ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ)އިން ވިޔަފާރި އުސޫލުން މީގެކުރިން ދޫކޮށްފައި ހުރި ބިންތަކުގެ ކުލިން ނުލިބި ހުރި ފައިސާގެ ތެރެއިން، 226 މިލިޔަން ރުފިޔާ މިހާތަނަށް ހޯދިއްޖެ ކަމަށް އެ ކުންފުނީގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީގައި މިއަދު ވާހަކަ ދައްކަވަމުން ފަޒުލް ވިދާޅުވީ، ކުންފުންޏާ ހަވާލުވީއިރު، 226 މިލިޔަން ރުފިޔާ ލިބުނުއިރު، އެ ކުންފުންޏަށް ލިބެންޖެހޭ 1.4 ބިލިއަން ރުފިޔާ އެބަހުރި އޮތް ކަމަށެވެ.
ފަޒުލް ވިދާޅުވީ، އެޗްޑީސީއަށް ލިބެންޖެހޭ ފައިސާ ހޯދުމަށްޓަކައި އޭނާ ކުންފުންޏާ ހަވާލުވުމަށްފަހު ޚާއްސަ ކޮމިޓީއެއް އެކަމަށް ނެގި ކަމަށެވެ.
"އެ ރިކަވަރީ ކޮމިޓީގެ މަސައްކަތުން 226 މިލިއަން އަޅުގަނޑުމެން ރިކަވާކޮށްފިން މިއަދު،" ފަޒުލް ވިދާޅުވިއެވެ.
ފަޒުލް ވިދާޅުވީ، ފައިސާ ނުދައްކައި ހުރި ވިޔަފާރި ތަކަށްވެސް ސިޓީ ފޮނުވަމުންދާ ކަމަށާއި، އެ ފައިސާ ހޯދަން މަސައްކަތް ކުރަމުން އަންނަ ކަމަށެވެ. އަދި ނޯޓިސްއަށް އިޖާބަނުދޭ މައްސަލަ ކޯޓާ ހަމައަށް ގެންދިޔުމުގެ ވިސްނުން ގެންގުޅުއްވާ ކަމަށެވެ. ނަމަވެސް، ކޯޓާ ހަމައަށް ދާނީ ފައިސާ ދެއްކުމުގެ އެއްވެސް ކަމެއް ނުކުރާ ވިޔަފާރިތައް ގޮވައިގެން ކަމަށް ވިދާޅުވިއެވެ.
"އެ ފަރާތަކަށްވެސް އުނދަގޫ ނުވާނެހެން ފަސޭހެވާނެ ގޮތަަކަށް އެކި މަރުހަލާއަށް ބަހާލައިގެން ފައިސާ ދެއްކުމުގެ ފުރުސަތު އެބައޮތް. މި ފުރުސަތު އަޅުގަނޑުމެން މިދެނީ ކޯޓު މަރުހަލާ އެއްކައިރި ކުރުމަށްޓަކާ،" އޭނާ ވިދާޅުވިއެވެ.
