ޕީއެންސީގެ ޕީޖީ ގްރޫޕްގެ ލީޑަރު، އިނގުރައިދޫ ދާއިރާގެ މެމްބަރު އިބްރާހީމް ފަލާހު، ދިވެހި ނޫސްވެރިން "އުލުބައިންދަން" ގޮވާލި މައްސަލަ ތަހުގީގު ކުރުމާއިމެދު ޕްރޮސިކިއުޓަރ ޖެނެރަލް އޮފީހުގެ ލަފައަކަށް އެދިފައިވާ ކަމަށް ފުލުހުން ބުނެފިއެވެ.
ފުލުހުން މިރޭ ބުނީ އެ މައްސަލަ ފުލުހުންގެ އިދާރާއިން ބެލުމާއިމެދު ޕީޖީގެ ލަފާ ހޯދަން އެ އޮފީހަށް ހުށަހަޅާފައިވާނެ ކަމަށެވެ. ޕީޖީގެ ލަފަޔަކަށް ފުލުހުން އެދުނު ސަބަބަކީ، އިސްލާމްދީނުގެ އަސްލަކާ ޚިލާފުނުވާ ގޮތަށް ރައްޔިތުންގެ މަޖިލީހުގެ ތަޅުމުގައި މެންބަރުން ވާހަކަ ދެއްކުމުގެ އިމްތިޔާޒް މެމްބަރުންނަށް ލިބޭ ގޮތަށް އޮތުމުންނެވެ. އިމްތިޔާޒު ލިބިގެންވާ ކަމެކެވެ.
މި މަސަލަ ފުލުހަށް ހުށަހެޅީ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިންނެވެ. މި މައްސަލައިގައި އެމްޖޭއޭއިން ނެރުނު ބަޔާނުގައި ބުނެފައި ވަނީ އިސްލާމްދީނުގެ މައިގަނޑު އަސާސްތަކުގެ ތެރޭގައި އެއްވެސް މީހަކަށް އަނިޔާވެރިވުން ހިމެނިފައި ނެތް ކަމަށެވެ. އެހެންކަމުން ލަފާހު ދެއްކި ވާހަކައަކީ އިސްލާމްދީނުގެ އަސްލަކާ ޚިލާފު ވާހަކައެއް ކަމަށެވެ.
އެމްޖޭއޭއިން ބުނެފައި ނޫސްވެރިން އުލުބައިންދަން ފަލާހު ގޮވާލުމަކީ، މީޑިޔާތަކާއި ނޫސްވެރިން ބިރުވެރިކަމެއްގެ ތެރެއަށް ވެއްޓިގެން ދިޔަ ކަމެއް ކަމަށެވެ. އަދި އެއީ މުޖުތަމައުގެ އަމަން އަމާންކަން ގެއްލިދާނެ ކަމެއް ކަމަށެވެ.
ނޫސްވެރިން އުލުބައިންދަން ފަލާހު ގޮވާލެއްވީ ރައްޔިތުންގެ މަޖިލީހަށް މިހާރު ހުށަހަޅާފައިވާ މީޑިޔާ ބިލަށް ބަހުސް ކުރަމުންނެވެ. ފަލާހު ވިދާޅުވީ ނޫސްވެރިންވީ ޖަލަށްލާން ނޫން ކަމަށާއި ނޫސްވެރިންވީ އުލުބައިންދަން ކަމަށެވެ.
