ދިވެހި ސިފައިންނާއި ދިވެހި ފުލުހުންނަނީ ސިޔާސީ ޕާޓީތަކަށް ވެއްްދޭ ބަޔެއް ނޫން ކަމަށާއި، ނަމަވެސް ދާދިފަހުން ޕީއެންސީއަށް މީހުން ވެއްދިއިރު "ވަގު ފޯމު" ތަކުގެ ތެރެއިން ސިފައިންނާއި ފުލުހުންވެސް ޕީއެންސީއަށް ވައްދާފައިވާ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ރޭ ޕީއެންއެފް އިން ބޭއްވި ބައްދަލުވުމުގައި ޔާމީން ވިދާޅުވީ، ސިފައިންނާއި ފުލުހުންނަށް ސިޔާސީ ޕާޓީތަކުގައި ނޫޅެވޭނެ ކަމަށް ޤާނޫނުގައިވެސް އެބައޮތް ކަމަށެވެ. އެހެންކަމުން ޕީއެންސީން ވެއްދި އެ ފޯމުތައް ސައްޙަ ނުވާނެ ކަމަށް ޔާމީން ވިދާޅުވިއެވެ.
ޕީއެންސީން ފުރާފައިވާ ފޯމުތަކުގައި އެއްވެސް މައްސަލައެއް އޮތް ނަމަ، އެ ޕާޓީއަށް އެކަން ހުށަހަޅަން ބުނެފައިވާ ކަމަށާއި، އެކަމަކު އެ މައްސަލަ ބަލާ ޕީއެންސީގެ ކޮމިޓީގައި ތިބީ "ވަގުން" ކަމަށް ޔާމީން ތުހުމަތު ކުރެއްވިއެވެ.
ޔާމީން މިފަދައިން ވިދާޅުވިއިރު، ޑީއެންއާރު ތެރެއިން އާންމު ރައްޔިތުންގެ މައުލޫމާތު ނަގައި، ޕީއެންސީއަށް ފޯމު ފުރިކަމުގެ ތުހުމަތު އެ ޕާޓީއަށް ވަނީ އަމާޒު ވެފައެވެ. އަދި ގިނަބަޔަކު ދަނީ އެމީހުންނަށް ނޭނގި ޕީއެންސީއަށް ވައްދާފައިވާ ކަމަށް ބުންނަމުންނެވެ.
އެގޮތުން މި މައްސަލަ އެންމެ ބޮޑަށް ފެންމަތިވީ ރައްޔިތުންގެ މަޖިލީހުގެ މެމްބަރަކު، ހުންނެވި ޕާޓީން އުނިކޮށް ޕީއެންސީއަށް ބަދަލުކުރި ހިސާބުންނެވެ.
