ސަރުކާރުގެ ވަޒީފާތަކުގައި އުޅޭ މީހުންގެ ތެރެއިން އިދާރާ ތަކުން އަލަށް ރިޓަޔާވާ މީހުންނަށް ކޮންމެ މަހަކު ދެމުން އަންނަ އެލަވަންސް ކަނޑާލަން ސަރުކާރުން ނިންމައިފިއެވެ.

ފިނޭންސް މިނިސްޓްރީން ބުނީ ސަރުކާރުގެ އިދާރާ ތަކަށްވެސް އެކަން ހުސްވި ހަފްތާގައި އަންގާފައިވާނެ ކަމަށެވެ. އެކަން އަންގައި ފިނޭންސް މިނިސްޓްރީން އިދާރާތަކަށް ފޮނުވި ސިޓީގައި ވަނީ އަންނަ އަހަރުގެ ޖެނުއަރީ މަހުން ފެށިގެން އަމަލ ުކުރަން ފަށާ އެ އުސޫލުގެ ދަށުން، ރިޓަޔާ ކުރާ މީހުންނަށް ކޮންމެ މަހަކު ލިބޭ އެލަވަންސް ދެން ނުލިބޭނެ ކަމަށެވެ. ނަމަވެސް ރިޓަޔާ ކުރާ މުވައްޒަފުންނަށް ގަނޑުކޮށް ދޭ ފައިސާ ދެމުންދާނެ ކަމަށްވެސް އެ ސިޓީގައިވެއެވެ. އަދި އެ ފިޔަވަޅު އެޅީ ސަރުކާރުގެ ޚަރަދު ކުޑަކުރަން ކަމަށްވެސް ވަނީ ބުނެފައެވެ.

ޑަބަލް ޕެންޝަނަށް ދިނުން ހުއްޓާލިއިރު، މި ޕެންޝަނުން އެންމެ ގިނައިން ޚަރަދު ކުރަންޖެހޭ މުއައްސަސާތަކުގެ ތެރޭގައި ފުލުހުންނާއި ސިފައިން ހިމެނެއެވެ.

ފިނޭންސް މިނިސްޓްރީން ޝާއިއުކޮށްފައިވާ ހުދު ކަރުދާހެއްގައިވާ ގޮތުން ސަރުކާރުގެ އެހެން އިދާރާތަކާ އަޅާބަލާއިރު ފުލުހުންނާއި ސިފައިންނާއި ކަސްޓަމްސްގެ މުވައްޒަފުން ރިޓަޔާ ކުރާ އުމުރު ހަގެވެ. އެގޮތުން ފުލުހުންނާއި ކަސްޓަމްސް މުވައްޒަފުން ރިޓަޔާ ކުރާ އެވްރެޖް އުމުރަކީ 50.47 ކަމަށްވާއިރު ސިފައިންގެ އެވްރެޖަކީ 46.16 އަހަރެވެ. ނަމަވެސް އެހެން އިދާރާ ތަކުން ރިޓަޔާ ކުރާ އެވްރެޖް އުމުރު 61.63އަށް އަރައެވެ.