ރާއްޖޭގެ ވެށިން ނުހައްގު މުއްސަނދިކަން ހޯދާ ކޮންމެ މީހެއްގެ މައްސަލަވެސް ބެލެން ޖެހޭނެ ކަމަށް ރައްޔިތުންގެ މަޖިލީހުގެ ޕީއެންސީގެ އޭދަފުށީ ދާއިރާގެ މެންބަރު އަހުމަދު ސަލީމް ވިދާޅުވެއްޖެއެވެ.
މެންބަރު ސަލީމް މިހެން ވިދާޅުވީ، ދައުލަތުގެ މަގާމުތަކުގައި ތިބެ، ނުހައްގު މުއްސަނދިކަން ހޯދާ މައްސަލަތަކުގައި ވެރިންނަށް ދައުވާ ކުރަން ފަސޭހަވާނެ ގޮތަށް ޤާނޫނަށް އިސްލާހު ހުށަހެޅި ބިލުގެ ބަހުސްގައި ވާހަކަ ދައްކަވަމުންނެވެ.
މި ބިލުގައި ވަނީ ރައީސުލްޖުމްހޫރިއްޔާ ކަމުގެ، ނުވަތަ ވަޒީރު ކަމުގެ ނުވަތަ ރައްޔިތުންގެ މަޖިލީހުގެ މެންބަރު ކަމުގެ، ނުވަތަ ފަނޑިޔާރު ކަމުގެ މަގާމެއްގައި ހުރި ފަރާތްތަކާއި ދައުލަތުގެ މުވައްޒަފުކަން ކޮށްފައިވާ އަދި ކުރަމުންދާ ފަރާތްތަކަށް، ނުހައްގު މުއްސަނދި ކަމުގެ ދައުވާ ކުރެވޭނެ ކަމަށެވެ.
މެންބަރު ސަލީމް ވިދާޅުވީ، ނުހައްގު މުއްސަނދި ކަމުގެ ކުށުން ހަމައެކަނި އެފަރާތް ތަކަށް ކުށްވެރިވާ ގޮތަށް އޮތުމުގެ ބަދަލުގައި ބިލުގައި އޮންނަން ޖެހޭނީ އެފަދަ ކަމެއް ކުރާ ކޮންމެ މީހަކަށް ދައުވާ ކުރަންޖެހޭ ގޮތަށް ކަމަށެވެ.
"އަޅުގަނޑުމެނަށް އެބަފެނޭ ނުހައްގު ގޮތުގައި ހަމަ ތެޔޮ އެތެރެ ކޮށްގެން، ސިނގިރޭޓް އެތެރެ ކޮށްގެން، މަސްތުވާތަކެތި އެތެރެ ކޮށްގެން، ނޫނީ އެހެން ގޮތްގޮތުންވެސް އެތައް ނުހައްގު މުއްސަނދި ކަމެއްއެބަ ހޯދާ،" ސަލީމް ވިދާޅުވިއެވެ.
ސަލީމް ވިދާޅުވީ، ކޮންމެ ސަރުކާރެއްގައިވެސް، ގިނަ ކުންފުނި ތަކެއްގައި ކޮރަޕްޝަންގެ އަމަލުތައް ހިންގަމުން ގެންދާތަން ފެންނަ ކަމަށެވެ.
"ކޮންމެ ސަރުކާރެއްގައިވެސް ފެންނަނީ އިންތިހާއަށް ކޮރަޕްޝަންގެ އަމަލުތައް ހިނގަމުން ދާތަން، ނަމަވެސް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބޭނުންވީ ކޮރަޕްޝަނަށް އެއްވެސް ޖާގައެއްނުދީ ގާނޫނަށް ގެންނަޖެހޭ ކޮންމެ އިސްލާހެއް ގެނެސްގެން ނަމަވެސް މިކަން ސަރުކާރުގެ ތެރެއިން ހުއްޓުވަން،" ސަލީމް ވިދާޅުވިއެވެ.
