ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން ބަލި މީހަކަށް ދީފައިވާ އެހީގެ ތަފްސީލާއެކު އޭނާގެ ޒާތީ މައުލޫމާތުތައް ސޯޝަލް މީޑިޔާގައި އާންމު ކުރެވިފައިވާތީ، އެކަމަށްޓަކައި އެންސްޕާއިން މާފަށް އެދިއްޖެއެވެ.
ކެންސަރު ބައްޔަށް ފަރުވާ ކުރަމުން އަންނަ މީހަކަށް އެންސްޕާއިން މީގެކުރިން ދީފައިވާ އެހީ މިފަހަރު ދީފައިނުވާ ކަމަށް ބުނެ، އެމީހާގެ ގާތް މީހަކު ސޯޝަލް މީޑިޔާގައި އެ ވާހަކަ ދެއްކުމުން އެންސްޕާއިން ވަނީ އެކަން ދޮގުކޮށް މީގެކުރިން ބަޔާނެއް ނެރެފައެވެ. އަދި އެ ބަޔާނުގައި އެ ބަލި މީހާއަށް އެތަނުން ދީފައިވާ އެހީތަކުގެ ތަފްސީލު ވަނީ ސޯޝަލް މީޑިޔާގައި އާންމު ކޮށްފައެވެ.
އެންސްޕާއިން ބަލި މީހަކަށް ދީފައިވާ އެހީތަކާއެކު އޭނާގެ ޒާތީ މައުލޫމާތު ސޯޝަލް މީޑިޔާގައި އާންމު ކުރުމާއެކު ގިނަ ބަޔެއްގެ ފާޑުކިޔުން އެންސްޕާއަށް އަމާޒުވިއެވެ. އެއާއެކު އެންސްޕާއިން ރޭ ވަނީ މާފަށް އެދި ނޫސްބަޔާނެއް ނެރެފައެވެ.
މާފަށް އެދި ނޫސްބަޔާން ނެރުމަށްފަހު، އެންސްޕާއިން ވަނީ ބަލިމީހާއަށް ދޫކުރި އެހީގެ ތަފްސީލުތައް އެންސްޕާގެ ސޯޝަލް މީޑިޔާގެ އެކައުންޓް ތަކުން ޑިލީޓް ކޮށްލާފައެވެ. އަދި ބަލި މީހާއަށް ދީފައިވާ އެހީތަކުގެ ތަފްސީލު އާންމު ކުރުމަކީ އެ ފަރާތަށް ކުރެވުނު ނުރަނގަޅު ކަމެއް ކަމަށްވެސް ބުނެފައެވެ.
