ހުޅުމާލޭގައި ހުންނަ ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ)އިން ވަގަށް ގެންގޮސްފައިވާ ލެޕްޓޮޕްތައް މިހާރު ހޯދިފައިވާ ކަމަށް ފުލުހުން މިއަދު ބުނެފިއެވެ.
ރޭގެވަގުތެއްގައި އެޗްޑީސީން ގެއްލިފައިވާ ކަމަށް ފުލުހުން ބުނީ ފަސް ލެޕްޓޮޕެވެ. ފަސް ލެޕްޓޮޕްވެސް މިހާރު ފެނިފައިވާ ކަމަށް ފުލުހުން ބުންޏެވެ. މި ލެޕްޓޮޕްތައް ވަގަށް ނަގާފައިވަނީ ފޭސް ދޭއްގައި ހުންނަ އެޗްޑީސީގެ ޕްރޮޖެކްޓް އޮފީސް ތެރެއިންނެވެ. މި އޮފީސް ހުންނަނީ ފޭސް ދޭއްގެ ފަރުކޮޅުފުށީގައެވެ.
ފުލުހުން ބުނިގޮތުގައި ލެޕްޓޮޕްތައް ވަގަށް ނެގި މީހާ މިހާރުވެސް ވަނީ މަސްތުވާތަކެތީގެ މައްސަލައެއްގައި ހައްޔަރުގައެވެ.
އެޗްޑީސީގެ ޕްރެޮޖެކްޓް އޮފީހުން ލެޕްޓޮޕްތަކެއް ގެއްލިގެން ރޭ އެ ވާހަކަ އާންމުވިއިރު، ހުޅުމާލެއިން ގޯތިތަކެއް ވަގަށް ދޫކުރި މައްސަލައިގައި އެޗްޑީސީގެ އިސްވެރިންތަކެއް ވަނީ ސަސްޕެންޑްކޮށް ތަހުގީގުވެސް ފަށާފައެވެ.
