ރައްޔިތުންގެ މަޖިލީހަށް މިހާރު ހުށަހަޅާފައިވާ މީޑިޔާ ކޮމިޝަނުގެ ބިލާމެދު ކަންބޮޑުވުން ފާޅުކުރައްވައި، ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް މިއަދު މަޖިލީހަށް ހުށަހަޅުއްވަން އޮތް ކުއްލި މައްސަލަ ރިޔާސަތުން ބަލައިގެން ދޫކޮށްލައްވައިފިއެވެ.
މަޖިލީހުގެ ރައީސް އަބްދުރަޙީމް އަބްދުﷲ ވިދާޅުވީ، އެ ކުއްލި މައްސަލަ ބަލައިގަނެވެން ނެތީ، ކުއްލި މައްސަލަ ހުށަހަޅަން އޮންނަ، ޝަރުތު ހަމަނުވާތީ ކަމަށެވެ. މަޖިލީހުގެ ރައީސް ވިދާޅުވީ، މެންބަރު މީކާއިލް ހުށަހަޅުއްވާފައިވާ ކުއްލި މައްސަލައެއް ރިޔާސަތަށް ލިބިފައިވާ ކަމަށެވެ. ނަމަވެސް އެ މައްސަލައިގެ ޝަރުތު ހަމަނުވާތީ ބަލައިގަނެވެން ނެތް ކަމަށެވެ.
މީކާއިލް ހުށަހެޅުއްވި ކުއްލި މައްސަލައިގައި ބުނެފައި ވަނީ، ނޫސްވެރިކަން ކުރުމާއި މުވާސަލާތީ ވަސީލަތްތައް ބޭނުން ކޮށްގެން އިސްލާމްދީނުގެ އަސްލަކާއި ޚިލާފު ނުވާ ގޮތެއްގެ މަތީން އެމީހެއްގެ ބުއްދިއަށް ފެންނަ ގޮތްތަކާއި ޚިޔާލު ފާޅުކުރުމަކީ ޤާނޫނުއަސާސީން ކަށަވަރު ކޮށްދީފައިވާ އަސާސީ ހައްގެއް ކަމަށެވެ.
ނަމަވެސް މަޖިލީހަށް މިހާރު ހުށަހަޅާފައިވާ މީޑިޔާ ކޮމިޝަނުގެ ބިލު ޑްރާފްޓް ކޮށްފައިވަނީ ނޫސްވެރިންނާއި މީޑިޔާ ހިންގާ ފަރާތްތައް ސަރުކާރުގެ މުށުތެރެއަށްލައި އެ ކޮމިޝަން ރެގިއުލޭޓު ކުރުމުގެ ފުރިހަމަ ކޮންޓްރޯލް ސީދާ ރައީސުލްޖުމްހޫރިއްޔާއަށް ލިބޭގޮތަށް ކަމުގައިވެސް އޭނާ ވިދާޅުވެފައިވެއެވެ.
މީޑިޔާ ކޮމިޝަނުގެ ބިލު މިހާރު އޮތްގޮތުން ނޫސްވެރިންގެ ޖަމްއިއްޔާ އާއި މޯލްޑިވްސް މީޑިޔާ ކައުންސިލާއި ގިނަ ނޫސްތަކާއި ނޫސްވެރިންވެސް ދަނީ ކަންބޮޑުވުން ފާޅު ކުރަމުންނެވެ.
