ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އުފެއްދި ސެޓްލްމެންޓް ކޮމިޓީން ނިންމި ނިންމުމާއި ގުޅިގެން، އެކި ކަންކަމަށް، އެކި ފަރާތްތަކަށް ބަަދަލުދިން މައްސަލައިގައި އޭރު އޮތް އިކޮނޮމިކް ކައުންސިލްގެ ކޯޗެއާ, ރައީސް އިބްރާހީމް މުހައްމަދު ސާލިހާއި އިކޮނޮމިކް މިނިސްޓަރު ފައްޔާޒް އިސްމާއީލް އާއި ރައީސް އޮފީހުގެ ކުރީގެ މިނިސްޓަރު އަލީ ޝިޔާމްގެ މައްޗަށް ޖިނާއީ ތަހުގީގެއް ހިންގައި ދައުވާ ކުރަން ޕްރޮސިކިއުޓާ ޖެނެރަލް އައްބާސް ޝަރީފަށް އަންގަން ރައްޔިތުންގެ މަޖިލީހުގެ މާލިއްޔަތު ކޮމިޓީން ފާސް ކޮށްފިއެވެ.

ދައުލަތުން އެކި ފަރާތްތަކަށް ބަދަލުގެ ގޮތުގައި ދީފައިވާ ފައިސާއާ ގުޅޭ މައްސަލައާމެދު މަޝްވަރާކޮށް ގޮތެއް ނިންމުމަށް މިއަދު ބޭއްވި މާލިއްޔަތު ކޮމިޓީގެ ބައްދަލުވުމުގައި އެބޭފުޅުންގެ މައްޗަށް ތަހުގީގު ހިންގައި ދައުވާ ކުރުމަށް ހުށަހެޅުއްވީ، ފުނަދޫ ދާއިރާގެ މެންބަރު މުހައްމަދު މަމްދޫހެވެ. ތާއީދު ކުރެއްވީ ކެލާ ދާއިރާގެ މެންބަރު އަބްދުﷲ ޝަރީފެވެ.

ކޮމިޓީން އެގޮތަށް ފާސްކުރި ނިންމުމުގައި ވަނީ، ދައުލަތުގެ އިސް މަގާމެއްގައި ހުރެ, ގާނޫނު އަސާސީ އާއި ގާނޫނުން މަތިކޮށްފައިވާ ވާޖިބުތަކާ ޚިލާފަށް, ދައުލަތުގެ މުދަލާއި ފައިސާއަށް ޚިޔާނާތްތެރިވެ, އެ ފައިސާ އާއި މުދަލުގެ ހައްގުވެރިން ފިޔަވައި އެހެން ފަރާތަކަށް ލިބިދިނުމަށް މަސައްކަތް ކޮށްފައިވާ ކަމަށް ތުހުމަތު ކުރެވޭ ކަމަށެވެ.

އެހެން ކަމުން އެ ފަރާތްތަކުގެ މައްޗަށް ޖިނާއީ ތަހުގީގެއް ކުރުމަށް ޕީޖީއަށް ދެންނެވުމަށް ފެންނަ ކަމަށާއި ދައުވާ ކުރެވޭ ވަރަށް ހެކި ލިބިއްޖެ ނަމަ ދައުވާ ކޮށްދިނުމަށް ދެންނެވުމަށް ވަނީ އެދިފައެވެ.

މީގެއިތުރުން, 2019 ވަނަ އަހަރުން 2023 ވަނަ އަހަރަށް ބަދަލު ދިނުމުގެ އުސޫލުގެ ދަށުން ސޮއި ކޮށްފައިވާ އެއްބަސްވުން ތަކަކީ އުފެދުމުގައިވެސް ބާތިލް އެއްބަސްވުން ތަކެއް ކަމުގައި ކޮމިޓީއަށް ފެންނަ ކަމަށް ކަނޑައި އެ އެއްބަސްވުންތައް ބާތިލް ކަމަށްވެސް އެ ބައްދަލުގައިވެއެވެ.