މިއަދު ހެނދުނު މ. ހައުސްޕްލާޒާގައި ރޯވި އަލިފާނުގެ ހާދިސާއާއި ގުޅިގެން ޖުމްލަ 55 މީހަކަށް ވަގުތީ ބޯހިޔާވަހިކަން ފޯރުކޮށްދީފި ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އަލިފާނުގެ ހާދިސާ ހިނގި މ. ހައުސްޕްލާޒާއަކީ ފަޅަށް ހުންނަ އިމާރާތެކެވެ. އަލިފާން ރޯވީ މިއަދު ހެނދުނު 6:35 ހާއިރުއެވެ. އަލިފާން ރޯވުމާއެކު އެމްއެންޑީއެފްގެ އަލިފާން ނިއްވާ ޓީމުން ކުރި މަސައްކަތުން އަލިފާންގަނޑު ކޮންޓްރޯލް ކުރެވުނީ 7:50 ހާއިރުއެވެ.
އެންޑީއެމްއޭ އިން ބުނީ މި އަލިފާނުގެ ހާދިސާއާއި ގުޅިގެން އެ ސަރަހައްދުގައި ހުރި ދެ ގެއެއްގެ މައި ފެންހޮޅި ހަލާކުވެފައިވާ ކަމަށެވެ. އެހެންވެ ފެންހޮޅި ތަކަށް ލިބިފައިވާ ގެއްލުން ރަނގަޅު ކުރެވެންދެން އެ ދެގެއިން 55 މީހަކަށް ވަގުތީ ހިޔާވަހިކަން ދީފައިވާ ކަމަށެވެ. އެއީ 35 ދިވެއްސަކާއި 20 ބިދޭސީއެއް ކަމަށްވެސް އެ ސެންޓަރުން ވަނީ ބުނެފައެވެ.
