ދިވެހި ރައްޔިތުންގެ ޒާތީ މައުލޫމާތު ވަގަށް ނަގައިގެން ސިޔާސީ ޕާޓީތައް ބަދަލު ކުރުވުމުގައި އުޅޭ މީހުން ހޯދައި ހޯދައި ޖިނާއީ ތަހުގީގެއް ހިންގުމަށް އެމްޑީޕީގެ ރައީސް އަބްދުﷲ ޝާހިދު މިއަދު ގޮވާލައްވައިފިއެވެ.
ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ޙުސައިން ޒިޔާދު (ފިއްޓޭ) އަށް އެނގިވަޑައިގަތުމަކާނުލައި، އެމްޑީޕީ އިން ވަކިކޮށް ޕީއެންސީއަށް ބަދަލުކުރި މައްސަލައިގައި އެކްސްގައި ޝާހިދު މިއަދު ވިދާޅުވީ، އެއީ ވަރަށް ކަންބޮޑުވުން ހުރި މައްސަލައެއް ކަމަށެވެ.
ސަބަބެއް ކަމަށް ޝާހިދު ވިދާޅުވީ، މިވަގުތަކީ ރައްޔިތުންގެ މަޖިލީހުގެ މެމްބަރަކު ޕާޓީ ބަދަލު ކުރައްވައިފިކަން އިލެކްޝަން ކޮމިޝަނުން ކަނޑައަޅައިފި ހިނދެއްގައި މަޖިލީހުގެ މެމްބަރުކަމުގެ ގޮނޑި ގެއްލިގެންދާނެ އިސްލާޙެއް ޤާނޫނު އަސާސީއަށް ގެނެވިފައިވާ ވަގުތަކަށް ވުމެވެ.
ޝާހިދު ވިދާޅުވީ، ދިވެހިންނަށް ލިބުނު ފެހި ޤާނޫނު އަސާސީގެ ދަށުން އުފެދިފައިވާ އެންމެ މުހިންމު އެއް ކޮމިޝަނަކީ އިލެކްޝަން ކޮމިޝަން ކަމަށާއި، އެކޮމިޝަނާމެދު ދިވެހި ރައްޔިތުންގެ ހިތުގައި އޮންނަންޖެހޭ އިތުބާރު ގެއްލުނަ ނުދީ ހިފެހެއްޓުމަށް އިތުރަށް މަސައްކަތް ކުރެއްވުމަށް ކޮމިޝަނުގެ މެމްބަރުންނަށް އިލްތިމާސް ކުރައްވާ ކަމަށެވެ.
"އަދި މީގެއިތުރުން ދިވެހި ރައްޔިތުންގެ ޒާތީ މަޢުލޫމާތު ވަގަށް ނަގައި ސިޔާސީ ޕާޓީއަކަށް މެމްބަރުން އިތުރު ކުރުމަށް ކުރަމުންދާ މަސައްކަތުގައި ބައިވެރިވާ ފަރާތްތައް ހޯދުމަށްޓަކައި ޖިނާއީ ތަޙުޤީގެއް ފުލުހުން ހިންގުމަށް ގޮވާލަމެެވެ." ޝާހިދު ވިދާޅުވިއެވެ.
"އައިޑީކާޑު ޔުނިޓުން ވައްކަންކުރި ވާހަކަ. މިއީ އަޅުގަނޑުމެން ލުއިކޮށް ދައްކަމުން ދިޔަސް ހަގީގަތުގައި ވަރަށް ކަންބޮޑުވާންޖެހޭ ވަރަށް ބޮޑު މައްސަލައެއް. އައިޑީކާޑު ޔުނިޓަކީ ދިވެހި ރައްޔިތަކާ ދިމާވީމާ އެމީހެއްގެ ހުރިހާ މައުލޫމާތު ތަކެއް ދައުލަތެއްގެ ގޮތުގައި ރައްކާކުރެވޭތަން. އެތަނުގެ މައުލޫމާތު ނަންގަވައިގެން، ބޭނުން ކުރައްވައިގެން، ވަގަށް ބޭނުން ކުރައްވައިގެން، ޕާޓީގެ އަދަދު އިތުރު ކުރެއްވުމަށް މަސައްކަތް ކުރެއްވިކަން އެއީ އަޅުގަނޑު ވަރަށް ކަންބޮޑުވާކަމެއް" އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމެއްގައިވެސް އެކަމަށް އިޝާރާތް ކުރައްވައި ޝާހިދު ވިދާޅުވިއެވެ.
ފިއްޓޭއަށް އެނގިވަޑައިނުގެން، އެމްޑީޕީ އިން ވަކިކޮށް ޕީއެންސީއަށް ވެއްދި މައްސަލައިގައި މިއަދު އެމްޑީޕީން ވަނީ އިލެކްޝަން ކޮމިޝަނުގެ މެމްބަރުންނާވެސް ބައްދަލު ކޮށްފައެވެ. އިލެކްޝަންސް ކޮމިޝަނުން މިހާރު ވަނީ ޕީއެންސީން ފިއްޓޭގެ ނަން ނަގައި، އަލުން އަނބުރައި އެމްޑީޕީއަށް ފިއްޓޭ ވައްދާފައެވެ.
އިލެކްޝަން ކޮމިޝަނުން ބުނެފައި ވަނީ މަޖިލީހުގެ މެމްބަރުން ޕާޓީ ބަދަލުކޮށްފިނަމަ، އެލާޓެއް އަންނަ ސިސްޓަމެއް ކޮމިޝަނުގައި އިންނަ ކަމަށާއި، ނަމަވެސް ކުރީގެ މެމްބަރުން އެ ލިސްޓުން ނެގިއިރު ފިއްޓޭގެ ނަންވެސް ނެގިފައިވުމުން އެލާޓް ނައިސް އިނީ ކަމަށެވެ. އެހެންކަމުން ފިއްޓޭގެ މައްސަލަ މިގޮތަށް ދިމާވީ އެ ކޮމިޝަނުގެ އިދާރީ މައްސަލައަކާއި ގުޅިގެން ކަމަށްވެސް ބުނެފައިވެއެވެ.
އެމްޑީޕީ އިން ބުނީ ފިއްޓޭގެ ނަމުގައި "ވަގު ފޯމު" އިލެކްޝަނަށް ލާފައި ވަނީ މުއްދަތު ހަމަވެފައިވާ ފޮޓޯއެއް ބޭނުންކޮށްގެން ކަމަށެވެ.
