ސަރުކާރުގެ އެކި އެކި މުއައްސަސާގެ ސިޔާސީ މަގާމުތަކަށް ރައީސުލްޖުމްހޫރިްޔާ އައްޔަން ކުރައްވާ ފައިވާ ފަރާތްތަކުގެ މައުލޫމާތު ހާމަކުރުމަށް ގޮވާލައި ހުށަހެޅި ކުއްލި މައްސަލަ މަޖިލިސް ތަޅުމުން ބޭރުކޮށްލައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް މި ކުއްލި މައްސަލަ ހުށަހެޅުއްވީ އިދިކޮޅު އެމްޑީޕީގެ، ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމެވެ.

ކުއްލި މައްސަލަ ހުށަހަޅުއްވަމުން މީކާއީލް ވިދާޅުވީ، ދައުލަތުގެ ހަރަދުތައް ކުޑަކުރުމަށް އަޅުއްވާ ފިޔަވަޅެއްގެ ގޮތުން ސަރުކާރުގެ އެކި އެކި މުއައްސަސާތަކާއި އިދާރާތަކާއި ސަރުކާރު ހިއްސާވާ ކުންފުނިތަކުގެ ބައެއް ފަރާތްތަކުގެ މުސާރަ ކުޑަ ކުރުމަށް ސަރުކާރުން ނިންމާފައިވާ ކަމަށެވެ.

ނަމަވެސް ސިޔާސީ މުވައްޒަފުންގެ ގޮތުގައި ރައީސުލްޖުމްހޫރިއްޔާ އައްޔަން ކުރައްވާ ފައިވާ ފަރާތްތަކުގެ އަދަދުތައް މިއަދާ ހަމައަށް އައިއިރު ހާމަކޮށްފައިނުވާ ކަމަށްވެސް ވިދާޅުވިއެވެ.

އެހެންކަމުން ފަރާތްތަކުގެ މުސާރަތައް ކުޑަކުރަން ހުށަހަޅާފައިވާ މި ދަނޑިވަޅުގައި ސިޔާސީ މަގާމުތަކަށް ރައީސުލްޖުމްހޫރިއްޔާ އައްޔަން ކޮށްފައިވާ ފަރާތްތަކުގެ އަދަދާއި، އެ ފަރާތްތަކުގެ މަގާމުގެ މަސްއޫލިއްޔަތު ހާމަކޮށްދިނުމަށް ރައީސުލްޖުމްހޫރިއްޔާ އާއި ސަރުކާރަށް ގޮވާލާ ކަމަށް އެ ކުއްލި މައްސަލައިގައި މީކާއީލް ވިދާޅުވިއެވެ.

މި ކުއްލި މައްސަލަ މަޖިލީހަށް ބަލައިގަންނަން ފެނޭތޯ ބެލުމަށް ނެގި ވޯޓުގައި އެ ކުއްލި މައްސަލަ މަޖިލީހަށް ބަލައިގަންނަން ވޯޓު ދެއްވީ އެމްޑީޕީގެ އަށް މެންބަރުން އެކަންޏެވެ. ދެން ތިއްބެވި 59 މެންބަރުން ވޯޓު ދެއްވީ މައްސަލަ މަޖިލިސް ތަޅުމުން ބޭރުކޮށްލުމަށެވެ.