ޖަލަށް ޑްރަގާއި ފޯނު ވެއްދުމުގައި ހަރަކާތްތެރިވާ މޯލްޑިވްސް ކަރެކްޝަން ސާވިސަސްގެ ތިން މީހަކު ހައްޔަރުކޮށްފައިވާ ކަމަށް ފުލުހުން ބުނެފި އެވެ.
ހޯމް މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަލީ އިހުސާން ވިދާޅުވީ، ފުލުހުންގެ ހާއްސަ ޓީމަކުން މިހާރު ދަނީ މާފުށި ޖަލުގައި ކަރެކްޝަންގެ އޮފިސަރުންނާ ދެކޮޅަށް އޮޕަރޭޝަނެއް ހިންގަމުން ކަމަށެވެ.
އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވީ ކަރެކްޝަންގެ އޮފިސަރުންގެ މައްސަލަ ސަމާލުކަމަށް އައިތަނާހެން އިންޓެލިޖެންސް ބޭނުންކޮށްގެން މައުލޫމާތު ހޯދާފައިވާ ކަމަށެވެ. އެގޮތުން ކަރެކްޝަންސްގެ 18 މުވައްޒަފެއް ޖަލަށް މަސްތުވާތަކެއްޗާއި ފޯނު ވެއްދުމުގައި އެހީތެރިވާކަން އިންޓެލިޖެންސުން ހޯދައިފައިވާ ކަމަށް ޝަރީފު ވިދާޅުވި އެވެ.
އެ އޮފިސަރުންގެ އެކައުންޓަށް ފައިސާ ޖަމާވެފައިވާކަމަށާއި އެގޮތުން 24 މިލިއަން ރުފިޔާއިން ބައެއް އޮފިސަރުންގެ އެކައުންޓުތަކަށް ޖަމާވެފައިވާއިރު 2023 ވަނަ އަހަރުގެ ޖެނުއަރީ މަހުން ފެށިގެން މިހާތަނަށް 18 އޮފިސަރުންގެ އެކައުންޓަށް ޖުމްލަ 73.6 މިލިއަން ރުފިޔާ ޖަމާވެފައިވާ ކަމަށް ޝަރީފު ވިދާޅުވި އެވެ.
އަދި ވިދާޅުވީ މިހާރު ކުރިއަށްދާ އޮޕަރޭޝަނުގައި ކަރެކްޝަންގެ ތިން އޮފިސަރަކު ހައްޔަރުކޮށްފައިވާ ކަމަށެވެ.
