އުތުރު ކޮރެއާގެ ވެރިކަންކުރާ "ވޯކާސް ޕާޓީ" ގެ ޖެނެރަލް ސެކްރެޓަރީގެ މަގާމަށް ކިމް ޖޮންގް އުން އަލުން އިންތިޚާބުކޮށްފައިވާ ކަމަށް އެ ގައުމުގެ ދައުލަތުގެ މީޑިއާއިން ރިޕޯޓްކޮށްފިއެވެ.
އާދީއްތަ ދުވަހު ޕިއޮންގްޔަންގްގައި ބޭއްވި ޕާޓީގެ ކޮންގްރެސްގައި މިކަން އިއުލާންކޮށްފައިވާއިރު، މިއީ މާބޮޑު ހައިރާންކަމެއް ލިބުނު ނިންމުމެއް ނޫނެވެ. ސަބަބަކީ 1940 ގެ އަހަރުތަކުގެ ފަހުކޮޅުން ފެށިގެން އެ ގައުމުގެ ޚުދުމުޚުތާރު ވެރިކަން ކުރަމުން އަންނަނީ ކިމް އާއިލާއިން ކަމަށްވާތީއެވެ.
ދައުލަތުގެ މީޑިއާ، ކޭ.ސީ.އެން.އޭ އިން ބުނި ގޮތުގައި، ކިމްގެ ޒައާމަތުގައި އުތުރު ކޮރެއާގެ ނިއުކްލިއާ ބާރުތައް މަރުކަޒީ ދައުރެއް އަދާކުރާ ގޮތަށް، އެ ގައުމުގެ ދިފާއީ ގާބިލުކަން ވަނީ ވަރަށް ބޮޑަށް ވަރުގަދަކޮށްފައެވެ. ބައިނަލްއަގުވާމީ ގޮތުން ގިނަ ދަތިކުރުމުގެ ފިޔަވަޅުތަކެއް އަޅާފައިވީ ނަމަވެސް، އުތުރު ކޮރެއާއިން ދަނީ އެ ގައުމުގެ ނިއުކްލިއާ ގާބިލުކަން އިތުރުކޮށް، މަނާކޮށްފައިވާ އިންޓަކޮންޓިނެންޓަލް މިސައިލްތައް ގަވާއިދުން ޓެސްޓުކުރަމުންނެވެ. ނަމަވެސް، އެ ގައުމުގެ ސިއްރުވެރި ސިޔާސަތުތަކުގެ ސަބަބުން، އަސްކަރީ ގޮތުން އެ ގައުމަށް ލިބިފައިވާ ކުރިއެރުންތައް ސީދާ ވަޒަންކުރަން ދަތިވެއެވެ.
2011 ވަނަ އަހަރު ބައްޕަގެ މަރަށްފަހު ވެރިކަމާ ހަވާލުވެވަޑައިގަތް ކިމް ވަނީ ނިއުކްލިއާ ހަތިޔާރު އުފެއްދުމުގެ މަޝްރޫއުތަކަށް ބޮޑެތި އިންވެސްޓްމަންޓްތަކެއް ކުރައްވާފައެވެ. މީގެ ސަބަބުން ހުޅަނގުގެ ގައުމުތަކަށާއި، ހާއްސަކޮށް އެމެރިކާއަށް އޮތް ގޮންޖެހުންތައް ވަނީ ކުރިއަށްވުރެ ބޮޑުވެފައެވެ.
ފެބްރުއަރީ 19 ގައި ފެށުނު ވޯކާސް ޕާޓީގެ ނުވަވަނަ ކޮންގްރެސްގެ ތެރެއިން، ހަތިޔާރު އުފެއްދުމުގެ ދެން އޮތް މަރުހަލާ އިއުލާން ކުރައްވާނެ ކަމަށް ބެލެވެއެވެ. ކޮންގްރެސް ފެށުމުގެ ކުރިން، ނިއުކްލިއާ ހަތިޔާރު އުފުލުމުގެ ގާބިލުކަން ހުރި ރޮކެޓް ލޯންޗަރުތަކެއް އެ ގައުމުން ވަނީ ދައްކާލާފައެވެ. ފާއިތުވި ދިހަ އަހަރު ތެރޭގައި ކޮންމެ ފަސް އަހަރަކުން އެއްފަހަރު ބާއްވާ މި ކޮންގްރެސްގައި، ގާތްގަނޑަކަށް 5،000 މެންބަރުން ބައިވެރިވެއެވެ.
މިއީ އުތުރު ކޮރެއާގެ ސިޔާސީ އޮނިގަނޑާއި ބާރުތައް ބެހިފައިވާ ގޮތް ދެނެގަތުމަށް ލިބޭ ނާދިރު ފުރުސަތެކެވެ.
މި ބައްދަލުވުންތަކަކީ އެ ގައުމުގެ އެންމެ މުހިންމު ސިޔާސީ ހަރަކާތް ކަމަށް ބެލެވެއެވެ. އަދި ޚާރިޖީ ސިޔާސަތުން ފެށިގެން ނިއުކްލިއާ އަމާޒުތަކާ ހަމައަށް، ގައުމުގެ އިސްކަންދޭ ކަންތައްތައް މި ބައްދަލުވުންތަކުން ސާފުވެގެންދެއެވެ. ކިމް ވެރިކަމުގެ އެންމެ އިސް މަގާމުގައި ދެމިހުންނެވި ނަމަވެސް، 2021 ވަނަ އަހަރު ބޭއްވި ބައްދަލުވުމަށްފަހު، ޕާޓީގެ އެގްޒެކެޓިވް ކޮމިޓީގެ 39 މެންބަރުންގެ ތެރެއިން ދެބައިކުޅަ އެއްބަޔަށްވުރެ ގިނަ މެންބަރުން ވަނީ ބަދަލުކޮށްފައެވެ.
މިދިޔަ ހަފުތާގައި ބޭއްވި ފެށުމުގެ ރަސްމިއްޔާތުގައި ކިމް ވަނީ ގައުމުގެ އިގްތިސާދު ކުރިއަރުވައި، ރައްޔިތުންގެ ދިރިއުޅުމުގެ ފެންވަރު މަތިކުރުމަށް ވައުދުވެވަޑައިގަންނަވާފައެވެ. މިއީ "ބުރަ އަދި ކޮންމެހެން ކުރަންޖެހިފައިވާ ތާރީޚީ މަސައްކަތެއް" ކިމް ސިފަކުރެއްވިއެވެ.
މި ކޮންގްރެސްގައި ކިމްގެ ދަރިކަނބަލުން ޖޫ އޭ ފެނިގެންދާނެތޯ ގިނަ ބަޔަކު ދަނީ އިންތިޒާރު ކުރަމުންނެވެ. ދެކުނު ކޮރެއާގެ ޖާސޫސީ އިދާރާއިން ބުނާ ގޮތުގައި، ކިމްގެ ވާރިސަކަށް ކަނޑައަޅުއްވާފައިވަނީ އުމުރުން 13 އަހަރުގެ ޖޫ އޭ އެވެ. އޭނާ ދަނީ ދައުލަތުގެ ރަސްމީ އެކި ހަރަކާތްތަކުން ފަހަކަށް އައިސް ފެންނަމުންނެވެ.
މީގެ އިތުރުން، އުތުރު ކޮރެއާ، ޗައިނާ އަދި ރަޝިޔާގެ ލީޑަރުން އެކުގައި ފެނިގެންދިޔަ އަސްކަރީ ޕެރޭޑަކީ އެމެރިކާއާއި އެ ގައުމުގެ ބައިވެރިންނަށް އެއްބައިވަންތަކަމުގެ މެސެޖެއް ދިނުމުގެ ގޮތުން ބޭއްވި ހަރަކާތެކެވެ.
ހޯމަ ދުވަހު ޗައިނާގެ ރައީސް ޝީ ޖިންޕިން ވަނީ ކިމްއަށް ގުޅުއްވައި، މަގާމަށް އަލުން އިންތިޚާބުވުމާ ގުޅިގެން މަރުހަބާ ވިދާޅުވެފައެވެ. އަދި ދެ ގައުމުގެ އެކުވެރިކަމުގެ އާ ބާބެއް ލިޔުމަށް ކިމްއާއެކު މަސައްކަތް ކުރައްވާނެ ކަމަށް ވިދާޅުވިއެވެ.
ޗައިނާއަކީ ޒަމާނުއްސުރެ އުތުރު ކޮރެއާގެ އެންމެ ގާތް ބައިވެރިޔާއެވެ. އެގައުމަކީ އުތުރު ކޮރެއާގެ އެންމެ ބޮޑު ވިޔަފާރީގެ ބައިވެރިޔާގެ އިތުރުން އެންމެ ގިނައިން އެހީ ފޯރުކޮށްދޭ ގައުމުވެސްމެއެވެ.
ނަމަވެސް ހަމައެއާއެކު، އުތުރު ކޮރެއާގެ ނިއުކްލިއާ އަމާޒުތަކުގެ ސަބަބުން ސަރަހައްދީ ހަމަޖެހުމަށް ބުރޫއަރާފާނެތީއާއި، ރަޝިޔާއާއެކު އެ ގައުމުން ބާއްވާ ގުޅުންތައް ބަދަހިވަމުންދާތީ ޗައިނާއިން ކަންބޮޑުވުން ފާޅުކުރެއެވެ.
