ރައްޔިތުންގެ މަޖިލީހުގެ ދައުރުން ބޭރުގައި ޖަލްސާއެއް ބާއްވަން ނިންމައި، އެ ޖަލްސާ ބުރާސްފަތި ދުވަހަށް އެޖެންޑާ ކޮށްފިއެވެ.

ބުރާސްފަތި ދުވަހު ހެނދުނު ނުވައެއް ޖަހާއިރަށް އެޖެންޑާ ކޮށްފައިވާ މި ޖަލްސާގެ އެޖެންޑާގައި އޮތީ، މޯލްޑިވްސް ބްރޯޑްކާސްޓިން ކޮމިޝަނާއި އިލެކްޝަން ކޮމިޝަންސަށް ދެ މެންބަރުން އައްޔަން ކުރުމާމެދު ކޮމިޓީން ނިންމާފައިވާ ގޮތާމެދު މަޖިލީހުން ގޮތެއް ނިންމައި ވޯޓަށް އެހުމަށެވެ.

މީގެއިތުރުން، ހިއުމަން ރައިޓްސް ކޮމިޝަން (އެޗްއާރުސީއެމް) ގެ ނައިބު ރައީސާއި އެންޓި ކޮރަޕްޝަން ކޮމިޝަން (އޭސީސީ) ގެ ހުސްވެފައިވާ ދެ މަގާމަށް އައްޔަން ކުރާ ދެ މެންބަރުންނަށް ރުހުން ހޯދުމަށް ކޮމިޓީއަށް ފޮނުވުންވެސް ބުރާސްފަތީގެ ޖަލްސާގެ އެޖެންޑާގައި ޖަހާފައިވެއެވެ.

މި ކަންކަމަށް ދައުރުން ބޭރުގައި ޖަލްސާއެއް ބާއްވަނީ، ބައެއް މިނިވަން މުއައްސަސާތަކަށް މެމްބަރުން އައްޔަން ކުރަން ގާނޫނުގައި ބުނާ 60 ދުވަހުގެ މުއްދަތު ހަމަވާތީއެވެ.