ގައުމުގެ މާލީ ހާލަތު ރަނގަޅަށް ދެނެގަތުމަށްޓަކައި ފިނޭންސް މިނިސްޓަރު ޑރ. މުހައްމަދު ޝަފީގު ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހާޒިރުކުރަން، އެ ކޮމިޓީން ނިންމައިފިއެވެ.
މާލިއްޔަތު ކޮމިޓީގެ ބައްދަލުވުމުގައި މިނިސްޓަރު ހާޒިރު ކުރަން ހުށަހެޅުއްވީ، ޕީއެންސީއަށް ނިސްބަތްވާ، މަޖިލީހުގެ ނައިބު ރައީސް ދިއްގަރު ދާއިރާގެ މެންބަރު އަހުމަދު ނާޒިމެވެ. އެ ހުށަހެޅުމަށް ކޮމިޓީގެ ބައްދަލުވުމުގައި ތިއްބެވި ހުރިހާ މެންބަރުން ތާއީދު ކުރެއްވިއެވެ. އެހެންކަމުން އެ ހުށަހެޅުން ފާސްވީ މެންބަރުންގެ އިއްތިފާގުންނެވެ.
ނާޒިމް ވިދާޅުވީ، މިހާރު ގައުމުގެ މާލީ ހާލަތު އޮޅުން ފިލާފައިނުވާ ކަމަށާއި، މަސައްކަތް ތަކާއިގެން ކުރިއަށް ދާއިރު ގައުމުގެ މާލީ ހާލަތު ރަނގަޅަށް އެނގެން ޖެހޭކަމަށެވެ. ކުރަންވީ ކަންތައް ތަކާއި ދާންވީ މިސްރާބު އެނގޭނީ އޭރުން ކަަމަށްވެސް ވިދާޅުވިއެވެ.
އެހެން ކަމުން ގައުުގެ މާލީހާލަތާބެހޭ ތެދު ސައްހަ މައުލޫމާތު ފިނޭންސް މިނިސްޓަރު ކޮމިޓީއާ ހިއްސާ ކުރަންޖެހޭ ކަމަށްވެސް ވިދާޅުވިއެވެ.ނާޒިމް ވިދާޅުވީ، މާލީ ގޮތުން ރައްޔިތުންގެ މަޖިލީހުން އަޅަން ޖެހޭ ފިޔަވަޅުތައް އެނގޭނީވެސް އޭރުން ކަމަށެވެ.
