ދިވެހިންގެ މެދުގައި އޮތް އެއްބައިވަންތަކަން ވަރުގަދަ ކުރުމަށްޓަކައި ރައްޔިތުންގެ މެދުގައި ރައްޔިތުންގެ މެދުގައި އޮންނަ ތަފާތު ކުރުންތައް ނައްތާލައި، ހަމަހަމަކަން ގާއިމް ކުރަންޖެހޭނެ ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.

ދިވެހިރާއްޖޭގައި މިއަދު ފާހަގަ ކުރަމުން އަންނަ "އެއްބައިވަންތަ ކަމުގެ ދުވަސް" ގެ މުނާސަބަތުގައި ސޯޝަލްމީޑިޔާގައި ޝާހިދު މިއަދު ކުރެއްވި ޕޯސްޓެއްގައި ވިދާޅުވީ، ޤައުމުގައި ރައްޔިތުންގެ ކިބައިން ލިބިދޭ ބާރަކުން، ތިމާކުރާ ވެރިކަމެއްގައި، އިރުއަރާ އޮއްސޭ ކޮންމެ ދުވަހަކުވެސް އިސްކަންދޭން ޖެހޭނީ ޤައުމީ އެއްބައިވަންތަކަން ދެމެހެއްޓުމަށް ކަމަށެވެ.

އެއްބައިވަންތަ ކަމުގެ ދުވަހާއި ގުޅުވައި ޝާހިދު ކުރެއްވި ޕޯސްޓުގައި އިތުރަށް ވިދާޅުވީ، 2004 ވަނަ އަހަރުގެ ޑިސެންބަރު މަހުގެ 26 ވަނަ ދުވަހަކީ ސުނާމީގެ ލޮނުގަނޑު ރަށްތަކަށް އަރައި ފައިބައިގެންދިޔަ ބިރުވެރި ދުވަސް ކަމަށާއި، އެދުވަހު ސުނާމީއާއި ގުޅިގެން އެތައްބަޔެއްގެ ފުރާނަ ގެއްލި އަދި އެތައް ދިވެހިންނެއް، ދިރިއުޅުމަށް ކުރަމުންދިޔަ މަސައްކަތް މުޅިން ނެތިގެންދިޔަ ކަމަށެވެ.

‏"އެދުވަހު ދިވެހިންގެ ހިތްތަކަށް ވެރިވެފައި އޮތް މޮޅިވެރިކަމާ، މާޔޫސްކަމާ، ލޮލުން ފައިބައިގެން ދިޔަ ކަރުނަޔާއެކުވެސް ދިވެހިން، އެކަކު އަނެކަކަށް އެހީވުމުގައި ރީތި ނަމޫނާއެއް ދެއްކި" ޝާހިދު ވިދާޅުވިއެވެ.

ދިވެހިރާއްޖޭގެ "އެއްބައިވަންތަ ކަމުގެ ދުވަސް" އަކީ 26 ޑިސެމްބަރެވެ. އެއީ 2004 ވަނަ އަހަރުގެ ޑިސެމްބަރު މަހުގެ 26 ވަނަ ދުވަހު ހެނދުނުގެ ވަގުތެއްގައި އިންޑޮނޭޝިޔާގެ ސުމަޓްރާއަށް އައި ބާރުގަދަ ބިންހެލުމާއި ގުޅިގެން ރާއްޖެއަށްވެސް އޭގެ އަސަރުކޮށް ރާއްޖޭގެ ނުވަ ރަށެއް ފިޔަވައި ދެން ބާކީ ހުރި ހުރިހާ ރަށްތަކަށް ސުނާމީގެ ބިޔަ ރާޅުތައް އެރި ދުވަހެވެ. އެދުވަހުގެ ބިޔަ ރާޅުތަކާއެކު ރަށްރަށަށް އެރި ލޮނުގަނޑުގައި އެތައް ބަޔެއްގެ ފުރާނަ ގެއްލި، ގެދޮރު ގެއްލިފައިވެއެވެ. އެދުވަހު ރާއްޖެއިން 82 މީހުން މަރުވިއެވެ. އަދި 26 މީހަކު ވީނުވީއެއް ނޭނގި ވަނީ ގެއްލިފައެވެ. އެ ބިރުވެރި ކާރިސާގައި ރާއްޖެއިން 15000 މީހުންގެ ގެދޮރު ގެއްލިގެން ދިޔައެވެ.

އެދުވަހުގެ ކާރިސާގައި ދިވެހިންގެ ތެރެއިން ފެނިގެން ދިޔައީ އެއްބައިވަންތަކަމުގެ ލާމަސީލު ނަމޫނާއެވެ. ހާލުގައި ޖެހުނު މީހުންނަށް އެހީތެރިކަން ފޯރުކޮށްދިނުމުގައި ފެނިގެން ދިޔައީ އެއްވެސް މީހަކު ތަފާތު ކުރުމެއް ނެތި ހުރިހާ ރައްޔިތުންގެ ފަރާތުންވެސް އެއްބައިވަންތަކަމުގެ ރޫހުގައި މަސައްކަތް ކުރަމުންދިޔަ މަންޒަރެވެ.