ކުރިޔަށް އޮތް 2025 ވަނަ އަހަރުގެ ދައުލަތުގެ ބަޖެޓުގައި، ކައުންސިލުތައް ހިންގުމަށް ބޭނުންވާ ބަޖެޓުން ބޮޑުބަޔެއް އުނިކުރުމަކީ، ލާމަރުކަޒީ ނިޒާމު ނެތިކޮށްލަން ސަރުކާރުން ކޮށްފައިވާ ކަމެއް ކަމުގައި އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ސޯޝަލް މީޑިޔާގެ ރަސްމީ އެކައުންޓުގައި ޝާހިދު ކުރެއްވި ޕޯސްޓެއްގައި ވިދާޅުވީ، ކައުންސިލު ތަކަށްދޭ ބަޖެޓު ކުޑަކުރަން ސަރުކާރުން ނިންމި ނިންމުމަކީ، ކައުންސިލު ތަކުން ރައްޔިތުންނަށްދޭ ޚިދުމަތްތައް ހުއްޓުވަން ކުރި ކަމެއް ކަމަށެވެ. ޝާހިދު ސިފަކުރެއްވީ އެއީ އެކަމަކީ، ލާމަރުކަޒީ ނިމާލު ނެތިކޮށްލަން ސަރުކާރުން ކުރަމުންދާ މަސައްކަތުގެ އިތުރު ފިޔަވަޅެއްގެ ގޮތުގައެވެ.
"ކައުންސިލްތަކަށް ޤާނޫނުން ދޭން ކަނޑައަޅާފައިވާ، ކައުންސިލް ހިންގުމަށް ބޭނުންވާ ބަޖެޓުން ބޮޑުބައެއް އުނިކޮށް، ބަޖެޓް ހަދާފައިވުމީ، ކައުންސިލްތަކުން ރައްޔިތުންނަށް ދޭ ޚިދުމަތްތައް ހުއްޓުވައި، ރައްޔިތުން ނިކަމެތި ކުރުމަށް ކޮށްފައިވާ ކަމެއް. ލާމަރުކަޒީ ނިޒާމު ނެތިކޮށްލުމަށް ސަރުކާރުން ކުރަމުންގެންދާ މަސައްކަތުގެ އިތުރު ފިޔަވަޅެއް." ޝާހިދު ވިދާޅުވިއެވެ.
ޝާހިދު އިތުރަށް ވިދާޅުވި ގޮތުގައި ކައުންސިލު ތަކަށް ލިބިދޭ ބަޖެޓުގެ ނިސްބަތް މަދުކޮށް، އެފައިސާ އެހެން ކަންކަމަށް ޚަރަދު ކުރުމުގެ ޤާނޫނީ ބާރު ސަރުކާރަށް ލިބިގެންވެސް ނުވާކަމަށެވެ.
ކައުންސިލު ތަކުގެ ބަޖެޓްގައި އަންނަ 2025 ވަނަ އަހަރަށް ހިމަނާފައިވަނީ 1.4 ބިލިއަން ރުފިޔާއެވެ. އެއީ މިހިނގާ 2024 ވަނަ އަހަރުގެ ކައުންސިލު ތަކުގެ ބަޖެޓަށްވުރެ، 33 އިންސަތަ މަދު އަދަދެކެވެ. މިއަހަރު ކައުންސިލު ތަކުގެ ބަޖެޓަކީ 2.2 ބިލިއަން ރުފިޔާއެވެ.
