މިއަދު ޓޫރިޒަމް މިނިސްޓަރު ކަމުން ރައީސް ޑރ. މުއިއްޒު ވަކިކުރެއްވި، އިބްރާހީމް ފައިސަލަކީ، ރައީސް މުއިއްޒުގެ ވެރިކަން ގެނައުމަށް ވަރަށް ބުރަކޮށް މަސައްކަތް ކުރި ބޭފުޅެއް ކަމަށާއި ފައިސަލް ވަޒީރު ކަމުން ވަކިކުރުމަކީ "ވަރަށް ދެރަވަރުކޮށް" ހިނގައިދިޔަ ކަމެއް ކަމަށް ފައިސަލްގެ ބައްޕާފުޅު އަދި ރައްޔިތުންގެ މަޖިލީހުގެ ރައީސް އަބްދުއްރަޙީމް އަބްދުﷲ (އަދުރޭ) ވިދާޅުވެއްޖެއެވެ.

ރާއްޖޭގެ މީޑިޔާއަކަށް އަދުރޭ ވިދާޅުވީ، ކުއްލި ގޮތަކަށް ފައިސަލް މިނިސްޓަރު ކަމުން ވަކިކުރެވިގެން ދިޔައީ ކީއްވެގެންކަން އޭނާއަށް އެނގިވަޑައިނުގަންނަވާ ކަމަށެވެ. އަދި ވަކި ކުރެއްވުމުގެ ކުރިން އެކަމުގެ އެއްވެސް މައުލޫމާތެއް އޭނާއަށްވެސް އެނގިވަޑައިގެންފައި ނެތް ކަމަށެވެ.

"ވަރަށް ދެރަވަރުކޮށް މިދިޔައީ. މިކަން މިގޮތަށް ބަދަލުވާން ޖެހޭ ސަބަބެއް ނޭނގޭ." އަބްދުއްރަޙީމް ވިދާޅުވިއެވެ.

އަދުރޭ ވިދާޅުވީ، ވެރިކަން ފެށިގެން އައިއިރު ރައީސް މުއިއްޒުއާއި އޭނާއާ ދެމެދު އޮތް ގާތް ގުޅުން މިހާރު އޮތް ކަމަށް ދެންނެވެން ނެތް ކަމަށެވެ.

"މިވެރިކަން ފެށުނުއިރު އޮތް ގާތްގުޅުމާއި އިތުބާރު އޮތް ނަމަ މިކަން މިގޮތަށް ނުހިނގާނެ." އަބްދުއްރަޙީމް ވިދާޅުވިއެވެ.

އޭނާ ވިދާޅުވީ، ސަރުކާރު ތެރެއިން އިސްބޭފުޅުންތަކެއް، ފައިސަލްގެ ޝަކުވާ ރައީސް މުއިއްޒުގެ އަރިހުގައިި ކުރައްވާކަން އެނގިވަޑައިގަންނަވާ ކަމަށެވެ. ނަމަވެސް އެއީ އެއްވެސް ހަގީގަތެއް ނެތް ވާހަކަތަކެއް ކަމަށާއި، ސަރުކާރަށް ގެއްލުމެއްވާނެ އެއްވެސް ކަމެއް ފައިސަލްވެސް އަދި އޭނާވެސް ނުކުރައްވާނެ ކަމަށް ވިދާޅުވިއެވެ.