2028 ވަނަ އަހަރު އޮންނަ ރިޔާސީ އިންތިޚާބުގައި އެމްޑީޕީގެ ފަރާތުން ރިޔާސީ ޓިކެޓަށް ވާދަކުރުމާއި ނުކުރުމުގައި މިހާރުވެސް ގޮތެއް ނިންމަވާފައިވާ ކަމަށާއި، އެ ނިންމުން އެމްޑީޕީގެ އިސްބޭފުޅުންނާ ޙިއްސާ ކުރައްވާފައިވާނެ ކަމުގައި ކުރީގެ ރައީސް އިބްރާހީމް މުޙަންމަދު ސޯލިހު ވިދާޅުވެއްޖެއެވެ.

ރާއްޖެ ޓީވީގައި މިއަދު ހެނދުނު ވާހަކަ ދައްކަވަމުން އިބޫ ވިދާޅުވީ ރިޔާސީ އިންތިޚާބުގައި އެމްޑީޕީގެ ޓިކެޓަށް ވާދަކުރުމުގެ ޝައުގުވެރިކަން ހަތަރުފަސް ބޭފުޅަކު ޝައުގުވެރިކަން ފާޅުކޮށްފައިވާ ކަމަށެވެ. އަދި ރިޔާސީ އިންތިޚާބުގައި ރިޔާސީ ޓިކެޓާމެދު އިބޫ ނިންމަވާފައިވާ ނިންމުން ޕާޓީގެ އިސްބޭފުޅުންނަށް ޝައްކެއް ނެތް މިންވަރަށް މިހާރު ސާފުވެވަޑައިގެންފައިވާނެ ކަމަށްވެސް އިބޫ ވިދާޅުވިއެވެ.

އިބޫ ވިދާޅުވީ، ރިޔާސީ އިންތިޚާބުގައި ވާދަކުރައްވާނެކަން ނުވަތަ ނޫންކަން މިވަގުތު އާންމުންނަށް އިއުލާނު ކުރައްވަން ބޭނުންފުޅުނުވަނީ ޕާޓީއަށް އެކަމުގައި ދެރައެއް ވެދާނެތީ ކަމަށެވެ. ނަމަވެސް އާންމުކޮށް އެވާހަކަ އިއުލާނު ކުރައްވާ ހިސާބަށް ދިޔުމުން އިއުލާނު ކުރައްވާނެ ކަމަށްވެސް އިބޫ ވިދާޅުވިއެވެ.