އައްޑޫ ސިޓީގެ ގުޅިފައިވާ ރަށްރަށުގެ ކަރަންޓަށް ދިމާވެފައިވާ މައްސަލަ ހައްލު ކުރުމަށް، އާ ޖަނަރޭޓަރެއް މިހާރު ގެނެސްފައިވާ ކަމަށާއި، އަންނަ އޯގަސްޓު މަހުގެ ތެރޭގައި އައްޑޫ ސިޓީގެ ގުޅީފައިވާ ރަށްތަކަށް ދިމާވެފައިވާ ކަރަންޓުގެ މައްސަލައަށް ކުރު ރާސްތާގެ ހައްލެއް ގެނެވޭނެ ކަމަށް ކްލައިމެޓްޗޭންޖް އެންޑް އެނަޖީ ވަޒީރު ތޯރިގު އިބްރާހިމް ވިދާޅުވެއްޖެއެެވެ.

މިިނިސްޓަރު ތޯރިގު މިހެން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގެ ވަޒީރުންނާ ސުވާލު ކުރުމުގެ ވަގުތުގައި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ކުރެއްވި ސުވާލަށް ޖަވާބު ދެއްވަމުންނެވެ.

ނާޒިލް ސުވާލު ކުރެއްވީ، އައްޑޫ ސިޓިގެ ކަރަންޓްގެ މައްސަލައށް އަވަސް ހައްލެއް އަންނާނީ ކޮން އިރަކުންތޯ، އާއި އެކަމަށް ދާއިމީ ހައްލެއް ގެނައުމަށްޓަކައި ވިސްނުންފުޅަކީ ކޮބައިތޯ އޮޅުން ފިލުއްވުމަށެވެ.

ޖަވާބު ދެއްވަމުން މިނިސްޓަރު ވިދާޅުވީ، އައްޑޫ ސިޓީގެ ގުޅިފައިވާ ރަށްތަކަށް ކަރަންޓުދޭ، ހިތަދޫ ސެންޓްރަލް ޕަވާރ ސްޓޭޝަންގެ މައްސަލައަކީ އެމްޑީޕީ ސަރުކާރުގެ ފަސް އަހަރުގެ ތެރޭގައި އެތަނަށް އެއްވެސް ކަހަލަ ތަރައްގީއެއް ގެނެސްފައި ަނުވާތީ ދިމާވެފައިވާ މައްސަލައެއް ކަަމަށެވެ.

އެކަމުގެ ސަބަބުން އެތަނުގައި ހުރި ޖަނަރޭޓަރުތައް މަރާމާތު ނުކުރެވި، އާ ޖަނަރޭޓަރުތައް ގެނެވިފައިނުވާ ކަމަށްވެސް ވިދާޅުވިއެވެ. އެކަމުގެ ސަބަބުން އެތަނުގައި ކަރަންޓް ފޯރުކޮށްދިނުމަށް ހުރި 20 ޖަނަރޭޓަރުގެ ތެރެއިން ފަސް ޖަނަރޭޓަރު ހަލާކުވެފައިވާ ކަމަށްވެސް ވިދާޅުވިއެވެ.

ނަމަވެސް މިނިސްޓަރު ވިދާޅުވީ، އައްޑޫ ކަރަންޓްގެ މައްސަލަ ހައްލު ކުރުމަށް މިހާރުގެ ސަރުކާރުން ކުރިއަށްގެންދާ މަސައްކަތް ތަކުގެ ދަށުން ފެނަކައަށް 1.5 މެގަވޮޓްގެ އާ ޖެނެރޭޓަރެއް ގެނެސްފައިވާ ކަމަށާއި، އިތުރު ތިން ޖަނަރޭޓަރަށް ބޭނުންވާ ސްޕެއާޕާޓްސް ގެނެސްފައިވާ ކަމަށެވެ. އެ ޖަނަރޭޓަރުތަކާއި އަދި އިތުރު ދެ ޖަނަރޭޓަރު އޯވަހޯލް ކުރުމުގެ މަސައްކަތް އަންނަ އޯގަސްޓް މަހު ނިމޭނެ ކަމަށްވެސް މިނިސްޓަރު ވިދާޅުވިއެވެ.

އެކަމުގެ އައްޑޫ ސިޓީގެ ގުޅީފައިވާ ރަށްތަކަށް ދިމާވެފައިވާ ކަރަންޓުގެ މައްސަލައަށް ކުރު ރާސްތާގެ ހައްލެއް ގެނެވޭނެ ކަމަށް ވިދާޅުވިއެވެ.