އެންޓިކޮރަޕްޝަން ކޮމިޝަން (އޭސީސީ) ގެ ރައީސް އައްޔަން ކުރުމަކީ ރައީސުލްޖުމްހޫރިއްޔާއަށް މުތުލަގަށް ލިބެންޖެހޭ ބާރެއް ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވެއްޖެއެވެ.

އޭސީސީގެ ރައީސް އާއި ނާއިބު ރައީސް އިންތިހާބު ކުރުން މިހާރު އޮންނަނީ އެ ކޮމިޝަންގެ މެންބަރުންގެ ތެރެއިންނެވެ.

އެގޮތް ބަދަލުކޮށް އޭސީސީގެ ރައީސް އާއި ނާއިބު ރައީސް އައްޔަން ކުރުމުގެ ބާރު ރައީސުލްޖުމްހޫރިއްޔާއަށްދޭން އޭސީސީގެ ގާނޫނު ބަދަލު ކުރަން ސަރުކާރުން މަޖިލީހަށް ހުށަހެޅި ބިލްގެ ބަހުސްގައި ވާހަކަ ދައްކަވަމުން ނާޒިމް ވިދާޅުވީ، އެކަމަކީ އަލަށްކުރާ ކަމެއްްނޫން ކަމަށެވެ.

"މިއީ އަލަށްކުރާ ކަމެއްނޫން، މީގެކުރީ ސަރުކާރުން ވަނީ ސިވިލް ސާވިސްގެ ރައީސް އައްޔަން ކުރުމުގެ މަރުހަލާ މިބިލުގައިވާ ބީދައިން ހިނގާގޮތަށް ބަދަލުކޮށްފަ، އެއީ 27،000 މުވައްޒަފުންގެ ކަންތައް ބަަލަހައްޓާ ތަނެއް. އެތަނުގެ ރައީސް އެއީ ޖޭއެސްސީގެ މެންބަރުކަންވެސް ލިބޭ ބޭފުޅެއް،" ނާޒިމް ވިދާޅުވިއެވެ.

އެހެންކަމުން އޭސީސީގެ ރައީސްގެ މަގާމި އައްޔަން ކުރުމުގެ ބާރު މި ސަރުކާރުން ރައީސުލްޖުމްހޫރިއްޔާއަށް ދޭން ބަދަލު ކުރުމަކީ ފާޑު ކިޔޭނެ ކަމެއްނޫން ކަަމަށްވެސް ނާޒިމް ވިދާޅުވިއެވެ.

ނާޒިމް ވިދާޅުވީ، އޭސީސީގެ މެންބަރުން ހިހޫތަނުން ކާލައިގެންތިބެން ޖާގަދީގެން ހުންނަ ރައީސަކު ލައިގެން އޭސީސީ ހިންގާތަން ބަލަން ބޭނުންނުވާ ކަމަށެވެ. ރައްޔިތުން ޕީއެންސީއަށް ސުޕަމެޖޯރިޓީ ދިނީ ރާއްޖެ އިސްލާހުކޮށް، ކޮރަޕްޝަން މައްސަލަތައް ހުއްޓުވައި، އެކަންކަން އިސްލާހު ކުރުމަށް ކަމަށެވެ.

ނާޒިމް ވިދާޅުވީ، އެގޮތަށް ކަންކަން އިސްލާހުވަމުން ދާތަން ނުފެންނަ ކަމަށެވެ.

"ސުމަގްލް ކުރުމާއި އަނެއްކަމެއް ކުރުމާއި، ނުހައްގުން މީހުންތައް މުއްސަދިވެގެންގޮސް މީހުންގެ ބިންބިމާއި އިމާރާތް ތަކަން ދަންދެން ގަނެގެންގޮސް ކަންތައްތައް ވާއިރުގައި ހަމަ މިއޮތީ، އެފްއޭއެމްގެ ރައީސްވެސް ދެ އެޕާޓްމަންޓް ގަނެގެން ޖެހިގެން ހުރި ދެ އެޕާޓްމަންޓް ގުޅާލައިގެން އެތައްކަމެއް ކުރިއިރުގައި މިއޮތީ ކަންތައްގޮސްފައި އޮތްގޮތް، އެފްއޭއެމްގެ ރައީސަކުވެސް ގެއިން ނެރެންޖެހޭ ހިސާބަށް ދިއުމުން،" ނާޒިމް ވިދާޅުވިއެވެ.