ރާއްޖޭގެ ސްކޫލްތަކުގެ ބޮޑު ޗުއްޓީއަށްފަހު ދިރާސީ އާ އަހަރުގެ ކިޔެވުން މިއަދު ހެނދުނު މުޅި ރާއްޖޭގައި ފަށައިފިއެވެ.
ދޮޅުމަހެއްހާ ދުވަހުގެ ޗުއްޓީއަށްފަހު މިއަދު ކިޔެވުން ފެށިއިރު، ރާއްޖޭގެ 219 ސްކޫލެއްގައި މިއަދު ކިޔެވުން ފެށިއެވެ. ޕްރީސްކޫލުން ފެށިގެން ގްރޭޑް 12 އާ ހަމައަށް، މި 219 ސްކޫލްގައި 80،715 ދަރިވަރުން މި އަހަރު ތައުލީމު ހާސިލް ކުރަމުންދާނެއެވެ. އާ އަހަރުގެ ކިޔެވުން ފެށިއިރު 219 ސްކޫލްގައި 80،715 ދަރިވަރުންނަށް ކިޔަވައިދިނުމަށް 9،952 ޓީޗަރުން އެބަތިއްބެވެ.
ދިރާސީ އާ އަހަރުގެ ކިޔެވުން މިއަދު ފެށިގެންދިޔައިރު، ދެން ދަރިވަރުންނަށް އެންމެ އަވަހަށް ޗުއްޓީއެއް ލިބޭނީ ކުރިއަށް އޮތް ރަމަޞާން މަހުއެވެ. އެޑިއުކޭޝަން މިނިސްޓްރީން ނިންމާފައި ވަނީ ރޯދަ މަހުގެ ފުރަތަމަ ހަފްތާގައި ކިޔަވައިދިނުމަށްފަހު ސްކޫލްތައް ބަންދު ކުރާށެވެ.
އެއަށްފަހު ސްކޫލްތަކުގެ މިޑްބްރޭކް ލިބޭނީ މެއި މަހުގެ 24 ން 30 އަށެވެ. އޭގެފަހުން ފުރަތަމަ ޓާމުގެ ޗުއްޓީއަށް ސްކޫލްތައް ބަންދު ވާނީ ޖުލައި މަހުގެ 17 ން އޮގަސްޓް މަހުގެ ފުރަތަމަ ދުވަހަށެވެ. ދެވަނަ ޓާމުގެ ކިޔެވުން ފެށޭނީ އޮގަސްޓު މަހުގެ ދެވަނަ ދުވަހުއެވެ. އެއަސްފަހު މި ފެށުނު ދިރާސީ އާ އަހަރުނިމި، ބޮޑު ޗުއްޓީއަށް ސްކޫލްތައް ބަންދުވާނީ ޑިސެމްބަރު 18 އިން 2027 ވަނަ އަހަރުގެ ޖެނުއަރީ މަހުގެ 12 ވަނަ ދުވަހަށެވެ.
