ރައީސުލްޖުމްހޫރިއްޔާގެ އޮފީހުގެ ކުރިމަތީގައި ހަދާފައި ހުންނަ "މީޑިޔާ ފެންޑާ" ގައި އިއްޔެ ނޫސްވެރިން މީޑިޔާ ބިލާ ދެކޮޅަށް އިހުތިޖާޖު ކުރަމުން ދަނިކޮށް، އެތަނަށް ރައީސުލްޖުމްހޫރިއްޔާ ނުކުމުވެޑައިގަންނަވަން ސެކިއުރިޓީން ދޫކޮށްލީ ކީއްވެތޯ، ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކު ސުވާލު އުފައްދަވައިފިއެވެ.
އެކްސްގައި މޫސަ ވިދާޅުވީ، ނޫސްވެރިން އިހުތިޖާޖު ކުރަމުން ދަނިކޮށް އެތަނަށް ރައީސް ނުކުމެވަޑައިގަންވަން ސެކިއުރިޓީން ދޫކޮށްލުމުން ހަނދާންނަށް އަންނަނީ އެމްޑީޕީގެ ފުރަތަމަ ނިމިދިޔަ ދުވަސް މަތިން ކަމަށެވެ. މޫސަ އެ އިޝާރާތް ކުރެއްވީ އެދުވަހު ސިފައިންނާއި ފުލުހުން ޖުމްހޫރީ މައިދާނަށް ނުކުމެ ސަރުކާރާ ދެކޮޅަށް އަޑު އުފުލަމުން ދަނިކޮށް އޭރުގެ ރައީސުލްޖުމްހޫރިއްޔާ އެ ސަރަހައްދަށް ނުކުމެވަޑައިގަތް ދުވަހަށެވެ.
"ސަރުކާރާމެދު ހިތްހަމަނު ޖެހިގެން ބަޔަކު މުޒާހަރާ ކުރަނިކޮށް އެމްއެންޑީއެފްގެ ސެކިއުރިޓީން ރައީސް އެތަނަށް މަގުމައްޗަށް ފައިމަގުގަ އި ނެރުނީ ކީއްވެބާއޭ ހިތަށްއެރިއެވެ؟ ރައީސް ދުއްވާނެ ކާރާއި ޖިޕާއި، ޓޭންކަރާއި ހުއްޓާ އެގޮތަށް ނެރުނީ ކިއްވެބާވައެވެ؟" މޫސަ ވިދާޅުވިއެވެ.
މޫސަ ވިދާޅުވީ ބަޔެއް ފަހަރު ރައީސުންވެސް "ގައްޑާ ވާންވެގެން" އެކަހަލަ ތަންތަނަށް ނުކުމެވަޑައިގަންނަވަން އުޅޭނެ ކަމަށެވެ.
"ނަމަވެސް މަގުމަތިން ރައީސަށް ހަމަލާއެއް ދޭންއުޅޭ ކަމަށް ހީވެގެން ސެކިއުރިޓީ މީހާ ބަޑީގެ ވަޒަން ބޭރު ކޮށްލައިފި ނަމަ އެތަށްބަޔަކު މަރުވެ ޒަޚަމްވެ މުޅިމަންޒަރު ބަދަލުވާނެއެވެ،" އިއްޔެގެ ހާދިސާއަށް އިޝާރާތް ކުރައްވައި މޫސަ ވިދާޅުވިއެވެ.
"ހަތެއް ފެބްރުއަރީގަވެސް ރައީސަކު ގަދަ ވާންވެގެން މުލީއާގެއިން ނުކުމެގެން ގޮސް ސިފައިންގެއަށް ވަނީމަ، ސިފައިން ކަންކުރި ގޮތުން މިޤައުމު އެތަށް މުސީބާތަކަށް ވެއްޓުނެވެ. ސުވާލަކީ ސިފައިންގެ ކަންކަމާ ހަވާލުވެތިބި ސިޔާސީ ބަޔަކު ރައީސަށް ލަގާއެއް ދިނުމުގެ ކޮޅުމަތި ފެންނަން ފެށީ ބާވައެވެ؟" މޫސަ އިތުރަށް ސުވާލު އުފައްދަވައި ވިދާޅުވިއެވެ.
