ހދ. ކުޅުދުއްފުށީގައި މިރޭ އިރާކޮޅު ހިނގައިދިޔަ އަލިފާނުގެ ޙާދިސާއެއްގައި، އެރަށުގެ ގެއެއް އަނދައި ހުލިވެއްޖެއެވެ.

ކުޅުދުއްފުށިން މައުލޫމާތު ލިބިފައިވާ ގޮތުގައި އަލިފާން ރޯވެ ބިމާ ހަމަވީ އެރަށު "ސަމޭދާނު" ގޭގައެވެ. މި ޙާދިސާ ހިނގާފައި ވަނީ މިރޭ 9 ޖަހާކަންހާއިރުއެވެ. ގެ އަނދައި ހުލިވި ނަމަވެސް، އެއްވެސް މީހަކަށް ގެއްލުމެއް ނުލިބޭ ކަމަށް ވަނީ މައުލޫމާތު ލިބިފައެވެ. އެނގިފައިވާ ގޮތުގައި އެ ގެ ހަދާފައި ވަނީ ފިލާ ބޭނުން ކޮށްގެންނެވެ.

މައުލޫމާތު ލިބިފައިވާ ގޮތުގައި މި ގޭގައި ދިރިއުޅެނީ ދެ ފިރިހެނުން އެކަންޏެވެ. ނަމަވެސް އަލިފާން ރޯވި ވަގުތު ގޭގައި އެއްވެސް މީހަކު ނޫޅޭކަމަށް ވެއެވެ. އެ ގޭގައި ރޯވި އަލިފާން ގަނޑު ނިއްވާލީ ސިފައިންގެ އެހީތެރިކަމާއެކުގައެވެ. އެނގިފައިވާ ގޮތުގައި އަލިފާން ގަނޑު ކޮންޓްރޯލްކޮށް އެއްކޮށް ނިއްވާލެވުނީ ރޯވިތާ ގަޑިއެއްހާއިރުގެ ތެރޭގައެވެ.

ރޯވި ގޭގައި ދިރިއުޅޭ ދެ ފިރިހެނުންނަށް ވަގުތީ ހިޔާއެއް ހަމަޖެއްސުމުގެ މަސައްކަތް ކުޅުދުއްފުށީ ކައުންސިލުން ކުރަމުންދާ ކަމަށްވެސް މައުލޫމާތު ލިބިފައިވެއެވެ.