ގދ. ހޯނޑެއްދޫގެ އެކިތަންތަނުގައި ބަޔަކު އަލިފާން ރޯކުރާތީ އެރަށު ކައުންސިލުން ކަންބޮޑުވުން ފާޅުކޮށް ބަޔާނެއް ނެރެފި އެވެ.

އެ ބަޔާނުގައި ކައުންސިލުން ބުނީ ރަށުގެ އެކި ސަރަހައްދުތަކުގައި އަލިފާން ރޯކުރުން މިހާރު އާންމު ކަމަކަށް ވެފައިވާ ކަމަށެވެ. އެގޮތަށް އެކި ސަރަހައްދުތަކުގައި އަލިފާން ރޯކުރަމުންދާނަމަ އަލިފާނުގެ ނުރައްކާތެރި ހާދިސާތައް ހިނގުމަށް މަގުފަހިވެ ދަނޑުބިންތަކާއި ރައްޔިތުންގެ ރުއްގަހާއި މުދަލަށް ބޮޑެތިގެއްލުން ތަކެއް ލިބިދާނެ ކަމަށް ކައުންސިލުން ބުންޏެވެ.

އަލިފާނުގެ ސަބަބުން އުފެދޭ ދުމުން އަވަށްޓެރިންނަށް އުނދަގޫވާގޮތަށް އަލިފާން ރޯކުރުމަކީ ގަވާއިދު ނަންބަރު: 2019/R-995 (އާންމު އުނދަގުލާބެހޭ ގަވާއިދު) ގެ ދަށުން މަނާކަމެއް ކަމައް ކަމަށް ކައުންސިލުން ބުންޏެވެ.

އެކަށީގެންވާ ރައްކައުތެރިކަމުގެ ފިޔަވަޅު އެޅުމެއްނެތި، އާންމު ތަންތާގައި އަލިފާން ރޯކުރުމަކީ މަނާކަމެއްކަމުގައިވާތީ، މިއަދުން ފެށިގެން ހޯނޑެއްދޫގެ އެއްވެސް ތަނެއްގައި އަލިފާން ރޯކުރާނަމަ ފިޔަވަޅު އަޅާނެ ކަަމަށް ކައުންސިލުން ބުންޏެވެ.