަށްވެސް ރިޕޯޓުގައިވެއެވެ.