މިނިވަން މުއައްސަސާތައް ކަމަަށްވާ، ސިވިލްސާވިސް ކޮމިޝަން (ސީއެސްސީ) އާއި އެންޓިކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ) ގެ ބައެއް މެންބަރުން ވަކިކުރަން ރައްޔިތުންގެ މަޖިލީހަށް ހުށަހެޅީ ނުފޫޒަށް ލެނބުމާއި ސުލޫކީ ހަމަތަކާ ޚިލާފުވެފައިވާ މައްސަލަ ތަކެއްގެ ތުހުމަތުގައި ކަމަށް ރައްޔިތުންގެ މަޖިލީހުގެ މިނިވަން މުއައްސަސާތަކާބެހޭ ކޮމިޓީގެ މުގައްރިރު، އަދި މާފުށި ދާއިރާގެ މެންބަރު ހުސެއިން ރިޒާ އާދަމް ވިދާޅުވެއްޖެއެވެ.

ސީއެސްސީގެ ރައީސް މުހައްމަދު ނާސިހާއި، އޭސީސީގެ ނައިބު ރައީސް އަބްދުއްސަލާމް އާއި އެކޮމިޝަންގެ މެންބަރު ތޯހާ މުހައްމަދާއި، އީސީ ގެ ނައިބު ރައީސް އަލީ ނަޝާތު އާއި އެކޮމިޝަންގެ މެންބަރުން ކަމަށްވާ، މުހައްމަދު އާސިފާއި، ޑރ. މުހައްމަދު ޒާހިރު، މެންބަރު ކަމުން ވަކިކުރުމަށް ރައްޔިތުންގެ މަޖިލީހަށް ވަނީ ހުށަހަޅައިފައެވެ.

އެ ބޭފުޅުން ކޮމިޝަން ތަކުން ވަކި ކުރުމުގެ މައްސަލަ މަޖިލިސް ތަޅުމުގައި އިއުލާން ކޮށްދެއްވުމަށް އެދި، މިނިވަން މުއައްސަސާ ތަކުގެ ކޮމިޓީގެ މުގައްރިރު ރައްޔިތުންގެ މަޖިލިހުގެ ރައީސް އަބްދުއްރަހީމް އަބުދުﷲ އަށް ފޮނުވާފައިވާ ސިޓީގައި ވަނީ އެކަންކަން ފާހަގަ ކުރައްވައިފައެވެ.

އެގޮތުން އޭސީސީގެ ބޭފުޅުން ވަކި ކުރެއްވުމަށް އެދި، ފޮނުއްވި ސިޓީގައި ވަނީ ވާޖިބު އަދާކުރުުގައި ކޮމިޝަންގެ މެންބަރުން އެއްވެސް ބިރަކަށް އަދި އެއްވެސް ނުފޫޒަކަށް ލެނބިގެންނުވާނެ ކަމަށް، އޭސީސީގެ ޤާނޫނުގެ އޭސީސީގެ ޤާނޫނުގެ 17 ވަނަ މާއްދާގެ (ހ) ގައި ބަޔާންކޮށްފައިވާ ކަމަށެވެ. އަދި އެކޮމިޝަނުން މައްސަލައެއް ނިންމުމުގައި އަދި މައްސަލައެއް ހިންގުމުގައި، ނުވަތަ މަޝްވަރާއެއް ކުރުުގައި، ނުވަތަ ސިޔާސަތެއް ކަނޑައެޅުމުގައި، ސީދާގޮތުންވެސް ނުވަތަ ނުސީދާ ގޮތުންވެސް އަމިއްލަ މަސްލަހަތު ހާސިްލުރަން މަސައްކަތްކޮށްގެން ނުވާނެ ކަމަށް އެ މާއްދާގެ (ށ)ގައި ބަޔާން ކޮށްފައިވާ ކަމަށެވެ. އަދި މެންބަރަކު އެކަންކަމާ ޚިލާފުވުމަކީ މެންބަރުކަމުން ވަކިކުރެވޭނެ ހާލަތެއް ކަމަށް ޤާނޫނުގައި ބަޔާންކޮށްފައިވާ ކަމަށްވެސް އެ ސިޓީގައި ވެއެވެ.

ޤާނޫނުގައި އެގޮތަށް ބަޔާންކޮށްފައި ވަނިކޮށް، އޭސީީސީގެ ނައިބު ރައީސް އާއި މެންބަރު ތޯހާ ޤާނޫނާ ޚިލާފަށް އެތައްކަމެއް ކޮށްފައިވާ ކަމަށް ތުހުމަތުކޮށް، ކޮމިޓީއަށް ދެ މައްސަލއެއް ހުށަހަޅާފައިވާ ކަމަށްވެސް ބުނެފައިވެއެވެ. އެހެންކަމުން އެކަމާގުޅިގެން އެބޭފުޅުން ކޮޮމިޝަނުން ވަކިކުރަން ހުށަހަޅާފައިވާ މައްސަލަތައް ކޮމިޓީން ދިރާސާ ކުރަން ފާސްކުރީ ކަމަށްވެސް އެ ސިޓީގައި ވެއެވެ.

ސީއެސްސީގެ ރައީސް ކޮމިޝަންގެ މެންބަރުކަމުން ވަކި ކުރުމުގެ މައްސަލަ އާއި އީސީގެ ނާއިބު ރައީސް އާއި އެކޮމިޝަންގެ މެންބަރުން ކަމަށްވާ، އާސިފާއި، ޑރ. މުހައްމަދު ޒާހިރު ވަކިކުރުމުގެ މައްސަލައިގައި ފޮނުވާފައިވާ ސިޓީގައި ކޮމިޓީގެ މުގައްރިރު މަޖިލިސް ރައީސަށް ފޮނުއްވާފައިވާ ސިޓީގައި ވަނީ، އެ ދެކޮމިޝަންގެ ޤާނޫނުގައި ބުނެފައިވާ ސުލޫކީ މިންގަނޑާ އެބޭފުޅުން ޚިލާފުވެފައިވާތީ، މެމްބަރުކަމުން ވަކި ކުރުމުގެ މައްސަލަ ކޮމިޓީހަށް ހުށަހަޅާފައިވާތީ، އެ މައްސަލަބެލުމަށް ކޮމިޓީން ފާސްކޮށްފައިވާ ކަމަށެވެ. އަދި އެބޭފުޅުން ޤާނޫނުގައި ބުނާ ސުލޫކީ މިންގަނޑާ ޚިލާފުވުމަކީ މެންބަރުކަމުން ވަކިކުރެވޭނެ ހާލަތެއް ކަމަށް ޤާނޫނުގައ ބަޔާން ކޮށްފައިވާ ކަމަށްވެސް ސިޓީގަިއ ވިދާޅުވެފައިވެއެވެެ.

ރައްޔިތުންގެ މަޖިލީހުގެ މިއަދުގެ ޖަލްސާގައި އެބޭފުޅުން ކޮމިޝަންތަކުން ވަކި ކުރުުގެ މައްސަލައިގައި ކޮމިޓީން މަޖިލީހުގެ ރައީސަށް ފޮނުއްވި ސިޓީތައް މަޖިލިސް ތަޅުމަށް އިއްވީ އިދާރީ މޭޒުން މަޖިލީހުގެ އަމީން އާއްމު ފާތިމަތު ލިއުޝާއެވެ.

އެ ސިޓީތައް މަޖިލިސް ތަޅުމަށް އިއްވުމުން އެ މައްސަލަ އިތުރަށް ދިރާސާ ކުރުމށް މިނިވަން މުއައްސަސާތަކުގެ ކޮމިޓީއަށް އަލުން ފޮނުވިކަން މަޖިލިސް ރައީސް އިއުލާން ކުރެއްވިއެވެ.