ދުނިޔޭގެ ފުރަތަމަ "ޑިޒައިނަރ ބޭބީސް" ނުވަތަ ޖީން އެޑިޓްކޮށްގެން ކުދިން އުފެއްދި ކަމަށް ބުނެ މުޅި ދުނިޔެ ސިއްސުވާލި ޗައިނާގެ ސައިންސްވެރިޔާ ހީ ޖިއާންކުއީ އަނެއްކާވެސް ބޮޑު ބަހުސެއްގެ ތެރެއަށް އަތުވެއްޖެއެވެ.

ތިން އަހަރުގެ ޖަލު ހުކުމަކަށްފަހު މިނިވަންވެ، އޭނާ މިހާރު އަމާޒު ހިފާފައިވަނީ އިންސާނުންގެ ޖީންތަކަށް ބަދަލުތައް ގެނެސްގެން އަލްޒައިމާސް (Alzheimer’s) ބަލި ދުނިޔެއިން ފުހެލުމަށެވެ.

2018 ވަނަ އަހަރު ހީ ޖިއާންކުއީ ވަނީ CRISPR-Cas9 ޓެކްނޮލޮޖީ ބޭނުންކޮށްގެން އެޗް.އައި.ވީ (HIV) އަށް ނުގުޑާނެ ފަދަ ގޮތަކަށް ދެ ކުއްޖެއްގެ ޖީން އެޑިޓްކުރިކަން އިޢުލާނު ކޮށްފައެވެ. މިކަމާ ގުޅިގެން ސައިންސްވެރިން އޭނާއަށް "ޗައިނާގެ ފްރެންކެންސްޓައިން" ގެ ނަން ދިނީ އިންސާނުންގެ އުފެދުމަށް ބަދަލު ގެނައުމުގެ ނުރައްކާތެރި ތަޖުރިބާ ތަކެއް ކުރާތީއެވެ. ޗައިނާގެ ކޯޓަކުން އޭނާ ޖަލަށްލީ "ސިއްހީ އުސޫލުތަކާ ޚިލާފަށް ކުރި ނުރައްކާތެރި މަސައްކަތެއްގެ" ގޮތުގައި ބަލާފައެވެ.

ނަމަވެސް، 2022 ގައި ޖަލުން މިނިވަންވުމަށްފަހު އޭނާ ވަނީ ބެއިޖިންގްގައި އައު ލެބޯޓްރީއެއް ހުޅުވައި، ދުނިޔޭގެ އާބާދީ ދުވަސް ވަމުންދާ މައްސަލައަށް ހައްލެއް ހޯދުމަށް ނިންމާފައެވެ.

ހީ ޖިއާންކުއީ ދާދިފަހުން ހާމަކުރި ރިސާޗް ޕްރޮޕޯސަލްގައި ބުނެފައިވަނީ، އިންސާނުންގެ އެމްބްރިޔޯގެ މަރުހަލާގައި ވަކި ޖީން ތަކަކަށް ބަދަލު ގެނެސްގެން، އެ މީހަކު ބޮޑުވާއިރު އަލްޒައިމާސް ބަލި ޖެހުމުން ރައްކާތެރި ކޮށްދެވިދާނެ ކަމަށެވެ.

އޭނާގެ މި އާ މަޝްރޫޢުގެ މައިގަނޑު ބައިތަކަކީ:

މިއުޓޭޝަން ޓެސްޓް ކުރުން:

* މީދަލުގެ އެމްބްރިއޯ ބޭނުން ކޮށްގެން، ވަކި ޖީން މިއުޓޭޝަނަކުން ސިކުނޑީގެ ސެލްތައް އަލްޒައިމާސް އިން ރައްކާތެރިކޮށްދޭތޯ ބެލުން.

އިންސާނުންގެ އެމްބްރިއޯ:

* ލެބޯޓްރީގައި އިންސާނުންގެ ފާޓިލައިޒްޑް ބިސް ތަކަށް މި ބަދަލުތައް ގެނެސް، އޭގެ ރައްކާތެރިކަން ދިރާސާ ކުރުން.

އުމުރުން ދުވަސްވީ މީހުންނަށް އޮތް ހައްލު:

ޖީން އެޑިޓިންގް އަކީ މުސްތަގުބަލުގައި އުމުރުން ދުވަސް ވުމުން ޖެހޭ ބަލިތަކަށް އޮތް ހަމައެކަނި ފަރުވާ ކަމަށް އޭނާ ގަބޫލު ކުރެއެވެ.

ކަންބޮޑުވުންތަކާއި ފާޑުކިޔުންތައް:
ދުނިޔޭގެ ސައިންސްވެރިން އަދިވެސް އޭނާއަށް ކުރަނީ އިތުބާރު ކުޑަ ނަޒަރަކުންނެވެ. ގިނަ މާހިރުން ބުނާ ގޮތުގައި، ދަރިފަނި ނުވަތަ އެމްބްރިއޯގެ ޖީންތަކަށް ބަދަލު ގެނައުމަކީ އެމީހާގެ ދަރިފަސްކޮޅަށް އެ ބަދަލުތައް ދާނެ ކަމެއް ކަމަށާއި، އޭގެ ސަބަބުން ނޭނގޭ އެތައް ބަލިތަކެއް މުސްތަޤުބަލުގައި އުފަންވެދާނެ ކަމަށެވެ.

ހީ ޖިއާންކުއީ ބުނާ ގޮތުގައި އޭނާ މިހާރު މަސައްކަތް ކުރަނީ ޤާނޫނީ އިމުގެ ތެރެއިންނެވެ.

"އަހަރެން މިހާރު މަސައްކަތް ކުރާނީ ހާމަކަން ބޮޑު ގޮތެއްގައި، ހުރިހާ ހުއްދަތަކެއް ހޯދައިގެން،" އޭނާގެ ސޯޝަލް މީޑިއާގައި ލިޔެފައިވެއެވެ.

ބައެއް ރިޕޯޓްތައް ބުނާ ގޮތުގައި ޗައިނާގައި އޭނާއަށް މިކަމުގައި ހުރަސްތައް ކުރިމަތި ވެއްޖެނަމަ، އޭނާގެ މަސައްކަތް އެމެރިކާގެ ޓެކްސަސް ފަދަ ތަނަކަށް ބަދަލު ކުރުމުގެ ވިސްނުންވެސް އޭނާ ގެންގުޅެއެވެ.
އަލްޒައިމާސް އަކީ މިހާތަނަށް ފަރުވާއެއް ހޯދިފައިނުވާ ނުރައްކާތެރި, ބައްޔަކަށް ވާއިރު، ހީ ޖިއާންކުއީގެ މި ހުށަހެޅުމަކީ ސައިންސްގެ ކުރިއެރުމެއްތޯ ނުވަތަ އިންސާނިއްޔަތަށް އޮތް ނުރައްކަލެއްތޯ ކުރެވޭ ބަހުސް ވަނީ އަނެއްކާވެސް ހޫނުވެފައެވެ. އޭނާ ދެކޭ ގޮތުގައި މިއީ "ބަލިތަކުން ސަލާމަތްވެފައިވާ މުސްތަޤުބަލެއް" ބިނާކުރުމަށް ކޮންމެހެން ކުރަންޖެހޭ މަސައްކަތެކެވެ.